Վերանայեք ձեր գինը

Airbnb Start-ի ընթացքում առաջարկվող գինը հիմնված է մի շարք գործոնների վրա, օրինակ՝ տարածքի տեղադրության, հարմարությունների և հյուրերի շրջանում նմանատիպ տարածքների պահանջարկի։ Դուք միշտ վերահսկում եք ձեր գինը և ցանկացած պահի կարող եք փոխել այն։

Եթե ձեր տարածքը գնահատեք ավելի բարձր, քան մոտակայքում գտնվող նմանատիպ տարածքների գներն են, հնարավոր է, որ ամրագրումներ կորցնեք։ Ստուգեք գինը հիմա և մտածեք այն պարբերաբար ճշգրտելու մասին, որպեսզի հասնեք ձեր եկամուտների նպատակներին։

Տեղական պահանջարկը հասկանալը կօգնի մրցունակ գին սահմանել ձեր տարածքի համար։

Բացեք օրացույցը, որպեսզի քարտեզի վրա դիտեք մոտակայքում գտնվող նմանատիպ տարածքների միջին գները։ Կարող եք տեսնել ձեր ընտրած ամսաթվերին ամրագրված կամ չամրագրված տարածքներ։ Շատ գործոններ են որոշում, թե որ տարածքներն են նման, այդ թվում՝ տեղադրությունը, մեծությունը, առանձնահատկությունները և հարմարությունները։

«Իմ տարածաշրջանում իրավիճակին տեղյակ լինելով՝ ես ավելի վստահորեն եմ սահմանում գները»,- ասում է Ավստրալիայի Նոր Հարավային Ուելս նահանգում Հյուրընկալողների խորհրդի անդամ և սուպերտանտեր Ֆելիսիթին։ «Ես գիտեմ՝ արդյո՞ք գինը շահավետ է, և կարելի է շարունակել նույն կերպ, թե՞ պետք է իջեցնեմ գինը»։

Գինը վերանայելիս նկատի ունեցեք․

• Սեզոնային միտումները։ Կարող եք գները ճշգրտել ըստ պահանջարկի։ Լիզան, որը սուպերտանտեր է Նյու Յորք նահանգի Ակորդ գյուղակում, ասում է, որ իր գինը բարձր է պահում ամռանը, քանի որ ունի լողավազան, իսկ ձմռանը՝ ավելի ցածր, որպեսզի «մշտապես ամրագրումներ ունենա ամբողջ տարվա ընթացքում»։

• Ընդհանուր գինը, որը վճարում են հյուրերը։ Այն ներառում է Airbnb-ի սպասարկման վճարները, հարկերը և լրացուցիչ վճարները, օրինակ՝ մաքրման կամ տնային կենդանիների վճարները։ Օրացույցում ընտրեք ցանկացած ամսաթիվ (ամսաթվեր), որպեսզի տեսնեք գնի մանրամասները, այդ թվում՝ թե որքան են վճարում հյուրերը։

• Ձեր տարածքի գին/որակ հարաբերակցությունը։ Թարմացումներ անելով՝ կգրավեք ավելի շատ հյուրերի։ «Դիզայնն ու հարմարությունները գինը բարձրացնելու և ամրագրումներն ավելացնելու հիանալի միջոց են»,- ասում է Քեթի Քեյը, որը Հյուրընկալողների խորհրդի անդամ և սուպերտանտեր է Կալիֆոռնիայի Լեյք Էռոուհեդ քաղաքում։

Խելացի գնանշումը կարող է օգնել ձեզ ավտոմատ կերպով ճշգրտել գինը։ Գործիքը հաշվի է առնում հարյուրավոր գործոններ՝ գինն ըստ պահանջարկի պարբերաբար ճշգրտելու համար։ Դուք եք սահմանում գնային միջակայքը և կարող եք այն միացնել ու անջատել ցանկացած ամսաթվի համար։

Որոշ հյուրընկալողներ նախքան իրենց տարածքի մասին բազմաթիվ կարծիքներ ստանալը սահմանում են ցածր մեկնարկային գին, որպեսզի հյուրերին շահագրգռեն ամրագրել։ Ակցիաներն ու զեղչերը նույնպես կարող են գրավել հյուրերի։ Դրանք են․

• Հատուկ առաջարկ նոր հայտարարության համար։ Նախատեսեք մեկ գիշերվա գնի 20% զեղչ առաջին երեք ամրագրումների համար։ Դա կօգնի ավելի արագ ստանալ կարծիքներ։

• Վաղ ամրագրման զեղչ։ Դուք եք ընտրում, թե ժամանումից որքան առաջ պետք է ամրագրեն հյուրերը (ժամանումից մեկից մինչև 24 ամիս առաջ)։

• Վերջին պահի զեղչ։ Լրացրեք օրացույցի բացերը սեղմ ժամկետներում՝ ժամանումից մեկից մինչև 28 օր առաջ։

• Շաբաթական և ամսական զեղչեր։ Ընդհանուր գումարի ինչ-որ տոկոսի չափով զեղչ սահմանեք առնվազն յոթ կամ առնվազն 28 գիշեր տևողությամբ ամրագրումների համար։

«Ես ավելի երկար տևողությամբ այցերի ամրագրումներ եմ ստանում՝ առաջարկելով շաբաթական և ամսական զեղչեր»,- ասում է Իսպանիայի Կանարյան կղզիներում Հյուրընկալողների խորհրդի անդամ և սուպերտանտեր Դանիելը։ «Սովորաբար հյուրերն ամրագրում են մեկ շաբաթ, և դա փոքրիկ հաղթանակ է»։

Այս հոդվածում պարունակվող տեղեկությունները կարող են փոխված լինել հրապարակումից հետո։