Հայտարարությունը դարձրեք ավելի գրավիչ
Այնպես արեք, որ ձեր հայտարարությունն աչքի ընկնի հյուրերի որոնումներում՝ ավելացնելով հիանալի լուսանկարներ և սիրված հարմարություններ։ Այս մանրամասները հյուրերին օգնում են որոշել՝ արդյոք ձեր տարածքը համապատասխանում է իրենց կարիքներին։
Ավելացրեք բարձրորակ լուսանկարներ
Լուսանկարները հայտարարության ամենակարևոր մասերից են։ Ահա թե ինչպես կարող եք դրանք օգտագործել հյուրերի ուշադրությունը գրավելու և ավելի շատ ամրագրումներ ստանալու համար։
- Ցույց տվեք ձեր տարածքն իր լավագույն կողմերով։ Պարզեք, թե օրվա որ ժամերին են ձեր սենյակները ստանում առավելագույն բնական լույս, բացեք վարագույրները և հեռացրեք ավելորդ իրերը։
- Ստեղծեք կոմպոզիցիա։ Աշխատեք միավորել լայնանկյուն և խոշոր պլանով նկարահանված կադրեր՝ լուսանկարի առարկան տեղադրելով կադրի կենտրոնում։ Տեսախցիկը պահեք աչքերի մակարդակի վրա՝ առանց վերև կամ ներքև թեքելու։
- Տրամադրեք ֆոտոշրջայց։ Լուսանկարեք յուրաքանչյուր տարածք, որից կարող են օգտվել հյուրերը։ Airbnb-ի՝ արհեստական բանականությամբ աշխատող ֆոտոշրջայցն ակնթարթորեն դասավորում է լուսանկարներն ըստ սենյակների, որպեսզի հյուրերը հասկանան դասավորությունը։
Ստացեք լրացուցիչ խորհուրդներ, թե ինչպես անել տարածքի հիանալի լուսանկարներ, և մեր պրոֆեսիոնալ լուսանկարահանման ծրագրի միջոցով իմացեք, թե ինչպես աշխատել պրոֆեսիոնալ լուսանկարչի հետ։։
Ավելացրեք բոլոր հարմարությունները, որոնք առաջարկում եք
Հայտարարությունը ստեղծելու ժամանակ կպահանջվի ընտրել տարածված հարմարություններ կարճ ցուցակից։ Հայտարարության հրապարակումից հետո չմոռանաք ձեր մյուս հարմարություններն ավելացնել մոտավորապես 150 կետանոց ամբողջական ցանկից։
Շատ հյուրեր օգտագործում են զտիչներ, որպեսզի գտնեն իրենց ուզած հարմարություններն ու առանձնահատկությունները պարունակող տարածքներ։ Հարմարությունների ցանկը կնպաստի, որպեսզի ձեր հայտարարությունն աչքի ընկնի որոնման արդյունքներում, և կձևավորի հյուրերի ակնկալիքները։
Լավագույն հարմարությունները, որոնք հյուրերը մշտապես որոնում են Airbnb-ում, ներառում են՝
- Wi-Fi
- լողավազան
- ջակուզի
- խոհանոց
- հեռուստացույց կամ մալուխային հեռարձակում
- օդորակում
- լվացքի մեքենա և չորանոց
- անվճար կայանատեղի
- ինքնուրույն ժամանում
Վերանայեք հայտարարության վերնագիրը և նկարագրությունը
Օգտագործեք վերնագիրն ու նկարագրությունը, որպեսզի ներկայացնեք, թե ինչն է առանձնահատուկ դարձնում ձեր տարածքը։
- Վերնագիրը պետք է լինի կարճ։ Օրինակ՝ «Քաղաքի կենտրոնին նայող մոդեռն լոֆթ» ձևակերպումը պարունակում է չորս պարզ, նկարագրական բառ։ Մեծատառով գրեք վերնագրի միայն առաջին բառի առաջին տառը, ինչպես նաև հատուկ գոյականները։ Խուսափեք էմոջիներ, նշաններ և միայն մեծատառեր օգտագործելուց։
- Կենտրոնացեք առանձնահատկությունների վրա։ Կարող եք վերնագրում ընդգծել ձեր գտնվելու վայրը կամ լավագույն հարմարությունը, օրինակ՝ «Հարմարավետ տնակ՝ մեծ խոհանոցով»։
- Նկարագրեք խոսակցական ոճով։ Նկարագրության մեջ բացատրեք, թե ինչ է նշանակում մնալ ձեր տարածքում՝ այնպես, կարծես պատմում եք ընկերոջը։ Կիսվեք ձեր ամենասիրելի մանրամասներով։
Սահմանեք տան կանոններ
Airbnb-ն ունի հիմնական կանոններ, որոնց պետք է հետևեն բոլոր հյուրերը։ Դրանք պարզ են և հակիրճ. ամրագրելու դեպքում հյուրերը պետք է ձեր տանը վերաբերվեն ինչպես սեփականին և համաձայնեն տան ստանդարտ կանոններին։
Տան կանոններն օգնում են հյուրերին հասկանալ, թե ինչ եք թույլատրում ձեր տարածքում։ Այդ կանոնները պետք է համապատասխանեն Airbnb-ի Ծառայությունների մատուցման պայմաններին և Խտրականության դեմ քաղաքականությանը։
Ընտրեք Airbnb-ի՝ տան ստանդարտ կանոնների ցանկից, որոնք վերաբերում են այս տարածքներին՝
- Տնային կենդանիներ
- Միջոցառումներ
- Սովորական և էլեկտրոնային սիգարետների օգտագործում
- Հանգստի ժամեր
- Ժամանման և մեկնման ժամեր
- Հյուրերի առավելագույն թիվ
- Կոմերցիոն նպատակներով լուսանկարահանում և տեսանկարահանում
Կարող եք լրացուցիչ կանոններ գրել հայտարարության կարգավորումներում, եթե ունեք հատուկ ցուցումներ, որոնք ներառված չեն տան ստանդարտ կանոններում։
Այս հոդվածում պարունակվող տեղեկությունները կարող են փոխված լինել հրապարակումից հետո։