Վարպետացեք մաքրության գործում՝ օգտվելով մասնագետների այս խորհուրդներից

Հյուրերի այցերի միջև մանրակրկիտ մաքրումը հինգ աստղանի հյուրընկալման կարևոր մասն է կազմում։ Հյուրընկալողներին հինգից քիչ աստղեր դնելու ամենատարածված պատճառներից մեկը մաքրության պակասն է։

Թույլ մի տվեք, որ փոշին, կեղտաբծերը կամ հոտը բիծ գցեն ձեր հյուրընկալության վրա։ Փորձեք պրոֆեսիոնալ մաքրուհի Դիանա Կրուզի այս խորհուրդները։ Նա և իր ամուսինը մաքրում են Ֆլորիդայի հարավ-արևմուտքում Airbnb տարածքներ ունեցող հյուրընկալողների տասնյակ սեփականություններ։

Մաքրման աշխատանքներն ավելի հեշտորեն կատարեք՝ նախապատրաստվելով դրանց։ Դիանան օգտվում է մի շարք իրերից.

• մանրաթելային և խոզանակային գլխիկներով բազմակի օգտագործման հատակամաքրիչ՝ հատակը լվանալու և անկյունները փոշեհանելու համար
• հատակամաքրիչի երկմաս դույլ՝ օճառաջուրը պարզաջրից առանձնացնելու համար
• փոշեկուլ՝ գորգերը և ճեղքերը, օրինակ՝ սահող դռների ռելսերը, մաքրելու համար նախատեսված կցորդներով
• ցնցուղի շարժական խողովակ՝ լվացարանը, լոգարանը կամ ցնցուղարանը ցայելու համար, եթե վերջինում այն չկա
• ապակե մակերևույթների բազմաֆունկցիոնալ քերիչ՝ ջեռոցների երեսները և ցնցուղի դռները կամ լոգախցիկները մաքրելու համար
• մաքրման ոչ թունավոր լուծույթներ՝ բծերը, օճառի հետքերը և խոհանոցային ճարպերի մնացորդները հեռացնելու համար
• չքերող սպունգներ՝ չժանգոտվող պողպատից պատրաստված հարմարանքների վրայի կոշտ ջրային բծերը հեռացնելու համար
• չորանոցի գնդիկներ՝ լվացքին կպչող վուշը և մազերը պակասեցնելու համար
• բազմակի օգտագործման կպչուն ժապավենային հոլովակ՝ տնային կենդանիների մորթին և մազերը գործվածքով ծածկված կահույքի վրայից հեռացնելու համար

Կազմակերպվածությունը կօգնի առավելագույնս օգտվել ձեր ժամանակից։ Մաքրման բոլոր պարագաները պահեք մեկ տեղում, օրինակ՝ շարժական ամանում կամ տանտիրոջ փակվող պահարանում, և պարբերաբար համալրեք դրանք։

Դիանան կարծում է, որ անհրաժեշտ է լրացուցիչ ջանք ներդնել, եթե ուզում եք հինգ աստղ ստանալ հյուրերից։ Նա խորհուրդ է տալիս ունենալ գործընթաց և ստուգացանկ, որպեսզի ոչինչ չմոռանաք։

Դիանան միշտ սկսում է մահճակալների և այլ սպիտակեղենը հանելուց։ «Ավելի լավ է ունենալ մաքուր սավանների և սրբիչների պահեստային հավաքածուներ նույն օրվա ընթացքում իրար հաջորդող հյուրերի համար»,- ասում է նա։ «Մեծ, փափուկ սրբիչները շատ դանդաղ են չորանում, և դա գցում է ձեզ ռիթմից»։

Նա շատ լուրջ է մոտենում կեղտերին, բծերին և մազերի հեռացմանը սովորաբար անտեսված վայրերից, այդ թվում՝

• Մահճակալների տակ։ Ստուգեք յուրաքանչյուրի տակ և մաքրեք այնտեղ մնացած փոշին կամ իրերը։
• Դարակների ներսում։ Բացեք դրանցից յուրաքանչյուրը և ներսից հեռացրեք թափոնքը։
• Պահարանների դռներ։ Սրբեք ճակատներն ու եզրերը։
• Կենցաղային տեխնիկա։ Մաքրեք տոստերի, սրճեփի, միկրոալիքային վառարանի և սառնարանի փշրանքները և բծերը։
• Ինտերիերի դեկոր։ Փոշեհանեք բոլոր մակերևույթները, այդ թվում՝ դարակները, պատուհանների շերտավարագույրները և տնային բույսերը։
• Բացօթյա տարածքներ։ Ավլեք նախամուտքերը և պատիոները՝ կեղտից, տերևներից և սարդոստայններից ազատվելու համար։

Երբ վերջացնեք, ստուգեք ձեր աշխատանքը։ Զննեք նաև լվացքը և սպասքը, երբ դրանք հանում եք չորանոցից կամ ամանալվաց մեքենայից։

Ամեն երկու-երեք ամիսը մեկ պլանավորեք մանրազնին մաքրում, որպեսզի զբաղվեք այն գործերով, որոնց ժամանակը չունեք իրար հաջորդող հերթափոխումների պայմաններում։

Յուրաքանչյուրի հոտառությունը տարբեր է։ Ցանկացած տեսակի ուժեղ բույր կարող է տհաճ լինել հյուրերի համար։ Դիանան ասում է, որ սպիտակեցնող, օդը թարմացնող կամ այլ լուծույթներով հոտերը թաքցնելու փորձերը սովորաբար ձախողվում են։

Դիանան առաջարկում է՝ 

• Բացել պատուհանները, քանի դեռ աշխատում եք, երբ եղանակը դա թույլ է տալիս։
• Միացրած թողնել օդամաքրիչը երկու-երեք ժամով, ինչը կօգնի չեզոքացնել ավելի ուժեղ հոտերը։
• Ցողել ջրով բացված, թեթև, բազմաֆունկցիոնալ ախտահանիչ միջոց բազմոցների, վարագույրների և գորգերի հյուսվածքի մեջ։

«Ես փորձում եմ օգտագործել հիմնականում բուսական հիմքով մաքրող միջոցներ, որոնք նուրբ են»,- ասում է Դիանան։ «Դրանք ավելի թանկ են, բայց լավ ներդրում են։ Ես այնքան շատ հաճոյախոսություններ եմ ստացել այն մասին, թե ինչ թարմ հոտ է գալիս տնից»։

Լրացուցիչ մանրուքները կարող են մեծ ազդեցություն ունենալ հյուրերի վրա։ Դիանան խորհուրդ է տալիս երեք բան էլ անել՝ հիանալի տպավորություն թողնելու համար։

• Համալրեք պաշարները։ Սա ներառում է սպասքի օճառը, ձեռքի օճառը, մարմնի գելը, շամպունը և օդորակիչը։ Եթե տրամադրում եք մեկանգամյա օգտագործման որևէ բան, օրինակ՝ ամանների սպունգ, թողեք նորը՝ իր փաթեթավորմամբ։
• Կարգի բերեք տան պարագաները։ Կոկիկ դասավորեք հեռակառավարման վահանակները, դեկորատիվ բարձերը և իրերը, որոնք պահվում են դարակներում և պահարաններում, օրինակ՝ վարսահարդարիչը կամ կաթսաներն ու թավաները։
• Ավելացրեք դեկորատիվ ծալքեր։ Եռանկյունաձև ծալեք զուգարանի թղթի և թղթե սրբիչների եզրերը, ինչպես անում են շքեղ հյուրանոցում։

«Ես նույնիսկ աղբի տոպրակներն եմ գեղեցիկ ծալում»,- ասում է Դիանան։ «Հյուրերը նկատում են չնչին մանրամասները. դա ապացույցն է այն բանի, որ իրականում մարդ է ամեն ինչ նախապատրաստում»։

Մտածեք համահյուրընկալող կամ հավաքարար ավելացնելու մասին, որը կօգնի հասնել ձեր մաքրման նպատակներին։ Լրացուցիչ աջակցությունը կարող է ձեր հյուրերի հերթափոխումներն ավելի արդյունավետ դարձնել և ձեզ օգնել հյուրերին հինգ աստղանի փորձառություններ մատուցելու հարցում։

Դիանա Կրուզը և նրա ամուսինը պատկերված չեն։

Այս հոդվածում պարունակվող տեղեկությունները կարող են փոխված լինել հրապարակումից հետո։