Ներառական գործելակերպեր, որոնք կօգնեն յուրաքանչյուր հյուրի զգալ ինչպես տանը

Airbnb-ի միջոցով հյուրընկալելիս համաձայնում եք ձեր տարածքը բացել աշխարհի տարբեր երկրներից ժամանող մարդկանց առաջ, իսկ ներառականությունը հյուրընկալման հիմքն է։

Հաջողության հասնելու համար պետք է հասկանալ, թե ինչպես օգնել տարբեր ծագում ունեցող մարդկանց իրենց հարմարավետ և ապահով զգալ ձեր տանը։ Որպես համայնք՝ մենք պարտավորվում ենք ընդունել ցանկացած ռասայի, դավանանքի, ազգային ծագման, էթնիկական պատկանելության, հաշմանդամության, սեռի, գենդերային ինքնության, սեռական կողմնորոշման և տարիքի հյուրերի՝ հարգանքով և առանց քննադատության կամ կողմնակալության։

Ներառականությունը կարևոր գործոն է հյուրընկալելիս։ Սա նշանակում է.

• Ընդունել և ողջունել բոլոր հյուրերին՝ անկախ իրենց ծագումից

• Հավասար մոտեցում ցուցաբերել և բավարարել հյուրերի կարիքները

• Կապ ստեղծել՝ տարբերություններից և նմանություններից անկախ

• Ազատ մտածելակերպ որդեգրել և պատրաստակամ լինել հյուրերին հարցեր տալու, որպեսզի պարզեք այցի ընթացքում նրանց կարիքները

Airbnb-ն հավաքել է հյուրընկալողների, հյուրերի և փորձագետների մտքերը, որպեսզի կարողանաք ներառական գործելակերպերը ընդգրկել ձեր հյուրընկալման առօրյայում և ջերմ հյուրընկալություն ապահովեք յուրաքանչյուր հյուրի համար։ Հայտարարությունը կարգավորելուց մինչև կարծիք թողնելը՝ այս խորհուրդ տրվող գործողությունները կարող են նվազեցնել թաքնված կողմնակալությունը և ստեղծել լավ հարաբերություններ։

Տեղեկացնելով, որ ողջունում եք բոլոր տիպի մարդկանց՝ կարող եք օգնել պատմականորեն մարգինալացված համայնքների հյուրերին իրենց հանգիստ զգալ և ամրագրել ձեր տարածքը։ Հյուրերի հետ խոսելով՝ իմացանք, որ այս համայնքների մարդիկ հայտարարություններում անկանխակալության ազդանշաններ են փնտրում նախքան ամրագրելը։

Ահա թե ինչ կարող եք անել՝ ցույց տալու, որ դուք ներառական հյուրընկալող եք.

• Պարզ հասկացրեք ձեր հայտարարության նկարագրության առաջին մի քանի նախադասություններում, որ ողջունում եք ամեն տեսակի ծագման ու մշակույթի մարդկանց (օրինակները՝ ստորև)։

• Ճշգրտորեն նկարագրեք ձեր սեփականության հարմարությունները հատուկ կարիքներով անձանց համար և թարմացրեք լուսանկարները։

• Ձեր պրոֆիլում ավելացրեք դերանուններ, որպեսզի հյուրերն իմանան՝ ինչպես դիմել ձեզ։ Դրանով ոչ միայն ցույց կտաք, թե ինչպես եք ցանկանում, որ դիմեն ձեզ, այլև կհասկացնեք, որ ձեզ համար կարևոր է նաև հյուրերի նախասիրությունն այդ հարցում։

• Միացրեք ակնթարթային ամրագրումը, որպեսզի հյուրերն առանց նախնական հաստատման ամրագրեն ձեր տարածքը։ Սա նաև ազդարարում է, որ կարող եք հյուրընկալել բոլոր նրանց, ովքեր համապատասխանում են ամրագրման չափանիշներին։

• Առաջարկեք նախնական հաստատումներ և խրախուսեք այն հյուրերին, որոնք ամրագրելուց առաջ ձեզ հետ կապ են հաստատում։ Մենք պարզել ենք, որ հյուրերն ամրագրելուց առաջ երբեմն դիմում են հյուրընկալողներին, որպեսզի տեսնեն, թե արդյոք իրենց կընդունեն։

• Նախքան կմերժեք հյուրի ամրագրման հայտը, լավ խորհեք պատճառի շուրջ։ Կկարողանայի՞ք դա դեմառդեմ բացատրել հյուրին։

Կարող եք օգտվել ներառական ձևակերպումներից, որոնք այլ հյուրընկալողներ օգտագործում են իրենց հայտարարություններում։ Մենք խոսել ենք Հյուրընկալողների խորհրդի անդամների հետ, որոնք բերեցին հետևյալ օրինակները.

1. Սան Ֆրանցիսկոյից Փիթերը գրում է. «Իմ տունն ապահով տարածք է բոլոր փոքրամասնությունների և մարգինալ խմբերի համար։ Ողջունում եմ բոլոր ռասաների, հավատքների, գենդերների և սեռական կողմնորոշումների հյուրերին»։

2. «Իմ հայտարարության երկրորդ լուսանկարում պատկերված է հուշարձան, որի վրա գրված է՝ You belong»,- ասում է Շինյան՝ Ճապոնիայի Օսակա քաղաքից։ Շինյան ներկայացնում է նաև մեկ այլ լուսանկար, որտեղ ասվում է. «Ես հարգում եմ բազմազանությունը և անկանխակալությունը»՝ այդպես արտահայտելով հյուրընկալողի դիրքորոշումը։ Սա կարող եք գրել նաև մակագրում։

Ձեր տարածքի ամրագրումից հետո ջերմ և հյուրընկալ հաղորդագրություն ուղարկեք հյուրերին։ Առանց որևէ ենթադրության ապրումակցում արտահայտելը մեծ նշանակություն ունի։

• Անհատականացրեք ձեր ողջույնի հաղորդագրությունը՝ օգտվելով հյուրի պրոֆիլի տեղեկություններից։ Այն կարող է ներառել հարցեր նրա հետաքրքրությունների, հայրենի քաղաքի և հոբբիների մասին։

• Ձեր հյուրերի մասին խոսելիս օգտագործեք գենդերային և սեռական կողմնորոշման առումով չեզոք ձևակերպումներ։ Ավելի լավ է խուսափեք ինչ-որ մեկի գենդերային կամ հարաբերությունների կարգավիճակի մասին ենթադրություններ անելուց։

• Եթե հյուրը հարցնում է հատուկ կարիքներով անձանց համար հարմարությունների մասին, անպայման պատասխանեք նրա հարցերին և հարցրեք, թե էլ ինչ կարող է պահանջվել։

Եթե ոգեշնչման կարիք ունեք, օգտվեք այլ հյուրընկալողների՝ հյուրերին ուղղված հաղորդագրություններից։ Ահա երկու օրինակ՝

1. Իռլանդիայի Ֆալկառա քաղաքում հյուրընկալող Մայքլն ասում է, որ իր համար կարևոր է հենց սկզբից փոխըմբռնում ապահովելը։ «Ես միշտ շնորհակալություն եմ հայտնում հյուրերին՝ մեր տարածքում մնալու հայտ ներկայացնելու համար»,- ասում է նա։ «Հետո նշում եմ, որ կկապվեմ իրենց հետ այցից առաջ, մաղթում եմ հաճելի օր և [ասում նրանց], որ, եթե այդ ընթացքում որևէ բան պետք լինի իրենց, առանց վարանելու դիմեն ինձ»։

2. Դենվերցի Սյուզանը գրում է. «Մեր տունը ձեր տունն է։ Հարմարավետ զգացեք։ Ձերը դարձրեք այս տարածքը։ Եթե կուզենայիք կիսվել որևէ բան բարելավելու գաղափարներով, մեզ տեղյակ պահեք»։

Հյուրերը, հատկապես նրանք, ովքեր պատմականորեն մարգինալացված համայնքներից են, համակարծիք են, որ այս ամենը կարող է օգնել ավելի սպասված զգալ իրենց.

• Հնարավորություն տվեք ինքնուրույն ժամանելու , եթե կարող եք, բայց հարցրեք հյուրերին, թե արդյոք գերադասում են հյուրընկալողի ներկայությամբ ժամանումը։
• Առանց անհրաժեշտության մի այցելեք հյուրերին։ Փոխարենը՝ հարգեք նրանց անձնական տարածքի իրավունքը և հստակ նշեք, որ հասանելի եք (անձամբ կամ վիրտուալ կերպով), եթե ունենան ձեր կարիքը։

Կարծիքները Airbnb համայնքի վստահելիության հիմքն են։ Հյուրերի մասին կարծիք թողնելով՝ կարող եք ցույց տալ ձեր երախտագիտությունը և ապահովել կառուցողական հետադարձ կապ։

• Օգտվեք միևնույն ստանդարտներից, երբ գնահատում եք յուրաքանչյուր հյուրի։

• Հնարավորության դեպքում հյուրընկալեք նրանց, ովքեր նորեկ են Airbnb-ում, և կարծիք հայտնեք նրանց այցից հետո։ Կարծիքը հյուրերին շատ կօգնի ապագա ամրագրումներ անելիս։

• Խրախուսեք հյուրերին՝ թողնելու կարծիքներ։ Մենք պարզել ենք, որ պատմականորեն մարգինալացված համայնքների ճանապարհորդները նախքան ամրագրելը հաճախ կարդում են կարծիքները՝ պարզելու, թե արդյոք իրենց նման այլ հյուրեր լավ են զգացել տարածքում։

Անպայման հետևեք այս ներառական գործելակերպերին, հատկապես եթե սկսնակ եք հյուրընկալության ոլորտում։ Հիշեք, որ ցանկացած հյուրի ողջունելիս ամենակարևորը նրան հարցեր տալն է իր կարիքների մասին և շփման հնարավորությունը բաց պահելը։

Դուք կարող եք անկանխակալ լինել՝ պարզապես հարցնելով ձեր հյուրերին, թե ինչ է նրանց պետք ձեր տարածքում հարմարավետ և սպասված զգալու համար։ Եվ գուցե դրանով հյուրերի համար հեշտացնեք իրական կյանքում ձեր դուռը բացելը և ձեր տարածքում հիանալի ժամանակ անցկացնելը։