Հատուկ կարիքներ ունեցող հյուրեր ընդունելու վերաբերյալ խորհուրդներ

Շատ Airbnb հյուրեր ունեն հատուկ կարիքներ։ Սահմանափակ շարժունակությամբ մարդիկ երբեմն օգտագործում են քայլասարքեր կամ անվասայլակներ, և նրանք ուզում են նախքան ամրագրելն իմանալ, թե որքանով է ձեր տարածքը հարմար իրենց։

Քանի որ հյուրերը հաճախ որոնումները զտում են ըստ հատուկ հարմարությունների, տարածքի հնարավորությունների ցուցադրումը կարող է նպաստել, որ ձեր հայտարարությունը հայտնվի որոնման ավելի շատ արդյունքներում, և մեծանա ամրագրման հավանականությունը։

Airbnb-ի նոր «Հարմարեցված» կատեգորիան ընդգրկում է տներ, որոնք հարմար են անվասայլակով տեղաշարժվող անձանց համար․ չունեն դեպի մուտք և առնվազն մեկ ննջասենյակ և լոգասենյակ տանող աստիճաններ։ Ձեր հայտարարության մեջ ավելացրեք հատուկ կարիքներով անձանց համար նախատեսված բոլոր հարմարությունները, որոնք կան ձեր տարածքում, և եթե ձեր տարածքը համապատասխանում է պահանջներին, այն կարող է ընդգրկվել այս նոր կատեգորիայում։

Վերևի տեսանյութում հայտնվող հեռուստահաղորդավարուհին՝ հաշմանդամների իրավապաշտպան Սոֆի Մորգանը, դարձել է Airbnb հյուրընկալող, քանի որ ուզում էր իր հատուկ նախագծված տունը տրամադրել իր պես ճանապարհորդներին։ «Ես շատ ջանք եմ գործադրել, որպեսզի իմ տունը հասանելի լինի ինձ համար»,- ասում է նա։ «Գիտեմ, որ այն հարմար կլինի նաև այլ մարդկանց, հատկապես՝ հաշմանդամություն ունեցողների համար, ուստի ուզում եմ կիսվել դրանով»։

Սոֆին գիտակցում է, որ հատուկ կարիքներ ունեցող անձանց համար դժվար է ճանապարհորդելը, բայց փորձում է թույլ չտալ, որ դա խանգարի իրեն տեսնել աշխարհը։ «Ես անվասայլակից օգտվում եմ արդեն մոտ 19 տարի»,- ասում է նա։ «Աշխարհը հարմարեցված չէ հաշմանդամություն ունեցող անձանց համար, բայց ճանապարհորդելու համար, ամեն դեպքում, արժե ջանք գործադրել»։

Ահա որոշ ցուցումներ, թե ինչպես ստեղծել գրավիչ տարածք, որը կարող են վստահորեն ամրագրել հատուկ հարմարությունների կարիքներ ունեցող հյուրեր։

Հարմարությունները, որոնք կօգնեն ձեր տարածքին աչքի ընկնել, ներառում են՝

• հատուկ կարիքներով անձանց համար հարմարություններ ունեցող կայանատեղ
• դեպի տարածքի մուտք տանող անցուղիների լուսավորություն
• հյուրերի շքամուտք տանող հարթ անցուղի
• հյուրերի հարթ շքամուտք
• առանց աստիճանների մուտքեր դեպի սենյակներ
• առնվազն 81.28 սանտիմետր լայնությամբ շքամուտքեր
• հարթ հատակով ցնցուղարան
• զուգարանի և (կամ) ցնցուղարանի բռնաձողեր
• ցնցուղարանի կամ լոգարանի աթոռ
• առաստաղի կամ շարժական ամբարձիչներ
• լողավազանի ամբարձիչ

Ինչպես հայտարարության մեջ ավելացնել հարմարություններ հատուկ կարիքներով անձանց համար

Վերևի տեսանյութում Սոֆին առաջարկում է «հնարավորինս շատ լուսանկարներ» ավելացնել։ Դրանք կօգնեն հատուկ կարիքներ ունեցող հյուրերին հասկանալ, թե արդյոք ձեր տունը հարմար է իրենց։

Որպեսզի վստահ լինենք, որ հայտարարությունները պատրաստ են հատուկ կարիքներ ունեցող հյուրերի համար, հյուրընկալողներին խորհուրդ ենք տալիս մակագրություններ ավելացնել լուսանկարներին։ Օրինակ՝ կարող եք լուսանկարել լոգասենյակ՝ ամրացված բռնաձողերով, և հյուրերին տեղեկացնել, որ դա հատուկ կարիքներով անձանց համար նախատեսված միակ լոգասենյակն է տանը։

Տարբեր անկյուններից լուսանկարներ արեք՝ հյուրերին օգնելու հասկանալ՝ արդյոք ձեր տարածքը համապատասխանում է իրենց կարիքներին։ Օրինակ՝ ավելացրեք հատուկ կարիքներով անձանց համար հասանելի ավտոկայանատեղի լուսանկարներ, որոնցում հստակ երևում է դրա տեղադրությունը ձեր տան նկատմամբ։

Airbnb-ն ստուգում է հատուկ կարիքներով անձանց համար բոլոր հարմարությունների համապատասխանությունը լուսանկարչական ուղեցույցներին՝ նախքան հարմարությունները ձեր հայտարարության մեջ ավելացնելը։ Եթե լուսանկարը հստակորեն ցույց չի տալիս հարմարությունը, մենք կարող ենք խնդրել ձեզ վերբեռնել նոր լուսանկար կամ հեռացնել հարմարությունը ձեր հայտարարությունից։

Մանրամասներ հատուկ հարմարությունների լուսանկարման մասին

Եթե հյուրը հատուկ հարմարությունների կարիք ունի, ամրագրումից առաջ մի քանի հարց տալով՝ կարող է հասկանալ՝ արդյոք ձեր տարածքը հարմար է իրեն։

Ահա թե ինչպես կարող եք սկսել զրույցը․

• Տարածքի վերաբերյալ կոնկրետ հարցեր ունե՞ք
• Ինչպե՞ս կարող եմ ավելի հարմարավետ դարձնել ձեր այցը

Նախքան հատուկ կարիքներ ունեցող հյուրի ժամանումը մտածեք, թե էլ ինչ կարող եք անել ձեր տարածքում տեղաշարժվելը հեշտացնելու համար։ Ահա որոշ գաղափարներ․

• տեղափոխեք կահույքը, օրինակ՝ աթոռները և սեղանները, որպեսզի տեղաշարժման համար ավելի ընդարձակ տարածքներ ստեղծեք բնակելի մակերեսներում
• ապահովեք վարդակների հասանելիությունը
• կենցաղային իրերը՝ սրբիչները, սպասքը և այլն, դրեք հեշտ հասանելի տեղերում

Ինչպես ավելի հասանելի դարձնել տարածքը

Ուղեցույցը ձեր հնարավորությունն է՝ հյուրերին տալու խորհուրդներ, որոնց միջոցով արտացոլվում է ձեր հյուրընկալությունն ու ձեր քաղաքը։ Ռեստորանների, տեսարժան վայրերի և բացօթյա միջոցառումների վերաբերյալ առաջարկություններ ավելացնելիս փորձեք մտածել հատուկ կարիքներ ունեցող ճանապարհորդի պես։

Օրինակ՝ պարզեք, թե որ ռեստորաններն ունեն թեքահարթակներ, նշեք սալարկված հետիոտնային արահետները և կիսվեք հասարակական տրանսպորտի մասին տեղեկություններով։ Հյուրընկալման առօրյայում այս խորհուրդները կիրառելով՝ դուք կարող եք ձեր տարածքը գրավիչ դարձնել ավելի մեծ լսարանի համար։