Ինչպես ապահովել ներառական հյուրընկալություն և պայքարել կողմնակալության դեմ

Airbnb-ն կարծում է, որ ճանապարհորդությունները կարող են օգնել խթանել շփումը և կառուցել ավելի բաց և անկանխակալ աշխարհ։ Խտրականությունը լուրջ խոչընդոտ է այդ շփման ճանապարհին, այդ իսկ պատճառով շատ կարևոր է պայքարել դրա դեմ։

Որպեսզի հյուրընկալողներն ու հյուրերը հասկանան, թե ինչ է կողմնակալությունը, և հաղթահարեն դրանից բխող խտրականությունը, Airbnb-ն համագործակցում է ականավոր սոցիալական հոգեբանների՝ Հարվարդի համալսարանից դոկտոր Ռոբերտ Վ. Լիվինգսթոնի և Լորենսի համալսարանից դոկտոր Փիթեր Գլիկի հետ։ Այս հոդվածում ներկայացված խորհուրդներն ու լավագույն գործելակերպերը ոգեշնչվել են նրանց ուսումնասիրություններից և գիտելիքներից։

«Կողմնակալությունը» վերաբերում է անձի նկատմամբ ունեցած զգացմունքներին կամ ենթադրություններին, որոնք հիմնված են այնպիսի հատկանիշների վրա, ինչպիսիք են ռասան, կրոնը, ազգային ծագումը, էթնիկական պատկանելությունը, հաշմանդամությունը, սեռը, գենդերային ինքնությունը, սեռական կողմնորոշումը և տարիքը։ «Խտրականությունն» անձի նկատմամբ անարդարացի վերաբերմունքն է, որը հիմնված է նրա հատկությունների վրա։ Կողմնակալությունը միշտ չէ, որ խտրականության է հանգեցնում, սակայն սովորաբար ընկած է դրա հիմքում։

Կողմնակալությունը հիմնականում ենթագիտակցական մակարդակում է, այդ պատճառով այն հաճախ կոչվում է «թաքնված կողմնակալություն»։ Թաքնված կողմնակալությունը կարող է ազդել մարդկանց նկատմամբ մեր վերաբերմունքի վրա և ստիպել մեզ խտրական վերաբերմունք ցուցաբերել` երբեմն նույնիսկ անգիտակցաբար։

Գենդերային դերերը խորապես արմատավորվել են հասարակության մեջ և (երբեմն մեր գիտակցությունից անկախ) ազդում են այլ մարդկանց արարքների ընկալման և գնահատականի վրա։ Գենդերային կարծրատիպերը լուրջ հետևանքներ են ունենում ԼԳԲՏ համայնքի (լեսբի, գեյ, բիսեքսուալ, տրանսգենդեր, կասկածող, քվիր) ներկայացուցիչների վրա, քանի որ նրանց սեռական կողմնորոշումը մարտահրավեր է նետում հասարակության նորմերին:

Կարևոր է հիշել, որ ուրիշների հանդեպ հյուրընկալություն ցուցաբերելը բնավ չի նշանակում նրանց տեսակետների կամ ապրելակերպի ընդունում, և այն չպետք է կախված լինի գենդերային հարցերի կամ ԼԳԲՏ համայնքի նկատմամբ ձեր ունեցած դիրքորոշումից։

Կողմնակալությունը դրսևորվում է նաև կարծրատիպերի միջոցով։ Կարծրատիպն այս կամ այն տեսակի անձնավորության մասին ամրացած, սակայն պարզեցված կամ չափազանցված կարծիք է։ Գրեթե բոլորն ունեն որոշակի կարծրատիպեր՝ անկախ նրանից նկատում են դա, թե ոչ: Սոցիալական խմբերի կարծրատիպացումը հաճախ հանգեցնում է խտրական վարքի՝ ոչ դիտավորյալ վիրավորանքներից մինչև անարդարության դրսևորման ծայրահեղ դեպքեր։

Խտրականությունը հակասում է Airbnb-ի հիմնական արժեքներին և արգելված է մեր հարթակում։ Դա վերահսկելի է և խուսափելի, նույնիսկ եթե բխում է թաքնված կողմնակալությունից։

Ներկայացնում ենք որոշ քայլեր, որոնց հետևելով՝ յուրաքանչյուր հյուրընկալող կարող է պայքարել կողմնակալության դեմ և օգնել ստեղծել ավելի անկանխակալ համայնք.

• Արտահայտվեք։ Ձեր պրոֆիլում նշեք, որ ձեր դուռը բաց է բոլորի առջև։ Սա ոչ միայն հայտնում է հյուրերին այն մասին, որ նրանք սպասված են, այլև կարող է ոգեշնչել այլ հյուրընկալողների՝ ընդունելու բազմազանության արժեքները և դրսևորելու անկանխակալություն։
• Բոլորի համար օգտագործեք միևնույն չափանիշները։ Հավանական հյուրերին գնահատեք օբյեկտիվորեն։ Օրինակ՝ ամսաթվերը հարմա՞ր են ձեզ։ Կարո՞ղ եք տեղավորել ժամանող հյուրերի քանակը։ Եթե ձեր չափանիշները փոփոխվում են՝ կախված իրավիճակից, հնարավոր է, որ որոշում կայացնելիս կողմնակալություն եք դրսևորում։
• Որոշումներ կայացրեք գիտակցաբար։ Հյուրին ընդունելուց կամ մերժելուց առաջ փորձեք անկեղծ գտնվել ինքներդ ձեզ հետ և հասկանալ, թե ինչու եք նման որոշում կայացրել՝ հիմնվելով ձեր սահմանած չափանիշների վրա։ Կկարողանայի՞ք հյուրին դեմ առ դեմ բացատրել նրան մերժելու պատճառը։
• Հրաժարվեք կարծրատիպերից։ Թաքնված կողմնակալությունից ազատվելու ապացուցված եղանակներից մեկն ինքնազարգացմամբ զբաղվելն ու մտահորիզոնը լայնացնելն է։ Դուրս եկեք ձեր հարմարավետության գոտուց և հանդիպեք տարբեր ծագում ունեցող կամ տարբեր համայնքներ ներկայացնող մարդկանց։ Ընդունեք Airbnb հյուրերի, որոնք պատկանում են սոցիալական տարբեր շերտերի։ Բարիդրացիական հարաբերությունները և սոցիալական փոխազդեցությունը կարող են նվազեցնել կողմնակալությունը։

Ինչ անել, որպեսզի յուրաքանչյուր հյուր իրեն զգա ինչպես տանը

Այս հոդվածում պարունակվող տեղեկությունները կարող են փոխված լինել հրապարակումից հետո։