Հյուրընկալողին օգնեք գրավիչ դարձնել հայտարարությունը

Կիսվեք հյուրընկալումից ստացած ձեր գիտելիքներով՝ հիանալի հայտարարություն կազմելու համար։ Աշխատեք հյուրընկալողի հետ՝ նոր հայտարարություն ստեղծելու կամ եղածը թարմացնելու համար։

Հյուրերը, որպես կանոն, ամրագրման վերաբերյալ որոշում կայացնելիս առավել կարևորում են տարածքի լուսանկարները, նկարագրությունը և հյուրերի կարծիքները։* Կենտրոնացեք այս գործոնների, ինչպես նաև հարմարությունների և գների վրա, որպեսզի ստեղծեք հաջողություն բերող հայտարարություն։

Օգտատերերի հետազոտությամբ պարզվել է, որ բարձրորակ պատկերները գլխավոր գործոններից են, որոնց հիման վրա հյուրերը որոշում են, թե որ տարածքն ամրագրեն։ Եթե հյուրընկալողը չունի իր տարածքի՝ վերջերս արված պրոֆեսիոնալ լուսանկարներ, բացատրեք լուսանկարների կարևորությունը և առաջարկեք որևէ լուսանկարչի կամ Airbnb-ի պրոֆեսիոնալ լուսանկարահանման ծրագիրը։

Հյուրընկալողները պետք է հասկանան, որ նկարագրությունը արդյունավետ հայտարարության ամենաարժեքավոր տարրերից մեկն է։ Կալիֆոռնիայի Փալմ Սփրինգս քաղաքում համահյուրընկալող Ջիմին ասում է, որ «տարածքի յուրաքանչյուր նկարագրություն կարելի է օպտիմալացնել», ուստի միշտ առաջարկում է օգնել հյուրընկալողներին գրել իրենց տարբերակը։

«Ես կենտրոնանում եմ փաստերի վրա»,- ասում է Ջիմին։ «Դուք կա՛մ ունեք ծովի ջրով լողավազան, կա՛մ չունեք։ Համայնքը մասնավոր է կամ մասնավոր չէ։ Շատ ածականներ արտահայտում են զգացմունքներ, որոնք սուբյեկտիվ են և չեն հանգեցնում ճշգրիտ նկարագրության։ Պատկերն ստացվում է փաստեր գրելով»։

Հյուրերը հաճախ զտում են արդյունքները, որպեսզի գտնեն իրենց ուզած հարմարություններով տարածքներ։ Ամենաշատ որոնվող հարմարություններից են լողավազանը, Wi-Fi-ը, անվճար կայանատեղին, խոհանոցը, ջակուզին, օդորակիչը, լվացքի մեքենան և ինքնուրույն ժամանումը։**

Մտածեք, թե ինչն է արդյունավետ եղել ձեր հյուրընկալած տարածքներում, և ձեր գիտելիքներով կիսվեք հյուրընկալողների հետ։ Օրինակ՝

• Համոզվեք, որ նրանց տարածքում չեն բացակայում առաջարկվող հարմարությունները
• Բացատրեք հարմարություններ, օրինակ՝ Wi-Fi կամ սմարթ կողպեք, ավելացնելու կամ արդիացնելու արժեքավորությունը։
• Բերեք օրինակներ, թե ինչպես են հյուրերն արձագանքել ձեր աջակցած այլ տարածքներում կատարված արդիացումներին
• Հյուրընկալողների հետ ուսումնասիրեք անվտանգության սարքերն ու հատուկ հարմարությունները՝ պարզելու, թե ուրիշ ինչ կարելի է ավելացնել նրանց տարածքում

Հնարավոր է՝ հյուրընկալողները փորձ չունենան գնանշման հարցում։ Ցուցումներ տալու համար կարող եք օգտագործել տեղացու ձեր գործիմացությունը և Airbnb-ի գնանշման գործիքները։ Ռազմավարությունները կարող են ներառել.

• շաբաթական կամ ամսական զեղչի սահմանում
• մաքրման կամ տնային կենդանիների վճարների նվազեցում կամ հեռացում
• մեկ գիշերվա գնի ճշգրտում՝ սեզոնային պահանջարկից կախված

Միասին ընտրեք մոտեցում և որոշեք վերահսկման ձեր շրջանակները։ Անգլիայի Կոռնուոլ քաղաքում համահյուրընկալող Դոմինիկն առաջարկում է մշտապես ճշգրտել մեկ գիշերվա գինը։

«Ամեն շաբաթ կամ երկու շաբաթը մեկ ես ստուգում եմ սեփականությունները»,- ասում է նա։ «Եթե դրանք արագ են ամրագրվում, դա նշանակում է, որ կարելի է բարձրացնել գինը։ Բայց եթե մարդիկ դիտում են և չեն ամրագրում, ապա հավանական է, որ սահմանված գինը չափազանց բարձր է»։

Շատ հյուրեր իրենց կարիքներին համապատասխանող հայտարարությունը գտնելու համար կարդում են կարծիքները։ Հյուրընկալողներին օգնեք հասկանալ, որ կարծիքներին պատասխանելը հնարավորություն է ցույց տալու հյուրերին, որ կարևորում եք նրանց փորձառությունը և բաց եք առաջարկների համար։

Որոշեք, թե ով է պատասխանելու հյուրերի կարծիքներին։ Եթե հյուրընկալողը նախընտրում է անձամբ զբաղվել դրանցով, կարող եք տիպային պատասխաններ տրամադրել տարբեր տեսակի կարծիքների համար։

• Շնորհակալություն հայտնեք հյուրերին. «Շնորհակալություն ձեր կարծիքի համար։ Մենք իսկապես գնահատում ենք, որ ժամանակ հատկացրիք՝ ձեր ուղևորության մասին մտքեր հայտնելու համար»։
• Պատմեք բարելավումների մասին. «Ցավում ենք, որ մահճակալներն անհարմար էին։ Քնի որակը կարևոր է, ուստի մենք ավելացրել ենք ներքնակերեսներ»։

«Ես չեմ ակնկալում, որ որևէ հյուրընկալող կունենա 100%-անոց անթերի կարծիքներ»,- ասում է Էնդրյուն՝ մի հյուր, որը նաև սուպերտանտեր է Բեռլինում։ «Ես շատ ավելի տպավորված եմ նրանցից, ովքեր լրջորեն են վերաբերվում քննադատական կարծիքներին»։

Չմոռանաք թարմացնել տարածքի նկարագրությունն ու լուսանկարներն ամեն անգամ, երբ դուք կամ հյուրընկալողը բարելավումներ եք անում տարածքում։

*Ըստ Airbnb-ի՝ 2023 թվականի նոյեմբերին և դեկտեմբերին Ավստրալիայում, Բրազիլիայում, Կանադայում, Ֆրանսիայում, Գերմանիայում, Մեքսիկայում, Հարավային Կորեայում, Իսպանիայում, Միացյալ Թագավորությունում և Միացյալ Նահանգներում մոտ 7 000 հյուրերի շրջանում անցկացրած հետազոտության։

**Ըստ Airbnb-ի ներքին տվյալների, որոնցով չափվել են 2024 թվականի հունվարի 1-ից մինչև հունիսի 30-ն ամբողջ աշխարհում ամենահաճախ որոնված հարմարությունները։

Համահյուրընկալողների ցանցը գործում է Ֆրանսիայում, Իսպանիայում, Իտալիայում, Գերմանիայում, Միացյալ Թագավորությունում, Ավստրալիայում, Մեքսիկայում (աջակցվում է Airbnb Global Services Limited-ի կողմից), Կանադայում, Միացյալ Նահանգներում (աջակցվում է Airbnb Living LLC-ի կողմից) և Բրազիլիայում (աջակցվում է Airbnb Plataforma Digital Ltda-ի կողմից)։

Այս հոդվածում պարունակվող տեղեկությունները կարող են փոխված լինել հրապարակումից հետո։