Շփում Սենյակների հյուրերի հետ

Որոշ հյուրեր Սենյակներ են ամրագրում Airbnb-ում, քանի որ նոր մարդկանց հանդիպելը նրանց համար հաճույք է, իսկ մյուսները նախընտրում են մեկուսանալ։ Որքանո՞վ եք սիրում շփվել։ Հյուրերին այդ մասին տեղեկացրեք հայտարարության կարգավորումներում։

Հայտարարության կարգավորումներում ընտրեք անձնական շփման այս չորս նախասիրություններից որևէ մեկը․

• Սիրում եմ շփվել և ժամանակ անցկացնել հյուրերի հետ։

• Սիրում եմ անձամբ դիմավորել և ողջունել հյուրերին, բայց ընդհանուր առմամբ նախընտրում եմ մեկուսանալ։

• Ես անձամբ հասանելի չեմ լինի և նախընտրում եմ շփվել հավելվածի միջոցով։

• Նախասիրություն չունեմ։ Կառաջնորդվեմ իմ հյուրերի ցանկություններով։

Կարող եք նաև տարածքի նկարագրության մեջ հստակ մանրամասներ գրել, օրինակ՝ հյուրի այցի ընթացքում օգնություն առաջարկելու համար սովորաբար որ ժամերին եք հասանելի։

Ռիչարդը, որը հյուրընկալում է Տորոնտոյի կենտրոնում գտնվող Սենյակում, սիրում է իր տան դռները բացել հյուրերի առջև։ «Հյուրերին պետք է ոչ միայն պատեր և տանիք առաջարկել»,- ասում է նա,- այլև նրանց հետ բովանդակալից զրույց վարել, լինել անմիջական և լսել մարդկանց»։

Երբ հյուրերը ժամանում են, Ռիչարդը նրանց դիմավորում է մուտքի դռան մոտ և շրջայց է կատարում տարածքում։ «Կարծում եմ՝ կյանքում բոլորս մարդկային գործոն ենք փնտրում»,- ասում է նա։ «Ես նրանց թույլ եմ տալիս օգտվել ամեն ինչից՝ պատշգամբից մինչև մանղալ, որպեսզի իրենց զգան ինչպես տանը»։

Ռիչարդը նաև հյուրերին հաճույքով ցույց է տալիս քաղաքը։ «Ես սիրում եմ պարզել նրանց հետաքրքրությունները»,- ասում է նա։ «Այնուհետև առաջարկում եմ, որ թույլ տան ներկայացնել սովորական քաղաքային շրջագայությունից դուրս որոշ առանձնահատկություններ։ Ըստ իս՝ ճամփորդությունը կյանքի դասագիրքն է»։

Ավստրալիայի Փերթ քաղաքում հյուրընկալող Ռութը սիրում է ողջունել հյուրերին։ Այնուհետև նրանց ցույց է տալիս Սենյակը, որը բաղկացած է երեք ննջասենյակից, երկու առանձին լոգասենյակից և հյուրասենյակից։

Կարճ շրջայցից հետո Ռութը մենակ է թողնում հյուրերին։ Տան՝ հյուրերին տրամադրված հատված նա գնում է միայն լվացք անելիս։

«Կարծում եմ՝ սկզբնական հանդիպումն առանցքային է»,- ասում է Ռութը։ «Որոշ մարդիկ ընդհանրապես չեն ուզում շփվել, ոմանք էլ՝ հակառակը․ վերջիններս պարզապես սքանչելի են։ Դա անսպասելիորեն հաճելի է»։

Բրազիլիայի Մասեյո քաղաքում Հյուրընկալողների խորհրդի անդամ Դանդարան նախընտրում է թույլ տալ հյուրերին որոշել, թե որքան են ցանկանում շփվել։ Նա ասում է, որ իր տունը ցույց տալու ընթացքում փորձում է հասկանալ, թե որքան հաղորդակցվող են նրանք։

Նա շրջայցը միշտ ավարտում է պատշգամբում, որտեղից ցույց է տալիս իր սիրած վայրերը և պատասխանում ցանկացած հարցի։ Նա պարզել է, որ հյուրերը ժամանակի ընթացքում ավելի ազատ են զգում իրենց։ Ոմանք նույնիսկ այնքան մտերիմ են դառնում, որ այժմ «ընտանիքի մաս են կազմում»։

Դանդարան կարծում է, որ ինքն ու իր հյուրերը հակված են նախաճաշի սեղանի շուրջ շփվելու։ Ամենքը մի փոքր բան է բերում, օրինակ՝ միրգ և տորթ։ «Հենց այսպես էլ ստեղծվում է այդ կախարդական կապը»,- ասում է նա։

Այս հոդվածում պարունակվող տեղեկությունները կարող են փոխված լինել հրապարակումից հետո։