Պլանավորված հաղորդագրությունների օգտագործում ժամանակ խնայելու նպատակով

Պլանավորված հաղորդագրությունների գործիքն օգնում է անհրաժեշտ պահերին, օրինակ՝ ժամանման օրը, ավտոմատ կերպով կարևոր տեղեկություններ փոխանցել հյուրերին։ Այն թույլ է տալիս ստեղծել ստանդարտ հաղորդագրություններ և պլանավորել դրանք այն ժամանակ, երբ հյուրերը, ամենայն հավանականությամբ, կցանկանան ստանալ այդ տեղեկությունները։

Նաև կարող եք ստեղծել արագ պատասխաններ՝ կարճ ձևանմուշներ, որոնք օգտագործվում են հաճախ տրվող հարցերին պատասխանելու և հյուրերի հետ հաղորդակցվելիս ժամանակ խնայելու համար։

Հաղորդագրություններ գրելու և պլանավորելու համար ձեր «Հաղորդագրություններ» ներդիրում բացեք հաղորդագրությունների կարգավորումները։

Կարող եք անհատականացնել այս հաղորդագրությունները՝ զետեղելով կարճ կոդեր։ Այս տեղապահները տեղեկություններ են հավաքում ինչպես ձեր հայտարարությունից, այնպես էլ հյուրի ամրագրումից, օրինակ՝ տան կանոնները, հյուրի անունը և ժամանման ամսաթիվը։ Համոզվեք, որ ձեր հայտարարության մանրամասներն ամբողջական և արդիական են, քանի որ չլրացված կարճ կոդերով հաղորդագրությունները պատշաճ կերպով չեն ուղարկվի։

Կարճ կոդերը կարող եք ներմուծել բացվող ընտրացանկից։ Երբ վերջացնեք գրելը, պլանավորեք հաղորդագրությունը՝ ընտրելով, թե հյուրի որ գործողությունն է ակտիվացնելու հաղորդագրության ուղարկումը։ Անհրաժեշտության դեպքում կարող եք հաղորդագրությունը փոփոխել, բաց թողնել կամ ուղարկել նախատեսվածից շուտ։

Ահա թե ինչպես կարող եք օգտագործել կարճ կոդեր պլանավորված հաղորդագրության մեջ.

Հարգելի, [հյուրի անունը]։

Շնորհակալություն ամրագրման համար։ Մենք ուրախ ենք ձեզ դիմավորելու հետևյալ ամսաթվին՝ [ժամանման ամսաթիվը]։ Խնդրում ենք տրամադրել ձեր ուղևորության տեղեկությունները, որպեսզի կարողանանք կազմակերպել առանց խնդիրների ժամանում (սովորաբար՝ [ժամանման ժամը]-ին կամ ավելի ուշ)։

Ահա որոշ հակիրճ տեղեկություններ տարածքի մասին․ [թաղամաս]

Ահա մի քանի խորհուրդներ տեղ հասնելու համար. [տրանսպորտ]

[քաղաք] այցելելու համար օգտակար խորհուրդներ կարող եք գտնել մեր ուղեցույցում, որն այստեղ է՝ [ուղեցույց]։ Ձեր ուղևորությունից մի քանի օր առաջ կուղարկենք ժամանման վերաբերյալ տեղեկությունները։ Հարցեր ունենալու դեպքում դիմեք մեզ։

Կարող եք ցանկացած պահի պլանավորել հաղորդագրություն։ Դիտարկեք այս պահերը՝ կարևոր տեղեկություններ ուղարկելու համար, երբ հյուրերը դրա կարիքն ունեն։

• Ամրագրումից կարճ ժամանակ անց․ անմիջապես շնորհակալություն հայտնեք ամրագրումից հետո՝ տեղեկացնելով հյուրերին, որ ստացել եք նրանց հայտը, և տրամադրեք մանրամասներ ու խորհուրդներ առաջիկա այցի վերաբերյալ։
• Նախքան ժամանումը․ հյուրերին հիշեցրեք իրենց առաջիկա այցի մասին, որպեսզի կարողանան պլանավորել ժամանումը։ Այս հաղորդագրությունները կարող եք պլանավորել ժամանումից ոչ ուշ, քան 14 օր առաջ։
• Ժամանման օրը․ թեև դուք, հնարավոր է, վերջերս եք կիսվել ժամանման վերաբերյալ ցուցումներով, շատ հյուրեր օգտակար են համարում ժամանման օրը կրկին ստանալ հիմնական տեղեկությունները։
• Այցի առաջին օրը․ կապվեք հյուրերի հետ և հաստատեք, որ ամեն ինչ կարգին է, ինչպես նաև առաջարկեք պատասխանել նրանց բոլոր հարցերին։
• Մեկնումից մեկ օր առաջ․ շնորհակալություն հայտնեք այցի համար և հիշեցրեք կարծիք հայտնելու մասին։

Այս հոդվածում պարունակվող տեղեկությունները կարող են փոխված լինել հրապարակումից հետո։