Ձևավորեք ակնկալիքներ՝ նշելով ճշգրիտ տեղադրությունը

Տարածքի տեղադրությունը կարող է մեծ դեր խաղալ հյուրերի կողմից ամրագրման որոշում կայացնելու հարցում։ Իսկ երբ հյուրերն ամրագրեն, նրանց անհրաժեշտ է ձեր տարածքի ճշգրիտ գտնվելու վայրը՝ սահուն ժամանման համար։

Կարևոր է, որ Airbnb-ի ձեր հայտարարության մեջ ցույց տաք ճշգրիտ տեղադրությունը։ Նաև լավ կլինի նման տեղեկություն տրամադրել ձեր տարածքի նկարագրության մեջ։ «Իմ տարածքի նկարագրության մեջ ես նկարագրում եմ, թե որտեղ է տունը»,- ասում է Ջուլիետը, որը Հյուրընկալողների խորհրդի անդամ է Քենիայի Նայրոբի քաղաքում։

Հասցեն փոփոխել կարելի է միայն մինչև առաջին ամրագրումն ընդունելը։ Դրանից հետո օգնության համար պետք է դիմեք համայնքի աջակցման թիմին։

Մանրամասները երբեք ավելորդ չեն, երբ ժամանումից առաջ անհրաժեշտ է հյուրերին ուղղորդել դեպի ձեր տարածք։ Ջուլիետը հյուրերին փոխանցում է իր տարածքի GPS կոորդինատները։ Նա ասում է, որ նաև ճշգրիտ մանրամասներ է տրամադրում, օրինակ՝ ինչ գույնի է դարպասը, և ինչ է գրված դրա վրա։

Ջուլիետը հասանելի է մնում նաև ժամանման ընթացքում, քանի որ հյուրերը կարող են դժվարություն ունենալ տարածքը գտնելիս։ «Քանի որ նրանք ունեն մեր կոնտակտները, սովորաբար զանգահարում են մեզ ցանկացած հարցով»,- ասում է նա։

Հայտարարության նկարագրության մեջ կարող եք լրացուցիչ տեղեկություններ ավելացնել, օրինակ՝ մանրամասներ թաղամասի և կայանատեղիի վերաբերյալ։ Այդ մանրամասների և քարտեզի օգնությամբ հյուրերը կիմանան՝ ինչ ակնկալել, և ավելի վստահորեն կամրագրեն։

Դուք կարող եք ընտրել, թե ինչպես ցուցադրվի ձեր գտնվելու վայրը Airbnb-ի որոնման արդյունքներում․

• Գտնվելու մոտավոր վայրը․ ձեր տարածքի քարտեզը ցույց է տալիս շրջակա տեղանքը՝ հասցեից մոտավորապես կես մղոն (1 կմ-ից պակաս) շառավղով։
• Ստույգ տեղը․ ձեր տարածքի քարտեզը ցույց է տալիս նշիչ մոտակա խաչմերուկի վրա, բայց այն չի նշում ճշգրիտ տեղը։ Կարող եք քարտեզը քաշել այնպես, որ նշիչը ճիշտ տեղում հայտնվի։

Հյուրերը չեն իմանա ձեր փողոցը և տան համարը, քանի դեռ ամրագրումը հաստատված չէ։ Ըստ կանխադրված կարգավորման՝ նշվում է գտնվելու մոտավոր վայրը։

Եթե հյուրերը դժվարանում են գտնել ձեր վայրը, հարակից տարածքում ավելացրեք փողոցի համարները կամ լավացրեք լուսավորությունը։

Երբեմն գուցե ստիպված լինեք մի փոքր ստեղծագործել։ «Մեր հողածեփ տները դժվար է գտնել»,- ասում է Քեշավը, որը Հյուրընկալողների խորհրդի անդամ է Հնդկաստանի Նյու Դելի քաղաքում։ «Փողոցի կառուցվածքը մի փոքր այլ է։ Իսկապես ինչ-որ մեկը պետք է, որ ուղեկցի ձեզ»։

Քեշավը լուծումներ էր փնտրում, թե ինչպես հյուրերի համար հեշտացնի առանց օգնության ժամանումը։ «Մենք սկսեցինք մտածել, թե ինչպես կարող ենք ցուցանակ տեղադրել գլխավոր փողոցում՝ մի փոքր տախտակ, որը մշտական տեղադրված կլինի»,- ասում է նա։

Հայտարարության մանրամասները՝ ներառյալ գտնվելու վայրը, նպաստում են հյուրերի ակնկալիքների ձևավորմանը և պատասխանում են նրանց հարցերին՝ օգնելով հասկանալ, թե արդյոք տարածքը հարմար է իրենց։ Այդ տեղեկությունները հյուրերին կօգնեն ավելի վստահորեն ամրագրել, իսկ ձեզ՝ խուսափել բացասական կարծիքներից։

Օրինակ՝ հյուրերը գուցե ցանկանան իմանալ մոտավոր հեռավորությունը մինչև մոտակա տարանցիկ կանգառը կամ համոզվել, որ սեփականությունը հենց լողափի կողքին է։ Ստույգ տեղը որոնման արդյունքներում ցույց տալու դեպքում ձեր տարածքը կարող է ավելի գրավիչ դառնալ։

Մյուս կողմից, նշելով գտնվելու մոտավոր վայրը՝ կարող եք վերահսկել գաղտնիությանը և անվտանգությանն առնչվող հարցերը։ Որոնման արդյունքներում ձեր տարածքի շրջակայքը ցույց տալու դեպքում և՛ դուք, և՛ հյուրերը կարող եք ավելի հանգիստ լինել։