Գրեք տան ուղեցույց՝ ձեր տարածքի վերաբերյալ տեղեկություններով կիսվելու համար

«Ինչպե՞ս միանամ Wi-Fi-ին։ Որտե՞ղ է թերմոստատը։ Ո՞ր հեռակառավարման վահանակն ինչ է անում»։ Սրանք ընդամենը մի քանի հարցեր են, որոնք հյուրերը կարող են ունենալ ձեր տարածքում մնալիս։ Կարող եք Airbnb-ի տան ուղեցույց գործիքի միջոցով օգնել նրանց ստանալ պատասխաններ և ապահովել, որ ձեր տան կենցաղային տեխնիկան և այլ իրեր ճիշտ օգտագործվեն։

Տան ուղեցույցը թույլ է տալիս հստակ, քայլ առ քայլ ցուցումներ տրամադրել հյուրերին և ասել, թե որտեղ կարող են գտնել կարևոր իրերը, օրինակ՝ անվտանգության սարքերը կամ Wi-Fi-ի երթուղավորիչը։ Մեկ անգամ ստեղծեք ուղեցույց, և ստիպված չեք լինի յուրաքանչյուր ամրագրման համար վերաշարադրել կամ նորից ուղարկել էլեկտրոնային նամակներ։ Եվ քանի որ այն հասանելի է հյուրերին անմիջապես հավելվածից, նրանք կարող են ծանոթանալ դրան ցանկացած պահի, ցանկացած վայրում։ Կալիֆոռնիա նահանգի Մաունթին Վյու քաղաքում հյուրընկալող Նեյլին դուր է գալիս, թե ինչպես է այդ գործառույթն օգնում իրեն խուսափել «ուշ գիշերային SMS-ներից, խելահեղ զանգերից և ամենակարևորը՝ վատ կարծիքներից»։

Առավելագույնս օգտվեք տան ուղեցույցի գործիքից՝ ականջալուր լինելով ձեզ պես հյուրընկալողների փորձված խորհուրդներին։

Սա հյուրերի ամենաառաջին հարցերից է լինում ժամանելիս, ուստի շատ հյուրընկալողներ այն դնում են տան ուղեցույցի ամենասկզբում։ «Բոլորը հարցնում են Wi-Fi-ի գաղտնաբառը, ուստի դա իմ հնարքն է՝ նրանց բացել տալու տան ուղեցույցը, և հուսով եմ՝ կարդալու այն»,- ասում է Նորվեգիայի Թրոմս քաղաքից Մարիթ Էննը։

Wi-Fi-ի գաղտնաբառի հեշտ հասանելիությունը հատկապես օգտակար էհեռավոր աշխատողների համար, որոնց ձեր տարածք ժամանելուն պես կարող է պետք լինի միանալ որևէ վիրտուալ ժողովի, նամակ ուղարկել կամ ավարտել հաշվետվությունը։

Փողոցում կայանելու կանոններն ու նշանները կարող են շփոթեցնող լինել, հատկապես եթե հյուրերն այլ լեզվով են խոսում։ Լավ կլինի հստակ ցուցումներ տրամադրել, ինչպես արել են Նոր Զելանդիայի Վելինգտոնում հյուրընկալող Բենը և Անգելը. «Կարող եք կայանել մերձատար ճանապարհի աջ կողմում՝ սպիտակ ցանկապատի մոտ, բնական ցանկապատի մոտակայքում»։

Եթե ձեր տարածքում ընդունում եք տնային կենդանիներ կամ երեխաներ, օգտակար կլինի նշել նրանց ընդունելու համար նախատեսված բոլոր հարմարությունները, հատկապես կարող եք ձեր տան ուղեցույցով կիսվել հյուրերի հետ նախքան նրանց ժամանումը, որպեսզի հյուրերը կարողանան նախապես պլանավորել։ Ուղեցույցում կարող եք՝

• Նկարագրել, թե որտեղ են գտնվում տնային կենդանիների սննդի և ջրի համար նախատեսված ամանները
• Նշել, թե որ սրբիչներն են կեղտոտ ոտքերի և թաթերի համար
• Նշել երեխաների համար առկա հարմարությունները, օրինակ՝ օրորոց կամ բարձր մանկական աթոռակ
• Նշել, թե որ սենյակներում կան ծխի և շմոլ գազի ազդանշանային սարքեր

Երկար ճանապարհորդությունից հետո դժվար է գտնել և օգտվել տան հիմնական պարագաներից։ Սան Ֆրանցիսկոյում հյուրընկալող Ջոն և Ջիանն առաջարկում են այս օրինակները.

• «Ջեռուցում. թերմոստատը պատի վրա է, հեռուստացույցի մոտ։ Դուրս գալիս չմոռանաք անջատել այն։
• Զուգարան. որևէ այլ բան մի նետեք զուգարանակոնքը՝ բացի զուգարանի թղթից։ Մնացած ամեն ինչի համար կա փոքրիկ աղբարկղ։
• Խոհանոցային իրեր. սպասքը և բաժակները կարելի է գտնել միկրոալիքային վառարանի երկու կողմում գտնվող վերին պահարաններում։ Սեղանի սպասքը վառարանի ձախ կողմում գտնվող դարակում է, իսկ թավաները՝ պահարանում։ Անհրաժեշտության դեպքում անկաշկանդ օգտվեք դրանցից՝ ձեր համեղ կերակուրը պատրաստելու համար։ Ավարտելուց հետո կարող եք կեղտոտ ամանները դնել ամանալվաց մեքենայի մեջ։ Երբ մեքենան լիքը լինի, մենք այն գործի կգցենք»։

Այն հյուրընկալողները, որոնք չեն բնակվում տարածքում կամ դրա մերձակայքում, խորհուրդ են տալիս ներառել նաև աղբի, ջրի և շրջանին հատուկ այլ մանրամասների վերաբերյալ ցուցումներ.

• «Աղբ. ձեր աղբը նետեք նկուղում գտնվող 125 լիտրանոց աղբամանը։ Մի թափեք դրսում կամ մուտքի մոտ, որտեղ թռչունները, ջրարջը և այլ արարածներ կարող են մտնել դրա մեջ»,- Քիմ, Ափսոն, Վիսկոնսին
• «Ջուր և հոսանք. խնամքով օգտագործեք ջուրը և հոսանքը։ Տաք ջուրը սահմանափակ է»,- Ֆրեդ, Պլաչենսիա, Բելիզ

Ըստ հյուրընկալողներ Ջոյի և Ջիանի՝ մանրամասն ցուցումները կարևոր են։ Ահա թե ինչպես են նրանք նկարագրում իրենց հոսքային հեռարձակման ծառայություններից օգտվելը.

«Ինչպես միանալ Netflix-ին, Prime Video-ին և այլ հոսքային ծառայությունների.

1. Միացրեք ննջարանի հեռուստացույցը և մի փոքր սպասեք։ Այս ընթացքում կտեսնեք միայն «ձյուն» տիպի խանգարումներ։
2. Մեկ րոպե անց սեղմեք բազմագույն շեղանկյունաձև կոճակը։
3. Ընտրեք այն հավելվածը, որին ցանկանում եք միանալ, և սեղմեք հիմնական կոճակը։ Netflix դիտելու համար հրավիրում ենք օգտվելու հյուրի հաշվից, որը ստեղծել ենք հենց ձեզ համար»։

Շատ հյուրընկալողներ շեշտում են տան ուղեցույցը կարճ և ըստ էության գրելու կարևորությունը։ «Դուք չեք ուզում, որ հյուրերն ունենան այնպիսի զգացողություն, կարծես իրենք պետք է ականապատ դաշտով անցնեն՝ հյուրընկալողին գոհացնելու համար»,- ասում է հյուրընկալող Թինան Կանադայի Նանաիմո քաղաքից։ «Գտեք ձեր կարիքների և հյուրերին ձեր տանն իրենց լավ զգալ տալու ճիշտ համադրությունը»։

Ձեր տան ուղեցույցը գրելուց հետո մտածեք տարածքում ինչ-որ մի տեղ Wi-Fi-ին միանալու հստակ ցուցումների լամինացված ու հեշտ մաքրվող ցուցանակ տեղադրելու մասին։ Դա ևս մեկ միջոց է՝ տեղեկությունը հյուրերին հեշտությամբ մատչելի դարձնելու համար։ Եվ ամեն անգամ կոգեշնչի հիանալի կարծիքներ գրելու։

Ինչպես ավելացնել տան ուղեցույց