Հայտարարության վերնագիրը գրելու ցուցումներ

Հայտարարության վերնագիրն առաջիններից է, որ հյուրերը կարդում են որոնման արդյունքներում, և այն հնարավորություն է տալիս ընդգծելու, թե ինչն է յուրահատուկ դարձնում ձեր տարածքը։ Հետևեք արդյունավետ վերնագիր գրելու այս ցուցումներին, որպեսզի ձեր հայտարարությունն աչքի ընկնի որոնման արդյունքներում, առաջացնի ձեր տարածքն ամրագրելու հետաքրքրվածություն և ակնկալիքներ ձևավորի հյուրերի համար։

Հյուրերն Airbnb-ում որոնումներ են կատարում՝ օգտագործելով տարբեր չափերի էկրաններով ամեն տեսակի սարքեր։ Վերնագիրը, որը նորմալ է դիտվում համացանցային դիտարկիչում, կարող է չափազանց երկար լինել բջջային հավելվածում հայտարարություններն աչքի անցկացնող հյուրերի համար։

32 նիշով սահմանափակումն օգնում է ապահովել վերնագրի ամբողջական ցուցադրումը սեղանադիր համակարգչում և շարժական սարքերում։

Ահա հայտարարությունների կարճ վերնագրերի երեք լավ օրինակ.

• Քաղաքի կենտրոնին նայող մոդեռն լոֆթ

• Լեռնային անկյուն խոհարարների համար

• Լողափնյա վիլլա Անյո Նուևոյի մոտ

Եթե վերնագիրը 32 նիշից ավելի երկար է, ամենակարևոր տեղեկությունները տեղավորեք սկզբում։ Երկար վերնագրերն ավտոմատ կրճատվում են որոնման արդյունքներում, իսկ վերնագրի մնացած մասը փոխարինվում է կախման կետերով։ Օրինակ՝ «Գյուղական տնակ լճի տեսարանով, խարույկատեղով, նավակի կառանատեղով» վերնագիրը որոնման արդյունքներում դառնում է «Գյուղական տնակ լճի տեսարանով...»։

Նախադասության միայն առաջին բառի սկզբնատառը մեծատառով գրելու կանոնը նշանակում է, որ պետք է մեծատառ լինի վերնագրի միայն առաջին բառի առաջին տառը։ Այն ավելի հեշտ է կարդացվում և ավելի ընկալելի է, քան նախադասության բառերի մեծ մասի սկզբնատառերը կամ ԲՈԼՈՐ ԲԱՌԵՐԸ մեծատառերով գրելու տարբերակում։

Հյուրերի համար ավելի արդյունավետ որոնում ապահովելու նպատակով խուսափեք վերնագրի այլ բառերում մեծատառերի օգտագործումից, եթե դա հատուկ գոյական չէ, օրինակ՝ քաղաքի անվանում։ Դուք կարող եք նաև բացառություններ անել հապավումների համար, օրինակ՝ ՄԹ (Միացյալ Թագավորության համար) կամ օդանավակայանի կոդ, ասենք՝ LHR։

Ահա հայտարարությունների վերնագրերի երեք լավ օրինակ, որտեղ նախադասության միայն առաջին բառի սկզբնատառն է մեծատառով գրված.

• Ծովամերձ հյուղ՝ Բոնդի լողափում

• Վիկտորիանական ոճի ռոմանտիկ հյուրասենյակ

• Էկոլոգիապես անվնաս ստուդիա LAX-ի մոտ

Էմոջիներն ու սիմվոլները կարող են շփոթեցնող կամ մոլորեցնող լինել, քանի որ դրանք տարբեր բաներ են նշանակում աշխարհի տարբեր մարդկանց համար։ Օրինակ՝ բութ մատը կարող է մեկնաբանվել որպես հաստատման նշան, «մեկ» թիվ կամ վիրավորական ժեստ։

Տարածքը ներկայացրեք պարզ և նկարագրական բառերով, որպեսզի ձեր հայտարարության վերնագիրը լինի ավելի ընկալելի և հրապուրիչ։ Հատուկ նշանների (օրինակ՝ !, # կամ *) օգտագործումը լավ է, բայց շեշտելու նպատակով դրանց կրկնությունը (!!! կամ ***)՝ ոչ։ Գաղափարները տարանջատելու համար օգտագործեք ստորակետեր բացատներով կամ մեկ շեղագիծ՝ առանց բացատների։

Ահա մի օրինակ, թե ինչ չպետք է անել.

• ****Դահուկավարության և գոլֆի հնարավորություններով շալե****!!!

Ավելի լավ է գրել այսպես.

• Դահուկավարության/գոլֆի շալե և մասնավոր բակ

Շատ դեպքերում պետք չէ կրկնել որոնման արդյունքներում հյուրերին արդեն իսկ տրամադրված որևէ տեղեկություն, օրինակ՝ քաղաքի կամ քաղաքատիպ ավանի անվանումը կամ մահճակալների ընդհանուր քանակը։ Փոխարենը՝ հայտարարության վերնագիրն օգտագործեք ուշադրություն գրավող ուրույն մանրամասներ ավելացնելու նպատակով։

Օրինակ, եթե ձեր տարածքը գտնվում է Բուենոս Այրեսում, կարելի է հայտարարության վերնագրում ներառել թաղամասը, ասենք՝ «Ռեկոլետա»։ Եթե այն գտնվում է Իտալիայի Ֆլորենցիա քաղաքում, կարող եք նշել «Ուֆֆիցիի մոտակայքում» կամ ձեր տարածքին մոտ գտնվող մեկ այլ տեսարժան վայր։ Կամ, եթե դուք ունեք հատուկ գրասենյակային տարածք, կարող եք վերնագրում նշել «հարմար է գործնական ուղևորությունների համար»։ Սա օգնում է հստակեցնել հյուրերի համար կարևոր մանրամասները։

Նաև կարելի է նոր հայտարարության վերնագրից բաց թողնել «նոր» բառը, քանի որ այս տեղեկությունն արդեն հյուրերին ներկայացված է որոնման արդյունքներում նշանակի միջոցով։

Կարդացեք Airbnb-ի՝ բովանդակության նկատմամբ կիրառվող քաղաքականությունը

Այս հոդվածում պարունակվող տեղեկությունները կարող են փոխված լինել հրապարակումից հետո։