Airbnb-ի միջոցով հյուրընկալելու հիմունքները

Մարդիկ սկսում են Airbnb-ի միջոցով հյուրընկալել բազմաթիվ դրդապատճառներով, օրինակ՝ գումար վաստակելու և աշխարհի տարբեր մասերից եկած ճանապարհորդների հետ ծանոթանալու։ Կարող եք հյուրընկալել նաև ցանկացած տեսակի ազատ տարածքում՝ լինի դա մի ամբողջ տուն, ազատ սենյակ, թե հյուրատուն։ Ահա մի քանի բան, որ պետք է անեք սկսելու համար։

Առաջին քայլերից մեկը, որ պետք է անեք, ձեր հայտարարության կարգավորումն է։ Ճշգրտորեն նկարագրեք ձեր տարածքը, ներկայացրեք յուրահատկությունները և հստակ ակնկալիքներ սահմանեք հյուրերի համար։ Սա հյուրերին գրավելու և ամրագրումներ ստանալու ձեր հնարավորությունն է։

• Լուսանկարներ․ վերբեռնեք յուրաքանչյուր սենյակի՝ տարբեր դիտանկյուններից արված մի քանի լուսանկար, որպեսզի հյուրերին ցույց տաք, թե ինչից կարող են օգտվել։ Արհեստական բանականությամբ աշխատող գործիքը կօգնի լուսանկարները դասավորել սենյակ առ սենյակ և ստեղծել վիրտուալ շրջայց։ Ավելացրեք յուրաքանչյուր սենյակի վերաբերյալ մանրամասներ, օրինակ՝ քնելու պայմաններ և հատուկ հարմարություններ։

• Վերնագիր և նկարագրություն․ փորձեք ներկայացնել, թե ինչ պետք է հյուրերն իմանան ձեր տարածքի մասին։ Ձևակերպումները պետք է լինեն անկանխակալ, որպեսզի պարզ լինի, որ հյուրերի միջև խտրականություն չեք դնում։

• Հարմարություններ․ ընտրեք տարբերակների նախնական ցանկից։ Ձեր հայտարարությունը հրապարակելուց հետո աչքի անցկացրեք հարմարությունների ամբողջական ցանկը և ավելացրեք այն ամենը, ինչ ունեք։ Ներառեք օգտակար մանրամասներ, օրինակ՝ արդյոք ձեր տարածքն ունի հարմարություններ հատուկ կարիքներով անձանց համար։

• Տան կանոններ. տան կանոնների միջոցով սահմանեք ակնկալիքներ, պոտենցիալ հյուրերին ներկայացրեք ձեր հյուրընկալման ոճը և հայտնեք կարևոր տեղեկություններ (օրինակ՝ ծխելու արգելքի մասին)։

Մեկ գիշերվա գինը սահմանում եք բացառապես դուք։ Առաջարկվող գինը, որը ցուցադրվում է Airbnb Start-ի ընթացքում, հիմնված է մի շարք գործոնների վրա, օրինակ՝ տարածքի տեղադրության, հարմարությունների, հյուրերի հետաքրքրվածության և նմանատիպ տարածքների առկայության։ Կարող եք պահել այդ գինը կամ սահմանել այլ գին, և այն կարող եք փոխել ցանկացած պահի։

Տեղական պահանջարկը հասկանալը կօգնի մրցունակ գին սահմանել ձեր տարածքի համար։ Մոտակայքում ամրագրված նմանատիպ տարածքների միջին գներին ծանոթացեք անմիջապես ձեր օրացույցում։ Կարող եք նաև փորձել մեր Խելացի գնանշման գործիքը, որը պահանջարկի հիման վրա ավտոմատ ճշգրտում է մեկ գիշերվա գինը։

Զեղչերն ու հատուկ առաջարկները կարող են որոշակի իրավիճակներում գրավել հյուրերի։ Այդպիսիք են նոր հայտարարության համար հատուկ առաջարկը, որը մեկ գիշերվա գնի 20% զեղչ է նախատեսում առաջին երեք ամրագրումների համար, ինչպես նաև մեկ շաբաթ և մեկ ամիս տևողությամբ ամրագրումների համար սահմանվող զեղչերը։

Airbnb-ն յուրաքանչյուր հյուրից գումար է գանձում անմիջապես ժամանումից առաջ։ Հյուրընկալման միջոցով վաստակած գումարը ձեզ կուղարկենք յուրաքանչյուր հյուրի պլանավորված ժամանումից մոտ 24 ժամ անց։ Թե երբ միջոցները կհասնեն ձեր հաշվին, կախված է ձեր ընտրած վերջնավճարի եղանակից։

Կախված ձեր գտնվելու վայրից՝ վերջնավճարի եղանակները կարող են տարբեր լինել, օրինակ՝ բանկային փոխանցումներ, PayPal, Western Union, Արագ վճարում և այլն։ Կարող եք վերջնավճարի եղանակը կարգավորել հիմա և ցանկացած պահի փոխել այն։ Իմացեք ավելին այն մասին, թե ինչպես եք վճարում ստանալու հյուրընկալման համար։

Հյուրերն ակնկալում են, որ ձեր տարածքը կլինի մաքուր և հիմնական պարագաներով համալրված։ Նրանք նաև ակնկալում են, որ դուք կկիսվեք օգտակար տեղեկություններով։ Ահա ձեր տարածքը պատրաստելու և արդյունավետորեն հաղորդակցվելու մի քանի եղանակ.

• Ստեղծեք հարմարավետ պայմաններ։ Ավելացրեք հստակ, քայլ առ քայլ ցուցումներ ժամանման և մեկնման վերաբերյալ՝ տրամադրելով ժամանման գործընթացի լուսանկարներ։

• Կապ հաստատեք կարևոր պահերին։ Հյուրերին պլանավորված հաղորդագրություններ ուղարկեք ամրագրման ժամանակ, նախքան ժամանումը, ժամանումից հետո և մեկնումից հետո՝ նրանց տրամադրելով համապատասխան տեղեկություններ։

• Մաքրման հարցում եղեք բծախնդիր։ Կազմեք ստուգացանկ, որը կօգնի կենտրոնանալ ամենահաճախ օգտագործվող տարածքների վրա, միշտ մաքուր պահել բոլոր սենյակները և հեռացնել բծերը, մազերը և կեղտը։

• Ստեղծեք հիմնական պարագաների պաշարներ։ Հյուրերն ակնկալում են, որ ձեր տարածքում կլինեն անհրաժեշտ պարագաներ՝ օճառ, սպիտակեղեն, սրբիչներ և այլն։

• Ավելացրեք մի քանի հավելյալ հարմարություն։ Մտածեք ողջույնի նվեր մատուցելու և ինչ-որ իրեր առաջարկելու մասին, օրինակ՝ էլեկտրական հոսանքի հարմարիչներ և սեղանի խաղեր, որպեսզի ավելի հարմարավետ դարձնեք ձեր տարածքը։