Ինչպես դառնալ շրջակա միջավայրի համար ավելի անվնաս գործունեություն վարող տանտեր

Ամեն ամիս ներկայացնում ենք Հյուրընկալողների խորհրդի վերջին նորությունները և օգնում ենք ձեզ ծանոթանալ խորհրդի անդամների հետ։

Ողջույն,

Ես Աննա Ջոնսն եմ՝ Հյուրընկալողների խորհրդի անդամ և բնապահպանական հանձնաժողովի աշխատանքների կազմակերպիչ։ Վերջին մի քանի ամիսներին մենք հանդիպում էինք Airbnb-ի ղեկավարների հետ, որպեսզի ուսումնասիրենք, թե ինչպես կարող ենք աջակցել հյուրընկալողներին՝ շրջակա միջավայրի համար ավելի անվնաս գործելակերպ յուրացնելու հարցում։

Ես այնքան ուրախ եմ, որ կարող եմ ապրիլի 22-ին՝ Երկրի օրվա տոնակատարության ժամանակ, ավելի մանրամասն խոսել մեր կատարած աշխատանքի մասին։

Բնական է, որ շատ հյուրընկալողներ չգիտեն, թե ինչպես կարելի է սկսել հյուրընկալել՝ հոգալով շրջակա միջավայրի համար անվնաս գործելու մասին։ Այդ մասին շատ տեղեկություններ կան, ինչը հաճախ կարող է կաշկանդել։

Երբ ես ընդգրկվեցի Հյուրընկալողների խորհրդում, իմ նպատակներից մեկն այն էր, որ շրջակա միջավայրի համար անվնաս գործելակերպն ավելի հասանելի դառնա հյուրընկալողներին։ Ես իսկապես հավատում եմ, որ միմյանց աջակցելու ու խրախուսելու դեպքում կարող ենք դրական փոփոխություն արձանագրել։

Ինչ աշխատանքներ ենք տանում այս ուղղությամբ՝ Airbnb-ի հետ.

• Ներկայացնում ենք շրջակա միջավայրի համար անվնաս հյուրընկալությանը վերաբերող նոր շարք. Airbnb-ն սերտորեն համագործակցել է ՄԱԿ-ի շրջակա միջավայրի ծրագրի հետ, որը շրջակա միջավայրի պահպանության հարցերով համաշխարհային առաջատարն է, Բնության համաշխարհային հիմնադրամի հետ, որը բնության պահպանության առաջատար կազմակերպությունն է աշխարհում, ինչպես նաև Հյուրընկալողների խորհրդի՝ բնապահպանական հարցերով զբաղվող հանձնաժողովի հետ՝ ստեղծելու կրթական բովանդակություն հյուրընկալողների համար։ Շարքը ներառում է նոր հոդվածներ, օրինակ՝ շրջակա միջավայրի համար անվնաս հյուրընկալող դառնալու ուղեցույց սկսնակների համար, ինչպես նաև՝ խորհուրդներ հյուրերի հետ կայուն զբոսաշրջությունը խթանելու վերաբերյալ։ Ամբողջ տարվա ընթացքում մենք ընդլայնելու ենք շարքը, այնպես որ հետևեք նորություններին՝ շրջակա միջավայրի պահպանության վերաբերյալ ավելի իմանալու համար։
• Այլ հյուրընկալողների հաջողության պատմությունների ներկայացում. շրջակա միջավայրի համար անվնաս հյուրընկալող լինելու գործելակերպերը կարող են շատ տարբեր լինել՝ կախված բնակության վայրից և այն ամենից, թե ինչ է հասանելի ձեզ։ Մենք կներկայացնենք աշխարհի տարբեր անկյուններում շրջակա միջավայրի համար անվնաս գործող հյուրընկալողների, որպեսզի ցույց տանք, թե ինչ եղանակներով կարող են հյուրընկալողներն ապահովել դա։ Առաջինը սուպերտանտեր Թիֆանին է, որն ունի լողափնյա տնակ Կալիֆոռնիայի Հոլիվուդ Բիչ քաղաքում։
  
• Համագործցություն վերականգնվող էներգիայի ոլորտում. հյուրընկալողների համար վերականգնվող էներգիան ավելի մատչելի դարձնելու համար Airbnb-ն որոշ համայնքներում ուսումնասիրում է «կանաչ» էներգիա մատակարարող ընկերությունների հետ համագործակցության հնարավորությունները։ Շուտով Airbnb-ն փորձնական ծրագիր կմեկնարկի ԱՄՆ-ում, և եթե հյուրընկալողներն այն օգտակար համարեն, մենք կաշխատենք նմանատիպ առաջարկներ կատարել հյուրընկալողների համաշխարհային համայնքին։

Ես այնքան ուրախ եմ ասել, որ սա դեռ միայն սկիզբն է։ Բնապահպանական հանձնաժողովը փնտրում է նոր ուղիներ, որոնք կօգնեն հյուրընկալողներին պահպանել բնությունը և գումար խնայել։ Տարվա ընթացքում ավելի շատ տեղեկություններ կներկայացնենք այս թեմայի շուրջ։

Ուելսի Պեմբրուկշիր շրջանում ծովի կողքին ապրելը մի նոր խանդավառություն արթնացրեց մեջս և ոգեշնչեց՝ վարելու շրջակա միջավայրի համար ավելի անվնաս կենսակերպ։ Ես ուրախ եմ, որ կարող եմ օգնել այլ հյուրընկալողների՝ սկսելու այս ճանապարհը։ Մի փոքր պատմեմ իմ մասին.

Դեռ 2017 թ. ես ու ընտանիքս մտածում էինք, թե ինչպես կարող ենք փոխել մեր կենսակերպը, և ուզում էինք հայտարարություն տեղադրել Airbnb-ում։ Հետո շուկայում հայտնվեց այս գեղեցիկ հին ագարակը, ու մենք սիրահարվեցինք դրան։ Բոլոր տները 1650 թվականի շինություններ են, ուստի առկա է դյութիչ հմայք ու հանգստի զգացողություն։

Այստեղ ոչ միայն բնությունն ու ծովափն են անհավանական։ Հողի հետ կապված և իրենց անելիքը սիրող մարդիկ շատ ոգեշնչող են։ Դա ուղղակի վարակիչ է։ Մեր տեղական համայնքը հյուրընկալման բաղկացուցիչ մասն է՝ սկսած մեր տեղական արտադրության օճառներից մինչև պատերը զարդարող տեղական արվեստը։

Մենք երկու տարածք ունենք. բոլոր փոփոխություններն ու ոճավորումը իմ ու մայրիկիս աշխատանքն են։ Հայրս զբաղվում է սպասարկման աշխատանքներով։ Ամեն ինչը մեր բոլորի թիմային աշխատանքի արդյունքն է։ Այնքան մեծ ներգրավվածություն կա, ու գնալով աճում է բնակավայրի հանդեպ մեր տածած խանդավառությունը։

Ես մշակում եմ շրջակա միջավայրի համար անվնաս հյուրընկալության նկատմամբ մեր մոտեցումը, որն առկա է մեր հայտարարությունների նկարագրություններում։ Այն նաև տպված և փակցված է քոթեջներում, որպեսզի մարդիկ կարողանան կարդալ և տեղեկանալ մեր աշխատանքի մասին։ Մենք նույնիսկ մեր սեփական՝ էկոլոգիապես անվնաս ծառերն ենք աճեցնում, որպեսզի դրանք որպես վառելիք օգտագործենք մեր վառարանների համար։

Ես Airbnb-ի՝ 2019 թ. կազմավորված Մեծ Բրիտանիայի համայնքի խորհրդի հիմնադիր անդամներից մեկն էի և Մեծ Բրիտանիայի բազմաթիվ հյուրընկալողների ու Airbnb-ի թիմի հետ էկոլոգիապես անվնաս հյուրընկալման նախաձեռնություններ եմ անցկացրել։

Բնության հետ կապը հրաշալի էր։ Ես սկսել եմ աշխատել եղանակներին ու ծովի ռիթմին համահունչ, և դա արտացոլվում է այն ամենում, ինչ մենք անում ենք այստեղ։

Շատ մարդիկ այստեղ մնալով վերագտնում են իրենք իրենց և կապը բնության հետ. երբեմն ինձ Կուպիդոն եմ զգում, քանի որ հյուրերը սիրահարվում են Պեմբրուկշիրին և վերադառնում։

Հյուրընկալողների խորհուրդը հաջորդ ամիս կվերադառնա՝ ներկայացնելու ավելի շատ նորություններ խորհրդի ժողովներից։ Մինչ այդ, հույս ունեմ, որ շրջակա միջավայրի համար անվնաս հյուրընկալությանը վերաբերող նոր շարքն օգտակար կլինի ձեզ համար։

Մնաք բարով, (կամ ինչպես Ուելսում ենք ասում՝ «Iechyd da»)

Աննա Ջոնս

Այս հոդվածում պարունակվող տեղեկությունները կարող են փոխված լինել հրապարակումից հետո։