Կայուն զբոսաշրջությանն աջակցելու ուղեցույց հյուրընկալողի համար

Շրջակա միջավայրի համար անվնաս հյուրընկալող դառնալու համար հարկավոր է նաև ներգրավել հյուրերին։ Քանի որ շրջակա միջավայրի մասին հոգ տանելը կարող է նորույթ լինել նրանց համար, լավ կլինի բացատրել, թե ինչպես կարող են կյանքի կոչել այդ սկզբունքները։

Որպեսզի աջակցենք ձեզ շրջակա միջավայրի համար անվնաս ճանապարհորդության մասին հյուրերին տեղեկացնելու հարցում, մենք խորհուրդներ ենք հավաքել հյուրընկալողների համաշխարհային համայնքից և համագործակցել ենքՄԱԿ-ի բնապահպանական ծրագրի հետ, որը շրջակա միջավայրի պաշտպանության հեղինակավոր ջատագով է, ինչպես նաև Բնության համաշխարհային հիմնադրամի հետ,որն աշխարհի առաջատար բնապահպանական կազմակերպությունն է։

Մանրամասներ այն մասին, թե ինչպես կարող եք խրախուսել շրջակա միջավայրի համար անվնաս ճանապարհորդությունները։

Ավտոմեքենայով կարճ ճամփորդություններին բաժին է ընկնում տրանսպորտային արտանետումների երեք քառորդ մասը, ուստի կարևոր է խրախուսել հյուրերին օգտվել հանրային տրանսպորտից։

Նոր վայրերում կողմնորոշվելն այնքան էլ հեշտ չէ։ Օգնեք հյուրերին՝ ուղեցույցում ավելացնելով տեղեկություններ ավտոբուսների, մետրոյի կամ գնացքների երթուղիների և ուղեվարձերի, ինչպես նաև տեսարժան վայրեր և օդանավակայան հասցնող ամենահարմար երթուղիների մասին։ Կարող եք նաև հեծանիվներ տրամադրել հյուրերին կամ խորհուրդ տալ, թե որտեղից կարող են վարձակալել։

Պլաստիկ նյութերը կազմում են աղբի առյուծի բաժինը, և հաճախ դրանք վերամշակման ենթակա չեն։ Քանի որ պլաստիկ նյութերն այդքան վնասակար են մոլորակի համար, կարևոր է հնարավորության դեպքում խուսափել դրանք գնելուց։

Որպեսզի հյուրերն այցի ընթացքում պլաստմասե տուփերով ապրանք չգնեն, սուպերտանտեր Թիֆանին Կալիֆոռնիայի Հոլիվուդ Բիչ քաղաքից հյուրերի օգտագործման համար տրամադրում է բազմակի օգտագործման իրեր, ինչպիսիք են բաժակները և ջրի շշերը։ Թայլանդի Չիանգմայ քաղաքի սուպերտանտեր Նուտը հյուրերին տեղեկացնում է, թե դրսում զբոսնելիս որտեղ կարելի է շշերը ջրով լցնել։

Բազմակի օգտագործման ափսեներ, սպասք և սննդի պահեստավորման տարաներ ունենալով՝ հյուրերը կարող են բացօթյա ճաշկերույթներ կազմակերպել՝ առանց ավելորդ աղբ կուտակելու։

Ձեր տան ուղեցույցում կամ ուղեցույցում տեղեկացրեք հյուրերին ձեր նախընտրած էկոռեստորանի, գյուղատնտեսական շուկայի կամ էկոլոգիապես մաքուր տեղական արտադրանք վաճառող խանութի մասին։ Նաև տեղեկացրեք հյուրերին ձեր տարածքում առկա սեզոնային ապրանքների մասին։ «Մեր ուղեցույցում ներառել ենք տեղեկություններ լավագույն ռեստորանների մասին, որոնք հոգ են տանում բնության մասին», - ասում է սուպերտանտեր Աննան Ուելսի Պեմբրուկշիր շրջանից։

Պատմեք տեղական արտադրանքների մասին, որոնք հյուրերը գուցե ցանկանան փորձել կամ տուն տանել որպես հուշանվեր։ Ավստրալիայի Թասմանիա շրջանում հյուրընկալող սուպերտանտեր Մերիդիթը հյուրերի համար տնական մեղր և իր պատրաստած նարդոսի օճառ է նվեր թողնում։

Տան կանոններում կամ տան ուղեցույցում կարող եք հյուրերին խնդրել նվազագույնի հասցնել աղբը, կրճատել ցնցուղ ընդունելու ժամանակը, խմել ծորակի ֆիլտրված ջուր և կայուն պահել թերմոստատի ջերմաստիճանը։ Կարող եք նաև գրառումներ փակցնել պատերին՝ հյուրերին հիշեցնելու մեկնելիս անջատել լույսերը և ատամները լվանալիս ծորակն անընդհատ բաց չթողնել։

Սուպերտանտեր Օմարը Մեխիկոյից տեսանյութեր է ստեղծում, որոնք հյուրերը կարող են դիտել QR կոդով։ Դրանցում նա պատմում է իր բնակարաններում կատարվող վերամշակման գործընթացի և միանգամյա օգտագործման պլաստիկ նյութերի վնասակար ազդեցությունների մասին։

Այս մոտեցումը ձեր գումարը խնայելուց բացի կարող է գրավել հյուրերի, որոնք փորձում են ճանապարհորդելիս հոգ տանել շրջակա միջավայրի մասին։

Աշխարհում շատ տարածաշրջաններ կրում են բնապահպանական խնդիրների հետևանքները․ անտառային հրդեհներ, ջրհեղեղներ և եղանակային ծայրահեղ վատ պայմաններ։ Տան ուղեցույցում նշեք տեղի բնապահպանական խնդիրները և տեղեկացրեք հյուրերին առկա ռիսկերի մասին, ինչպիսիք են օդի աղտոտվածությունը կամ երաշտը։

Օրինակ՝ օդի աղտոտվածության բարձր մակարդակ ունեցող տարածքներում լավագույն որոշումը կլինի խուսափել բացօթյա միջոցառումներից կամ աղտոտմանը նպաստող գործողություններից, ինչպիսիք են մեքենա վարելը, խորոված պատրաստելը կամ հրավառությունը։

Հայտարարության նկարագրության մեջ, ինչպես նաև տան ուղեցույցում տեղեկացրեք հավանական հյուրերին, որ հոգ եք տանում շրջակա միջավայրի մասին։

Եթե հյուրերին տրամադրում եք, օրինակ, կենսաքայքայվող ձեռքի օճառ կամ բազմակի օգտագործման ջրի շշեր, նշեք այդ մասին հայտարարության մեջ։

Այս գաղափարները ձեր հյուրընկալության կարևոր սկզբունքները դարձնելով՝ կարող եք զգալի դեր խաղալ մոլորակի պաշտպանության հարցում և օգնել հյուրերին կյանքին նայել տեղացու աչքերով։ Մենք գիտենք, որ էկոլոգիապես անվնաս գործունեություն ծավալելու սկզբունքների որդեգրումը ժամանակ է պահանջում, ուստի փորձում ենք հնարավորինս շատ ռեսուրսներ տրամադրել ձեզ օգնելու համար։

ԱՌԱՋ․ Իմանալ ավելին այն մասին, թե ինչպես կարող է մեկ սուպերտանտեր սկսել հյուրընկալել՝ առավելապես մտածելով շրջակա միջավայրի պահպանության մասին

*Բնության համաշխարհային հիմնադրամի 60 գործողություն ի բարօրություն Մոլորակի, հրապարակվել է 2021 թ․ մարտի 5-ին

Այս հոդվածում պարունակվող տեղեկությունները կարող են փոխված լինել հրապարակումից հետո։