Ցածր սեզոնին նախապատրաստվելու վեց միջոց
Պատրա՞ստ եք ձեր տարածաշրջանի ցածր սեզոնին։ Ահա Airbnb-ի հյուրընկալման գործիքներից օգտվելու վեց միջոց, որոնք կօգնեն կառավարել ամրագրումները ճամփորդությունների թվի անկումների ժամանակ։ Դիտարկեք յուրաքանչյուրի առավելությունները՝ որոշելու, թե որն է ավելի արդյունավետ ձեր հյուրընկալման բիզնեսի համար։
1. Թույլատրեք կարճաժամկետ այցեր
Ուղևորության նվազագույն տևողության կրճատումը կարող է գրավել կարճաժամկետ այցեր ամրագրող հյուրերին և օգնել լրացնել օրացույցի ազատ ամսաթվերը, երբ մարդիկ այդքան էլ շատ չեն ճանապարհորդում։
Դուք հնարավորություն ունեք ճամփորդության նվազագույն տևողությունը հարմարեցնել ըստ շաբաթվա օրերի։ Օրինակ, եթե հանգստյան օրերին պահանջարկն ավելի բարձր է, կարող եք մեկ գիշեր տևողությամբ այցեր թույլատրել շաբաթվա մեջտեղում, բայց ոչ ամրագրումներ ուրբաթ կամ շաբաթ օրերի համար։
Ուղևորության նվազագույն տևողությունը կրճատելու համար՝
- Բացեք Ազատ ամսաթվեր ներդիրը հայտարարության օրացույցում։
- Ուղևորության տևողություն բաժնում հպեք Այցի նվազագույն տևողություն։
- Ուղևորության նվազագույն տևողությունը փոփոխեք ըստ ձեր հարմարության։
«Եթե ես ութ գիշերվա ազատ տեղ ունեմ, յոթ գիշերվա ամրագրում ստանալու հավանականությունը քիչ է»,- ասում է Ավստրալիայի Նոր Հարավային Ուելս նահանգում Հյուրընկալողների խորհրդի անդամ և սուպերտանտեր Ֆելիսիթին։ «Եթե այդ ժամանակահատվածում կրճատեմ այցի նվազագույն տևողությունը, ավելի շատ հյուրերի գրավելու հավանականությունը կմեծանա»։
2. Կրճատեք նախնական ծանուցման ժամանակը
Թույլ տվեք հյուրերին ցածր սեզոնի ընթացքում ժամանմանը մոտ ամրագրում կատարել, որպեսզի ավելի շատ ամրագրումներ ստանաք։ Կարող եք ընտրել նվազագույն ժամանակահատված՝ ընդհուպ մինչև նույն օրը։ Ամեն ինչ կախված է նրանից, թե որքան ժամանակ է անհրաժեշտ ամրագրման հաստատման և հյուրի ժամանման միջև։
Ժամանումից առաջ նվազագույն ժամանակահատվածը փոխելու համար՝
- Բացեք Ազատ ամսաթվեր ներդիրը հայտարարության օրացույցում։
- Բացեք Նախնական ծանուցում։
- Ընտրեք ձեզ հարմար օրերի քանակը։
Կարող եք նաև թույլատրել ժամանումից առաջ ձեր սահմանած նվազագույն ժամկետից ավելի շուտ ծանուցմամբ հայտեր։ Ձեզ կառաջարկվի ուսումնասիրել և հաստատել այդ հայտերը։
«Սա հիանալի հնարավորություն է ձեր հայտարարությունը մյուսներից առանձնացնելու համար»,- ասում է Կարենը՝ սուպերտանտեր Նելսոնում (Բրիտանական Կոլումբիա)։ «Ես նաև ունեմ ինքնուրույն ժամանում, և օգտագործում եմ պլանավորված հաղորդագրություններ՝ ուղղություններով կիսվելու համար։ Դրա շնորհիվ կարողանում եմ ընդունել ժամանման պահին մոտ ամրագրում կատարող հյուրերին»։
3. Ավելացրեք վերջին պահի զեղչ
Ժամանման ամսաթվի մոտենալուն զուգահեռ մեկ գիշերվա գինը նվազեցնելը կօգնի ձեզ գրավել վերջին պահին ամրագրող հյուրերի։ Օրացույցը լրացնելու և եկամուտը մեծացնելու համար առաջարկեք զեղչ ժամանումից 1-ից 28 օր առաջ կատարված ամրագրումների համար։
Ձեր 60-օրյա այցի միջին գնի 10% կամ ավելի զեղչերի դեպքում հյուրերը ձեր հայտարարության էջում և որոնման արդյունքներում տեսնում են հատուկ նշան։ Զեղչված գինը հայտնվում է սկզբնական գնի կողքին, որի վրա գիծ է քաշված։
Վերջին պահի զեղչ ավելացնելու համար՝
- Բացեք Գնանշում ներդիրը ձեր հայտարարության օրացույցում։
- Լրացուցիչ զեղչեր ներդիրի տակ բացեք Վերջին պահի զեղչեր։
- Մուտքագրեք ժամանմանը նախորդող օրերի քանակը՝ 1-ից մինչև 28։
- Մուտքագրեք տոկոսային զեղչը, որը ցանկանում եք առաջարկել։
«Ինձ հարմար է կրճատել առավելագույնը 15%-ով»,- ասում է Ջիմին՝ սուպերտանտեր Կալիֆոռնիայի Փալմ Սփրինգս քաղաքում։ «Ես ունեմ նվազագույն գին, որից ցածր երբեք չեմ իջեցնի։ Այս հանգստյալ օրերին սպասվող ամրագրման համար ես պատրաստ եմ առաջարկել այդ նվազագույն գինը, որպեսզի ամրագրում ստանամ»։
4. Ավելացրեք շաբաթական և ամսական զեղչեր
Ավելի երկար այցերի համար նախատեսված զեղչերը կարող են օգնել բարելավել ձեր դիրքը որոնման արդյունքներում, լրացնել օրացույցի ազատ ամսաթվերը և կրճատել հերթափոխումները։ Կարող եք շաբաթական զեղչեր առաջարկել յոթ կամ ավելի գիշեր տևողությամբ այցերի համար և ամսական զեղչեր՝ 28 կամ ավելի գիշեր տևողությամբ այցերի համար։
Հյուրերը ձեր հայտարարության էջում և որոնման արդյունքներում տեսնում են հատուկ նշան շաբաթական կամ ամսական 10% կամ ավելի մեծ զեղչերի դեպքում։ Երկարաժամկետ ամրագրման բոլոր զեղչերը նույնպես ընդգծվում են սկզբնական գնի կողքին՝ գնի մանրամասների մեջ։
Շաբաթական կամ ամսական զեղչ ավելացնելու համար՝
- Համոզվեք, որ այցի նվազագույն և առավելագույն տևողությունները համապատասխանում են տեղական կանոններին և կանոնակարգերին։
- Եթե կարող եք առաջարկել շաբաթական կամ ամսական այցեր, բացեք Գնանշում ներդիրը հայտարարության օրացույցում։
- Շաբաթական կամ ամսական զեղչերի տակ սահմանեք տոկոսային զեղչ և հպեք Պահել։
«Շաբաթական կամ ամսական զեղչեր առաջարկելը, անկասկած, ավելի կմեծացնի ձեր հայտարարության հանդեպ ունեցած ուշադրությունը»,- ասում է Մեխիկոյում սուպերտանտեր Օմարը։ «Ես նկատել եմ, որ ավելի ու ավելի շատ ճանապարհորդներ, հատկապես «թվային քոչվորներն», ավելի երկար ժամանակով մնալու համար են գալիս»։
5. Ավելացնել անհատականացված հատուկ առաջարկ
Ցածր սեզոնին ակցիա անցկացնելը որոնման արդյունքներում աչքի ընկնելու և ավելի շատ ամրագրումներ ստանալու հիանալի միջոց է։ Երբ առաջարկում եք 15% կամ ավելի մեծ զեղչեր, հյուրերը ձեր հայտարարության էջում և որոնման արդյունքներում տեսնում են հատուկ նշան։
Անհատականացված հատուկ առաջարկ ավելացնելու համար՝
- Բացեք Գնանշում ներդիրը ձեր հայտարարության օրացույցում։
- Օրացույցում ընտրեք ամսաթվեր։
- Սահմանեք տոկոսային զեղչ։
Անհատականացված հատուկ առաջարկը միշտ չէ, որ հասանելի է ձեր հայտարարության համար։ Պահանջներից է այն, որ տարածքը ունենա նվազագույնը երեք ամրագրում, որոնցից առնվազն մեկը՝ անցած տարվա ընթացքում, և այն, որ ընտրած ամսաթվերը պետք է ազատ եղած լինեն առնվազն 28 օր։
«Ակցիաները թույլ են տալիս առաջիկա մի քանի ամիսների համար գին սահմանել։ Իսկ եթե հյուրերի կողմից հետաքրքրություն չլինի, կարող եմ զեղչեր առաջարկել»,- ասում է Կանարյան կղզիների Տեներիֆե քաղաքում Հյուրընկալողների խորհրդի անդամ Դանիելը։ «Դրանք իմ ամենասիրելի գործիքներից են։ Դրանց միջոցով իմանում եմ առաջարկի և պահանջարկի հարաբերակցությունը և կողմնորոշվում հետագա գործողություններում»։
6. Թարմացրեք գինը
Ձեր տարածաշրջանում նմանատիպ տարածքների գները համեմատելով՝ կկարողանաք մրցունակ գին սահմանել և ստանալ ևս մի քանի ամրագրում, երբ ճանապարհորդությունների թիվը նվազի։ Եթե ձեր գինն ավելի բարձր է, քան մոտակայքում նմանատիպ այլ տարածքների գները, կարող եք այն նվազեցնել, որպեսզի ավելի շատ հյուրերի գրավեք և բարձրացնեք ձեր հայտարարության դիրքը որոնման արդյունքներում։
Եթե բոլոր գիշերների համար նույն գինն եք առաջարկում, մտածեք աշխատանքային և հանգստյան օրերի գներ ավելացնելու մասին։ Նման մոտեցումը ևս օգնում է առավելագույնի հասցնել ամրագրումները։
Նմանատիպ հայտարարությունները համեմատելու համար՝
- Բացեք Գնանշում ներդիրը ձեր հայտարարության օրացույցում։
- Ընտրեք մինչև 31 օր պարունակող ժամանակահատված։
- Հպեք Դիտել նմանատիպ հայտարարություններ։
Ձեր տարածաշրջանի քարտեզի վրա կտեսնեք մոտակայքում գտնվող նմանատիպ տարածքների միջին գները։ Քարտեզի վրայի կոճակները թույլ են տալիս դիտել ամրագրված կամ չամրագրված տարածքները։ Գործոնները, որոնք որոշում են, թե որ տարածքներն են նման, ներառում են տեղադրությունը, մեծությունը, առանձնահատկությունները, հարմարությունները, գնահատականները, կարծիքները և այն հայտարարությունները, որոնք հյուրերը նայում են ձեր տարածքը դիտարկելիս։
«Ես հետևում եմ նմանատիպ հայտարարություններին՝ իմ գինը մրցունակ պահելու համար»,- ասում է Քեթի Քեյը, որը Հյուրընկալողների խորհրդի անդամ և սուպերտանտեր է Կալիֆոռնիայի Լեյք Էռոուհեդ քաղաքում։ «Եթե ցանկանում եք հյուրերի գրավել ոչ պիկ սեզոնին, եղեք ճկուն»։
Գնանշումը և մյուս կարգավորումները միշտ ձեր վերահսկողության տակ են։ Ձեր արդյունքները կարող են տարբերվել։
Հարցազրույցներին մասնակցելու համար հյուրընկալողները վճարվել են։
Այս հոդվածում պարունակվող տեղեկությունները կարող են փոխված լինել հրապարակումից հետո։