Գնի սահմանում երկարաժամկետ այցերի համար

Airbnb-ի միջոցով ամրագրված գիշերների գրեթե մեկ հինգերորդ մասը կազմում են առնվազն 28 գիշեր տևողությամբ այցերը։* Շաբաթական և ամսական այցերի հյուրընկալումը հաճախ ունենում է առավելություններ, օրինակ՝

• զբաղվածության ավելի բարձր ցուցանիշներ և քիչ հերթափոխումներ

• հյուրերի ավելի քիչ հաղորդագրություններ և դրանցով զբաղվելու ավելի քիչ անհրաժեշտություն

• ավելի կայուն եկամուտ, քան կարճաժամկետ այցերի դեպքում

Երկարաժամկետ այցերով հետաքրքրված հյուրերը սովորաբար որոնում են զեղչված գներով տարածքներ։ Հյուրընկալողերը կարող են շաբաթական զեղչ ավելացնել յոթ կամ ավելի գիշեր տևողությամբ ամրագրումների համար, կամ ամսական զեղչ՝ առնվազն 28 գիշեր տևողությամբ ամրագրումների համար։

Այս զեղչերի ավելացումը կարող է բարելավել հայտարարության դիրքը որոնման արդյունքներում, որտեղ ձեր շաբաթական կամ ամսական զեղչն ընդգծվում է սկզբնական գնի կողքին։

Նախքան զեղչ սահմանելը լավ կլինի ծանոթանալ տեղական պահանջարկին։ Եթե հյուրընկալում եք սեզոնային մեծ հոսք ունեցող տարածաշրջանում, մտածեք՝ արդյոք որոշակի ամիսների համար գնի փոփոխումը կարող է նպաստել գնանշման ռազմավարության բարելավմանը։

Կարող եք հաշվի առնել նաև ընթացիկ ծախսերը, օրինակ՝

• Հիպոտեկ կամ վարձակալություն։ Այս գումարը կարող է մեկնակետ ծառայել ձեր շաբաթական կամ ամսական զեղչը սահմանելու համար։

• Կենցաղային ծախսեր։ Այն վճարները, որոնք կատարում եք կոմունալ ծառայությունների (ջուր, գազ, էլեկտրաէներգիա), կանոնավոր գրաֆիկով իրականացվող աշխատանքների (օրինակ՝ մաքրում, այգեգործություն) և հյուրերին տրամադրվող պարագաների (հավելյալ օճառ, հիմնական խոհանոցային պարագաներ և այլն) համար, կարող են ներառվել գնի մեջ։

• Տեխնիկական սպասարկում։ Գումարը, որը ներդնում եք ձեր տարածքի մեջ, որպեսզի այն ավելի հարմարավետ դարձնեք հյուրերի համար՝ վերակառուցումից մինչև նորոգում, կարող է ազդել գնի վրա։

«Երբ հյուրերը վճարում են ձեր մեկ գիշերվա գինը, լավ կլինի հաշվել մեկ ամսում վաստակած գումարը»,- ասում է Նյու Յորքում հյուրընկալող Օլիվերը։ «Այնուհետև կարող եք այդ ընդհանուր գումարին համապատասխան ճշգրտել ամսական զեղչը, ինչը կօգնի պահպանել ավելի հաստատուն եկամուտ»։

Դուք կարող եք զեղչեր ավելացնել օրացույցում՝ գնանշման գործիքների միջոցով։ Վերին աջ մասում ընտրեք կարգավորումների պատկերակը։ «Գնանշում» ներդիրում անցեք դեպի «Զեղչեր» և ընտրեք «Շաբաթական» կամ «Ամսական»։

Կտեսնեք առաջարկվող զեղչ, որը հաշվարկվում է ձեր տարածքի, ինչպես նաև տարածաշրջանում նմանատիպ տարածքների պահանջարկի հիման վրա։ Սահիչը շարժեք 0-ից մինչև 99%, որպեսզի ճշգրտեք զեղչը և հետևեք, թե ինչպես է այն փոխում ձեր շաբաթական կամ ամսական միջին գինը։ Նաև կարող եք ձեռքով թիվ մուտքագրել տոկոսային նշանի կողքին։ Ավարտելուց հետո հպեք կամ սեղմեք «Պահել»՝ ցանկալի զեղչը սահմանելու համար։

Ստուգելու համար, թե ինչպես է զեղչն ազդում եկամտի վրա, շաբաթական կամ ամսական գնի տակ ընտրեք «գինը հյուրի համար»։ Դուք կստանաք գնի մանրամասները, որտեղ նշված կլինեն մեկ գիշերվա գինը, վճարները, զեղչերը կամ հատուկ առաջարկները, հարկերը և ձեր եկամուտը։

Նաև կարող եք զեղչեր առաջարկել այն հյուրերին, որոնք ամրագրում են ժամանման ամսաթվերից շատ առաջ կամ դրանց մոտ օրերին։ «Գնանշում» ներդիրում բացեք «Այլ զեղչեր» բաժինը։ Նշեք ամիսների քանակը վաղ ամրագրումներ կատարողների կամ օրերի քանակը՝ վերջին պահին ճանապարհորդողների համար և զեղչի տոկոսը, որը ցանկանում եք առաջարկել այդ ամրագրումների համար։

*Ըստ Airbnb-ի՝ ամբողջ աշխարհից հավաքված ներքին տվյալների՝ 28 գիշեր կամ ավելի երկար տևողությամբ այցերը կազմել են 2022 թվականին ամրագրված գիշերների 21%-ը և 2023 թ․ առաջին երեք ամիսներին ամրագրված գիշերների 18%-ը։

Այս հոդվածում պարունակվող տեղեկությունները կարող են փոխված լինել հրապարակումից հետո։