Ինչպես ստանալ հիանալի լուսանկարներ ձեր հայտարարության համար

Տարածքի հիանալի լուսանկարները ուշադրություն են գրավում, հստակ ակնկալիքներ սահմանում և հյուրերին տալիս են ամրագրելու վստահություն։ Փորձեք այս խորհուրդները՝ ձեր տարածքի բարձրորակ լուսանկարներ ստանալու համար։

Մանրամասն լուսանկարներն օգնում են հյուրերին որոշել՝ արդյոք ձեր տարածքը համապատասխանում է իրենց կարիքներին։ Լուսանկարելուց առաջ մաքրեք ձեր տարածքը և պլանավորեք նկարահանումը։

• Մաքրեք և ազատվեք ավելորդ իրերից։ Հյուրերին ցույց տվեք, թե ինչ կարող են ակնկալել։ «Զարմանալի է, թե ինչքան շատ են այն մարդիկ, որոնք լուսանկարելուց առաջ տարածքից չեն հեռացնում ավելորդ իրերը»,- ասում է Ջեֆը՝ լուսանկարիչ և սուպերտանտեր Կալիֆոռնիայի Ջոշուա Թրիում։
• Ընտրեք, թե ինչն եք ուզում ցույց տալ։ Ի՞նչը դուր կգա հյուրերին ձեր տարածքում։ Ի՞նչ պետք է իմանան անակնկալներից խուսափելու համար։ Օգտագործեք լուսանկարները՝ եզակի մանրամասները, սիրված հարմարությունները և հատուկ կարիքներով անձանց համար հարմարությունները ցուցադրելու համար։
• Կազմեք ցուցակ։ Պլանավորեք, թե ինչպես եք տարբեր դիտանկյուններից լուսանկարելու հյուրերին հասանելի յուրաքանչյուր սենյակ և տարածք։ Օրինակ՝ հետնաբակի լուսանկարները կարող են ցույց տալ ամբողջ բակը, լողավազանը, արևայրուք ընդունելու պառկելաթոռները և դարպասի սողնակը։
• Գտեք լավագույն լուսավորությունը։ Փափուկ, բնական լույսը ջերմ և հյուրընկալ երանգ է հաղորդում լուսանկարներին։ Պլանավորեք ներսի լուսանկարներն այն ժամերին, երբ ձեր սենյակներն առավելագույնս են լուսավորված ցերեկը։ Լուսանկարեք բացօթյա հատվածը «ոսկե ժամերին»՝ արևածագից 60 րոպե հետո և մայրամուտից առաջ։
• Մտածեք պրոֆեսիոնալ վարձելու մասին։ Պրոֆեսիոնալ լուսանկարչությունը հասանելի է Airbnb-ի միջոցով աշխարհի մի շարք քաղաքներում։

Տեսախցիկների մեծ մասը կարող է տարածքի ազդեցիկ լուսանկարներ ստանալ, այդ թվում՝ ձեր սմարթֆոնինը։ Ահա թե ինչպես կարելի է համոզվել, որ ձեր լուսանկարները լավագույնս են ներկայացվում Airbnb-ում։

• Անջատեք լուսաբռնկիչը։ Բացեք պատուհանների շերտավարագույրները, գալարավարագույրները և վարագույրները։ Եթե առավելագույնս օգտվում եք բնական լույսից, բայց ձեր լուսանկարները դեռ շատ մութ են ստացվում, ապա միացրեք լույսերը։
• Հորիզոնական լուսանկարներ ստացեք։ Հորիզոնականներն ավելի լավ են նայվում, քան ուղղաձիգները, քանի որ որոնման արդյունքներում պատկերները քառակուսի են եզրատվում, իսկ ձեր հայտարարության էջում լուսանկարները ցուցադրվում են հորիզոնական դիրքով։
• Գլխավոր առարկան պահեք շրջանակի կենտրոնում։ Միացրեք ցանցը՝ կոմպոզիցիան ճիշտ ստանալու համար։
• Ուղիղ պահեք տեսախցիկը։ Լուսանկարեք չեզոք դիրքից՝ առանց օբյեկտիվը վերև կամ ներքև թեքելու, որպեսզի հյուրերը տեսնեն ձեր տարածքի իրական պատկերը։
• Ընտրեք լուսանկարներ։ Ընտրեք լայն, միջին և խոշոր պլաններով արված լուսանկարների խառնուրդ՝ ընդհանուր պատկերը և մանրամասները ցույց տալու համար։
• Խմբագրեք լուսանկարները։ Կարգավորեք յուրաքանչյուր լուսանկարի պայծառությունը, ցայտունությունը և վառ հատվածները՝ օգտագործելով այնպիսի գործիքներ, ինչպիսին է հեռախոսում ավտոմատ խմբագրման կոճակը։ Ըստ անհրաժեշտության՝ ձեռքով եզրատեք, ուղղեք կամ պտտեք պատկերները (այնպես, որ դրանց ճիշտ կողմը վերևում լինի)։
• Վերբեռնեք բարձր լուծաչափով լուսանկարներ։ Օգտագործեք առնվազն 1200x800 պիքսել լուսանկարներ։ Որքան մեծ լինի ֆայլը, այնքան լավ (առավելագույնը 10 ՄԲ)։

Երբ բեռնեք ձեր լուսանկարները, օգտագործեք Հայտարարությունների ներդիրը՝ տարածքը ցույց տալու համար։

• Ստեղծեք ֆոտոշրջայց։ Ֆոտոշրջայցն ավտոմատ տեսակավորում է ձեր պատկերներն ըստ սենյակների, որպեսզի հյուրերը հասկանան ձեր տան դասավորությունը։ Կարող եք տեղափոխել, հեռացնել և ավելացնել լուսանկարներ։
• Մանրամասներ ավելացրեք յուրաքանչյուր սենյակի համար։ Կարող եք նշել, որ ննջասենյակում կա շատ մեծ երկտեղանի մահճակալ, կամ հյուրասենյակում կա 55 դյույմանոց հեռուստացույց։ Կարող եք նաև ներառել տեղեկություններ սենյակի՝ հատուկ կարիքներով անձանց համար հարմարությունների մասին։
• Գրեք լուսանկարների մակագրեր։ Գրեք այն ամենի մասին, ինչ չի երևում լուսանկարում, բայց կարող է կարևոր լինել հյուրերի համար։ Օրինակ՝ «Ճաշասեղանի շուրջ տեղավորվում է առավելագույնը 10 մարդ, երբ այն ամբողջովին բացված է»։
• Հստակեցրեք, թե յուրաքանչյուր սենյակ որտեղ է գտնվում հատակագծի վրա։ Տրամադրեք համատեքստ, օրինակ՝ «1-ին ննջասենյակը գտնվում է երկրորդ հարկում և ունի կից լոգասենյակ»։
• Ընդգծեք առանձնահատկություններն ու հարմարությունները։ Ուշադրություն հրավիրեք պահանջված իրերի վրա։ Օրինակ՝ «Համօգտագործվող խոհանոցն ունի էսպրեսո մեքենա, էլեկտրական թեյնիկ և հյուրերի համար նախատեսված ազատ դարակով սառնարան»։ Խմբագրումն ավարտելուց հետո հպեք «Դիտել» կոճակը՝ ձեր հայտարարությունն աչքի անցկացնելու համար։

 Խմբագրումն ավարտելուց հետո հպեք Դիտել կոճակը՝ ձեր հայտարարությունն աչքի անցկացնելու համար։

Այս հոդվածում պարունակվող տեղեկությունները կարող են փոխված լինել հրապարակումից հետո։