Ինչպես գործնականում կիրառել Airbnb-ի 5 փուլանի մանրազնին մաքրման գործընթացը

Քանի որ մաքրությունն այժմ ավելի կարևոր է, քան երբևէ, հյուրընկալողները պետք է հետևեն Airbnb-ի 5 փուլանի մանրազնին մաքրման գործընթացին, իսկ մենք կօգնենք գործնականում կիրառել գործընթացը։ Այս հոդվածում ձեզ են ներկայացվում մաքրման 5 փուլերը, ինչպես նաև լրացուցիչ ցուցումներ, խորհուրդներ և լավագույն փորձը, ինչը կօգնի պահպանել մաքրման միասնական ստանդարտը։ Լավագույն փորձը ձևավորվել է մանրազնին մաքրման ուղեցույցի շնորհիվ, որը մշակվել է առողջապահության և հյուրընկալության ոլորտների մասնագետների հետ՝ կարևորելով ձեր բարեկեցությունը։

Մենք մանրամասնորեն կներկայացնենք մանրազնին մաքրման 5 փուլանի գործընթացի քայլերը՝ նախապատրաստում, մաքրում, մանրէազերծում, ստուգում և տարածքի պատրաստում հյուրընկալման համար։

• Օդափոխեք սենյակները մաքրելուց առաջ և դրա ընթացքում։ Կարգավորող մարմինները, ինչպիսիք են Առողջապահության համաշխարհային կազմակերպությունը (ԱՀԿ) և ԱՄՆ-ի Հիվանդությունների վերահսկման և կանխարգելման կենտրոնները (CDC), խորհուրդ են տալիս նախքան մաքրումը և մանրէազերծումը բացել դռներն ու պատուհանները և օգտագործել հովհարիչներ՝ տարածքում օդի շրջանառությունը մեծացնելու համար։ Մաքրելուց առաջ և դրա ընթացքում հնարավորինս երկար օդափոխեք տարածքը։

• Վերցրեք ճիշտ մաքրման պարագաներ։ Խորհուրդ ենք տալիս օգտագործել այնպիսի ախտահանող և մանրէազերծող միջոցներ, որոնք գրանցված են համապատասխան պետական մարմիններում (օրինակ՝ Քիմիական նյութերի եվրոպական գործակալության կամ ԱՄՆ Շրջակա միջավայրի գործակալության կողմից)։

• Ուսումնասիրեք քիմիական նյութերի օգտագործման անվտանգության վերաբերյալ ցուցումները։ Միշտ կարդացեք ապրանքների պիտակները, որպեսզի հասկանաք դրանց ակտիվ բաղադրիչներն ու ճիշտ օգտագործման կարգը։

• Առնվազն 20 վայրկյան ձեռքերը լվացեք օճառով և տաք ջրով։ Եթե դա հնարավոր չէ, օգտագործեք ձեռքերի՝ առնվազն 60% ալկոհոլային հիմքով ախտահանիչ և հետևեք ձեր տեղական պետական գործակալության ամենավերջին ցուցումներին։

• Կրեք պաշտպանիչ հանդերձանք։ Նախքան տարածք մուտք գործելը հագեք մեկանգամյա օգտագործման ձեռնոցներ, դիմակներ կամ դեմքը ծածկող կտոր։

• Հանեք ամբողջ աղբը։ Սկսեք այս քայլից, որպեսզի մաքրված տարածքը չաղտոտվի աղբից։ Բոլոր աղբամանների մեջ դրեք չօգտագործված տոպրակներ. այդպես ավելի հեշտ կլինի հեռացնել լաթերը և այլ թափոններ։

• Հավաքեք տարածքի կեղտոտ սպիտակեղենը։ Հյուրընկալողները մեզ հայտնել են, որ լվացքն ամենաժամանակատար գործողություններից է այցերի միջև ընկած ժամանակահատվածում։ Տարածք մտնելուց հետո անմիջապես հավաքեք անկողնային սպիտակեղենն ու աշխատեք թափ չտալ այն, որպեսզի մանրէները չտարածվեն։

• Մաքրելուց առաջ սարքերն անջատեք հոսանքից։ Ձեր անվտանգության և սարքերի պաշտպանության նկատառումներով՝ մաքրումից առաջ չմոռանաք անջատել սարքերը։ Վարդակին միացված, սակայն «անջատված» սարքերն ամեն դեպքում սնուցվում են հոսանքից։ Հոսանքը կարող եք անջատել նաև կենտրոնական վահանակից։

Հիշեցում անվտանգության մասին. նախքան տարածք մուտք գործելը հագեք մաքուր պաշտպանիչ հանդերձանք։ Կարդացեք նաև անվտանգության բոլոր պիտակները, որպեսզի ճիշտ օգտագործեք քիմիական նյութերը։

Մաքրելը նշանակում է մակերեսներից հեռացնել մանրէները և կեղտը, օրինակ՝ օճառոտ կտորով մաքրել խոհանոցի սեղանածածկը կամ սալօջախը։ Կարևոր է այս քայլը կատարել նախքան ձեր տարածքը մանրէազերծելը։

• Սպիտակեղենը լվացեք արտադրողի առաջարկած ամենաբարձր ջերմաստիճանում։ Չմոռանաք լվանալ ձեռքերը նախքան մաքուր սպիտակեղենի հետ գործ ունենալը։

• Լվացեք ողջ սպասքը և դատարկեք ամանալվաց մեքենան։ Հիգիենայի կանոններից ելնելով՝ անհրաժեշտ է լվանալ հյուրերի օգտագործած սպասքը։ Եթե ամանալվաց մեքենա չունեք, սպասքը լվացեք տաք ջրով և սպասքի հակամանրԷական օճառով։ Խաչաձև աղտոտումից խուսափելու համար՝ նախ հավաքեք կեղտոտ սպասքը բոլոր սենյակներից։

• Մաքրեք տարածքի փոշին, ավլեք և փոշեկուլով մաքրեք հատակը։ Փոշու և աղտոտվածության տեսանելի հետքեր չթողնելու համար փոշին սրբեք վերևից դեպի ներքև։ Ավլեք կոշտ մակերևույթ ունեցող բոլոր հատակները և փոշեկուլով մաքրեք կարպետները։

• Մաքրեք կոշտ մակերևույթները օճառով և ջրով։ Սրբեք բոլոր մակերևույթները՝ կեղտը, ճարպը, փոշին և մանրէները հեռացնելու համար։ Կոշտ մակերևույթներն են սեղանածածկերը, սեղանները, լվացարանները, պահարանները և հատակները։ Հատակը լվանալիս շարժվեք սենյակի հետին անկյունից դեպի ելքը և ջուրը թափեք դեռ չմաքրված լվացարանի մեջ։

• Մաքրեք փափուկ մակերևույթները՝ համաձայն արտադրողի ցուցումների։ Փափուկ մակերևույթներ ունեն գորգը, անկողնային պարագաները, պաստառները և այլն։ Զգուշորեն հեռացրեք տեսանելի կեղտը կամ բիծը, հետո մաքրեք համապատասխան մաքրող միջոցներով։ Հնարավորության դեպքում լվացեք իրերը լվացքի մեքենայով՝ համաձայն արտադրողի ցուցումների։

Հիշեցում անվտանգության մասին. մանրէների տարածումը կանխելու համար մաքրման ընթացքում մի հպվեք ձեր դեմքին։

Մանրէազերծումը նշանակում է քիմիական նյութերի օգտագործում մանրէների և բակտերիաների քանակի նվազեցման նպատակով։ Այս փուլում պահանջում ենք, որ հյուրընկալողները մանրէազերծեն հաճախ հպվող բոլոր մակերևույթները։ Օրինակ՝ հյուրընկալողները կարող են մանրէազերծել դռների բռնակները, լույսի անջատիչները և պահարանները՝ այդ մակերևույթների վրա քիմիական ախտահանիչներ ցողելով։

• Կոշտ մակերևույթը մաքրելուց հետո այն ցողեք ախտահանիչով։ Մանրէազերծեք տարածքի հաճախ հպվող բոլոր մակերևույթները, օրինակ՝ դռան բռնակները և լույսի անջատիչները։ Մանրէազերծեք էլեկտրական սարքերը՝ համաձայն արտադրողի ցուցումների։

• Թողեք, որ ախտահանող միջոցը խոնավ մնա սահմանված ժամանակի ընթացքում։ Ապրանքի պիտակի վրա նշված է լինում, թե որքան ժամանակ է հարկավոր թողնել, որպեսզի քիմիական նյութն արդյունավետորեն մանրէազերծի մակերևույթը։ Այդպես կոչնչացվեն հնարավորինս շատ մանրէներ։

• Թողեք, որ մակերևույթները չորանան օդի ներգործությամբ։ Եթե մակերևույթը չորանա նախքան առաջարկված ժամանակը, չկա որևէ երաշխիք, որ նյութը կոչնչացնի պիտակի վրա նշված հարուցիչները։

Հիշեցում անվտանգության մասին. ուշադիր հետևեք բոլոր պիտակների վրա նշված ցուցումներին, որպեսզի ճիշտ օգտագործեք քիմիական մաքրող նյութերը։

Դուք կկարողանաք օգտվել մաքրման անհատականացված ստուգացանկերից, որոնք հիմնված կլինեն ձեր տարածքի մանրամասների վրա։ Անպայման ծանոթացեք սենյակ առ սենյակ ստուգացանկերից յուրաքանչյուրում ներկայացված լավագույն փորձին և դրանով կիսվեք ձեր հյուրընկալող թիմի կամ մաքրման մասնագետների հետ։

• Եվս մեկ անգամ համոզվեք, որ հաճախակի շփման մակերևույթները մանրէազերծված են։ Մանրէազերծեք այն մակերևույթները, որոնք գուցե մոռացած լինեք։

• Ուշադրություն դարձրեք բոլոր անսարքություններին կամ բացակայող պարագաներին։ Երբ անցնեք տարածքով, որպեսզի ստուգեք պատրաստ լինելը, ուշադրություն դարձրեք այն ամենին, ինչը պետք է փոխարինել, վերալիցքավորել կամ համալրել։

Խաչաձև աղտոտումից խուսափելու համար անհրաժեշտ է ավարտել սենյակի մաքրությունն ու մանրէազերծումը՝ այն հաջորդ հյուրի համար նախապատրաստելուց առաջ։

• Դեն նետեք կամ լվացեք մաքրման պարագաները։ Ախտահանիչ անձեռոցիկները և մեկանգամյա օգտագործման մնացած արտադրանքը պետք է դեն նետել։ Անպայման մաքրեք նաև մաքրման համար օգտագործված մյուս բոլոր գործիքները։ Բոլոր մաքրող կտորները լվացեք դրանց համար թույլատրված առավելագույն ջերմաստիճանով։

• Մաքրությունն ավարտելուց հետո ձեր հագից զգուշորեն հանեք այն շորերը, որոնցով կատարել եք մաքրությունը։ Վերացրեք կամ լվացեք ցանկացած պաշտպանիչ հանդերձանք՝ համաձայն դրանց օգտագործման ցուցումների։

• Առնվազն 20 վայրկյան ձեռքերը լվացեք օճառով և տաք ջրով։ Եթե դա հնարավոր չէ, օգտագործեք ձեռքերի՝ առնվազն 60% ալկոհոլային հիմքով ախտահանիչ և հետևեք ձեր տեղական պետական գործակալության ամենավերջին ցուցումներին։

• Ակնադիտորեն գնահատեք յուրաքանչյուր սենյակը՝ արդյո՞ք այն պատրաստ է հաջորդ հյուրի համար։ Պատկերացրեք, որ հյուրը դուք եք և առաջին անգամ եք մտնում տարածք։

• Հյուրերի համար պատրաստեք մաքրման պարագաներ։ Հյուրերն ասում են, որ ցանկանում են ձեր տարածքում մնալու ընթացքում մաքրումը կատարել ինքնուրույն։ Հյուրերին տրամադրեք մաքրման պարագաներ՝ ձեռքի ախտահանիչ միջոցներ, մեկանգամյա օգտագործման թղթե սրբիչներ, ախտահանիչ սփրեյ կամ անձեռոցիկներ և ձեռքի լրացուցիչ օճառ։

• Համալրեք մաքրման պարագաները։ Անպայման ստուգեք պիտանելիության ժամկետները և համալրեք ձեր օգտագործած բոլոր պարագաները, որպեսզի պատրաստ լինեք նոր հյուրեր ընդունելու։

Հիշեցում անվտանգության մասին. քիմիական նյութերը մշտապես հեռու պահեք երեխաներից։

Այժմ, երբ դուք ծանոթ եք մանրազնին մաքրման 5 փուլանի գործընթացին, կարող եք այս տեխնիկան կիրառել ձեր տարածքի յուրաքանչյուր սենյակում։ Իմանալով, որ մաքրման նոր կանոններին հետևելը կարող է դժվար լինել, մենք կազմել ենք մի համապարփակ մաքրման ձեռնարկ, որը ներառում է փորձագիտական աջակցություն և ցուցումներ, անվտանգության խորհուրդներ և ստուգացանկեր՝ Airbnb-ի մանրազնին մաքրման 5 փուլանի գործընթացը գործնականում կիրառելու համար։ Հյուրընկալողներից պահանջում ենք հետևել Airbnb-ի 5 փուլանի մանրազնին մաքրման գործընթացին յուրաքանչյուր այցից առաջ։

Նկատի ունեցեք, որ մաքրման պահանջները կարող են ժամանակի ընթացքում թարմացվել փորձագետների կողմից՝ հիմնվելով նոր տեղեկությունների վրա։ Հիմքում ունենալով գիտության զարգացումները՝ Airbnb-ի մանրազնին մաքրման 5 փուլանի գործընթացի և մանրակրկիտ մաքրման ձեռնարկի նպատակը հյուրընկալողների և հյուրերի առողջության ու բարեկեցության ապահովումն է։

ՀԱՋՈՐԴԸ․ մաքրման ցուցումներ առանձին սենյակներ տրամադրող տանտերերի համար