Ինչպես հյուսել ձեր պատմությունը

Սուպերտանտերեր Թերեզան և Դեյվիդը գիտեն, թե ինչպես օգտվել պատմասացության ուժից։ Լինելով ծնողներ, բնապահպաններ, ստեղծագործական հարցերով տնօրեններ, հրատարակվող հեղինակներ և Վիսկոնսին նահանգի Էլքհոռն քաղաքում գտնվող «Վանդավեգա» ճամբարի տերեր՝ նրանք սովորել են, թե ինչպես կարելի է պատմություններ հյուսելով միավորել մարդկանց։ «Երբ մենք սկսեցինք ճամբարի պատմության մանրամասները գտնել և հրապարակել՝ այն ներկայացնելով որպես 1920-ական թվականների ընդհատակյա մի վայր, որը քրեական ամբոխի հավաքատեղի էր, հասարակաց տուն, լատվիացի փախստական համայնքի ամառային ճամբար, ինչպես նաև՝ մեր իսկ կապն այդ ամենի հետ, մենք տեսանք, որ մարդիկ իսկապես հետաքրքրվում են այդ ամենով»,- ասում է Թերեզան։

Այստեղ նրանք կիսվում են մի քանի իմաստուն խորհուրդներով, թե ինչպես գտնել և մշակել ձեր տան պատմությունը։

Թերեզա. «Միշտ էլ պատմելու մի բան կգտնվի, նույնիսկ եթե ձեր տարածքը դարավոր պատմություն չունի։ Ձեր իսկ պատմությունը գտնելու համար սկսեք փորփրել.

• Ինչպիսի՞ն է ձեր տան պատմությունը։
• Ինչպիսի՞ յուրահատուկ փորձառություններ կան ձեր քաղաքում, որոնք հյուրերը չեն կարող գտնել այլուր։
• Որո՞նք են այն հետաքրքիր մանրուքները, որոնց գուցե ուշադրություն չեք դարձրել։

Մի փոքր ուսումնասիրեք և ներառեք ձեր հայտարարությունում»։

Դեյվիդ. «Բացի ննջասենյակների և լոգասենյակների թվից՝ էլի շատ բաներ կան, որոնց մասին կարող եք նշել ձեր հայտարարության մեջ։ Մարդիկ ուզում են իմանալ, թե որտեղ կարող են մի բաժակ ընտիր սուրճ վայելել, նրանք ուզում են իմանալ ձեր նախընտրած վայրերը, ուստի կիսվեք այն ամենով, ինչ եզակի է ձեր առաջարկած փորձառությունում։ Հյուրերը ձգտում են շփվել և հուզական կապ ստեղծել, իսկ պատմություններն օգնում են մեզ մտերմանալ»։

Դեյվիդ. «Մենք շատ արագ սովորեցինք, որ պետք է նախապես կառավարել մարդկանց ակնկալիքները, քանի որ չենք ուզում հիասթափեցնել նրանց։ Ուստի ստեղծեցինք «Ցածր ակնկալիքների հրովարտակը»։ Դա զվարճալի միջոց է՝ ներկայացնելու պարզ ճամբարային կյանքը։ Այնտեղ նշում ենք, թե ինչ կարելի է ակնկալել, օրինակ՝ տհաճ միջատներ, անտառային էակներ և օդորակման բացակայություն, որպեսզի եգիպտական սավանների կամ ժամանակակից ճոխությունների սիրահար հյուրը հասկանա, որ սա իրեն հարմար տարբերակ չէ»։

Թերեզա. «Մենք ձևականությունների հետևից չենք ընկնում։ Ուստի համապատասխան լեզու ենք օգտագործում մեր տարածքը նկարագրելիս։ Մենք որոշեցինք ազնիվ լինել մարդկանց հետ։ Ընտրեցինք զվարճալի, բայց և՝ չթաքցնող խոսելաոճ։ Եվ մեր հումորի զգացումն օգնում է մեզ դառնալ ավելի հասանելի։ Դրա համար կարիք չկա փայլուն գրող լինելու. պարզապես համեստորեն նկարագրեք ձեր տարածքը»։

Դեյվիդ. «Երբ ես որոնում եմ Airbnb-ում, ինձ դուր է գալիս հյուրընկալողների անհատականությունները տեսնել իրենց տարածքների նկարագրությունում։ Հատկապես եթե ընդհանուր տարածքում ենք մնալու, ես ուզում եմ իմանալ, որ դիմացինս հումորի զգացում ունի, և այն տիպի մարդկանցից է, որոնց հետ ինձ դուր է գալիս շփվել։ Թագավորություններ մի խոստացեք։ Մի փորձեք թվալ աշխարհի ամենալավ մարդը։ Պարզապես եղեք անկեղծ, ճշմարտախոս և զվարճալի, քանի որ մարդիկ ուզում են իրենց հարմարավետ զգալ, երբ գալիս են ձեր տարածքում մնալու»։

Թերեզա. «Հետաքրքրությունն ու ամրագրումները մեծացնելու համար ձեր տունը ներկայացրեք սոցիալական մեդիայում։ Իրականում, շատերը մեզ գտնում են հենց սոցիալական մեդիայի շնորհիվ։ Նրանք հանդիպում են մեր լուսանկարներին կամ հետևում են մեր Instagram-ի էջին. դա իսկապես հիանալի միջոց է լսարան ստեղծելու և նրանց հրավիրելու ճամբարում իրենց ուժերը փորձելու։ Մի քանի խորհուրդ՝

• Փորձեք կիսվել կենսական պահերով, որպեսզի մարդիկ ուզենան տեղում վերապրել դա։ Նրանց կարող է գրավել այդ գիրքը՝ մահճակալի կողքին, և տաք սուրճի մի գավաթը՝ պատուհանից բացվող հիանալի տեսարանով։
• Լավ ոճավորումը և լավ լուսանկարները վիզուալ պատմասացության կարևոր գործիք են։ Ընտրեք համոզիչն ու գեղեցիկը»։

Դեյվիդ. «Վանդավեգա այցելողները բազմաթիվ անգամներ ինձ ասել են, որ լուսանկար են տեսել Instagram-ում և ուզում են այդ պահը վերստեղծել իրենց իսկ մասնակցությամբ։ Instagram-ը դառնում է ձեր տարածքի գրավիչ պահերի և վիզուալ նախադիտման հարթակ։ Այն հաճախ կարող է ամրագրման առիթ դառնալ»։

Դեյվիդ. «Սկզբում մենք շատ սխալներ թույլ տվեցինք։ Բայց սովորել ենք դասեր քաղել դրանցից և ընդունել կյանքի խառնաշփոթը։ Օրինակ՝ պատմասացության միջոցով իմացանք, որ հնարավոր է՝ տրամադրվող տեղեկությունները չափազանց շատ լինեն։ Ինչքան էլ որ մարդիկ սիրում են պատմություններ լսել հասարակաց տների, մաֆիայի և սպանությունների մասին, նրանք պարտադիր չէ, որ իմանան, թե որտեղ է այս ամենը պատահել, հատկապես եթե քնելու են այդտեղ։ Ժամանակի ընթացքում կբացահայտեք, թե ինչ պատմել, ինչը՝ ոչ, և ինչն է գրավում ձեր լսարանին»։

Թերեզա. «Մենք բոլոր անհաջողությունները դիտարկում ենք որպես աճելու հնարավորություն։ Այդպես ենք սովորում»։

Թերեզա. «Երբ նոր էինք սկսում հյուրընկալել, ես չափազանց վախենում էի կիսվել մեր «նախկին» լուսանկարներով։ Կարծում էի՝ ոչ ոք չի ցանկանա գալ մեզ մոտ, քանի որ տարածքն ահավոր էր թվում։ Բայց իրականում «առաջ և հետո» լուսանկարներն ամենաշատ դիտումներն են ունեցել»։

Դեյվիդ. «Մարդիկ արձագանքում են ազնվությանը։ Նրանք ուզում են տեսնել ընթացքը։ Եվ դարձյալ, նրանք փնտրում են անձնական շփում, այնպես որ մի վախեցեք կիսվել ձեր անձնական ճամփորդության դրվագներով։ Անկեղծ եղեք և պատմեք ձեր եզակի պատմությունը»։

Ավելին իմանալ հյուրընկալող դառնալու մասին