Ավելացրեք մանրամասներ, որոնք դուր կգան հյուրերին

Երբ հյուրերը մտնում են Կալիֆոռնիայի Հոլիվուդ Բիչ քաղաքի The Beach Lodge, անմիջապես պատկերացում են կազմում, թե ինչպիսին է Թիֆանի Կալիվա-Տալյեդոն։ Նրա հոգատարությունն ու դիզայնի հանդեպ սերը զգացվում է դեկորի ընտրության, գույների, տեքստուրաների և յուրաքանչյուր անհատականացված շտրիխի միջոցով։ Որպես նախկին ստեղծագործական տնօրեն, նա միշտ ուշադիր է եղել մանրամասների նկատմամբ։ Այստեղ նա կիսվում է Airbnb-ում հաջողության հասնելու գաղտնիքներով։

«Նախքան կվերանորոգեինք The Beach Lodge-ը, սա մի տգեղ կանաչ տուն էր։ Մարդիկ այն «Թմրամոլների որջ» էին անվանում և ձգտում էին շատ արագ անցնել կողքով։ Հարևանները կարծում էին՝ մենք խենթ ենք, որ գնում ենք այն, բայց ես դրա մեջ ինչ-որ յուրահատուկ բան տեսա և մտածեցի, որ եթե մենք կարողանանք վերականգնել այն, մարդիկ կգան։ Ես շատ սեր եմ ներդրել դրա մեջ և կարծում եմ, որ հյուրերը վերադառնում են հենց այդ պատճառով»։

Ստեղծեք հատուկ միջավայր
«Անմոռանալի փորձառությունների ստեղծումը միշտ սկսվում է ճիշտ ոճից։ Իմ հաճախորդներին խորհուրդ եմ տալիս տարածք ձևավորելիս սկսել զգացմունքից, ոչ թե թեմայից։ Ի՞նչ եք ուզում, որ հյուրերն զգան, երբ ձեր տուն մտնեն․ հարմարավետությո՞ւն, ուրախությո՞ւն, անդո՞րր։ The Beach Lodge-ի դեպքում, փոխանակ բառացի ծովափնյա թեմայով առաջնորդվելու, ես մտածում էի գույների, տեքստուրաների և մանրամասների մասին. նախշեր, որոնք աչքի են ընկնում օդային նեյտրալ ֆոնի վրա, ավազ հիշեցնող տեքստուրաներ և շատ բույսեր՝ բնությանը մոտ լինելը հիշեցնելու համար»։

Ձևավորեք տունը՝ ունենալով սահմանափակ բյուջե
«Անպայման չէ, որ թանկ դեկորացիա լինի։ Քրջի շուկաներն ու գողտրիկ խանութները լի են թանկարժեք գանձերով և անկրկնելի իրերով, որոնք, թվում է, ունեն հարուստ պատմություն։ Պարզապես պետք է մի փոքր փնտրել։ Ինձ հատկապես դուր են եկել այն իրերը, որոնք ներկայացնում են իմ ֆիլիպինյան և ասիական ժառանգությունը։ Իրերը, որոնք ընտրում եք ձեր տարածքի համար, պետք է խոսուն լինեն, և միասին դրանք կօգնեն տունը օժտել մեծ պատմությամբ»։

Փորձեք տարբերակներ
«Մեկ այլ խորհուրդ, որ տալիս եմ իմ հաճախորդներին. մի վախեցեք փորձարկումներ անելուց։ Փոփոխեք ձևավորումը։ Փորձեք նոր բաներ։ Թարմացումներ արեք ամեն սեզոնին։ Դա լավագույն ձևն է իմանալու, թե որ միջոցն է համապատասխանում ձեր նպատակին, որը՝ ոչ։ Ձեր տարածքը պատկերացրեք որպես մարդ՝ իր յուրահատկություններով և բնավորությամբ։ Ինչպես ձեզ, այնպես էլ տարածքին հարկավոր են թարմացումներ և զարգացում՝ հասնելու իր լավագույն տարբերակին»։

Ստեղծեք փոքրիկ հարմարավետ անկյուններ
«Ես սիրում եմ անսպասելի ձևերով խաղալ տարածության և տեսողական հետաքրքրության հետ։ Խորհուրդ եմ տալիս ձեր տան տարածքով մեկ փոքրիկ հարմարավետ անկյուններ ստեղծել, որտեղ հյուրերը կարող են ընկղմվել, օրինակ, ընթերցանության մեջ։ Գուցե մի քանի ծածկոց, բարձ և նկար ավելացնեմ անկյունում, որպեսզի մարդիկ կարողանան լիցքաթափվել այնտեղ։ Մտածեք, թե ինչպես կարող եք ստեղծել փոքրիկ հարմարավետ անկյուններ»։

Անհատականացրեք
«Հնարավորության դեպքում անհատականացրեք հյուրերի այցը մի քանի լրացուցիչ շտրիխների միջոցով։ Օրինակ, եթե ինչ-որ մեկն ասում է, որ ծննդյան օր է նշում, ես իմ սիրելի տեղական հացաբուլկեղենի խանութից փոքրիկ կեքսեր կթողնեմ։ Եթե նրանք խիստ բուսակեր են, ես կկազմեմ տեղական ռեստորանների ցանկ։ Եթե երեխաների հետ ճամփորդող ընտանիք է, ապա բարձերն ու սպիտակեղենը կփոխարինեմ ավելի դիմացկուններով։ Այս մտածված շտրիխները չեն վրիպի հյուրերի աչքերից։ Դուք դա կտեսնեք ձեր կարծիքներում և կրկնվող ամրագրումներում արտացոլված»։

Նվիրեք հուշանվեր
«Խորհուրդ եմ տալիս հյուրերին հուշանվեր տալ ժամանելիս, որպեսզի նրանք զգան ձեր ուշադրությունն ու հյուրասիրությունը, օրինակ՝ մոտակայքում գործող բիզնեսների նվեր քարտեր կամ տեղացի արվեստագետների պատրաստած բացիկներ»։

«Այդ գաղափարն է՛լ ավելի առաջ տանելու համար հյուրերը կարող են անմիջապես The Beach Lodge-ից կամ իմ ստեղծած առցանց խանութից իրեր գնել, այդ թվում՝ էկո հագուստներ և սպիտակեղեն, հնաոճ իրեր։ Ես նաև ներկայացնում եմ կանանց պատկանող և տեղական ապրանքանիշեր, ինչը կարևոր է ինձ համար։ Ես ոչ մի շահույթ չեմ ստանում։ Կարևորը մարդկանց այս ապրանքանիշերի հետ ծանոթացնելն է։ Սա շատ ավելին է ինձ համար, քան պարզապես հանգստյան տունը»։

Ինքներդ ձեզ համարեք նավարկության կապիտան
«Մենք մեր տունն անվանեցինք The Beach Lodge («Լողափնյա տնակ»), քանի որ կարծում ենք, որ այն հարմարավետ տարածք է, որտեղ մարդիկ կարող են հավաքվել։ Այստեղ կան սեղանի խաղեր, յոգայի գորգեր, արհեստներ, արվեստի նյութեր, մանղալ, լողափի սրբիչներ, հեծանիվներ, գրքեր՝ անվերջ զբաղվելու համար, և նվագարկիչ։ Ճանապարհորդություններն ընդլայնում են մարդկանց մտահորիզոնը, և այս զբաղմունքները կարող են օգնել հուշեր և նոր ապրելակերպեր ձևավորելու հարցում։ Մտածեք, թե հարմարություններից որոնք կարող են նպաստել նրանց ընդհանուր փորձառության բարելավմանը»։

Հիշեք, որ մանրուքները կարևոր են։ Այս լավ մտածված շտրիխների շնորհիվ՝ հյուրերը կզգան այն հոգատարությունը, որ ցուցաբերել եք ձեր տարածքում, և կշարունակեն վերադառնալ։

Ավելին իմանալ հյուրընկալող դառնալու մասին