Ընտրեք ձեզ հարմար չեղարկման կանոններ

Չեղարկման կանոններ ընտրելը հավասարակշռված մոտեցում է պահանջում։ Դուք ուզում եք խուսափել չեղարկումներից և միաժամանակ գրավել հյուրերի, իսկ հյուրերն ուզում են ավելի շատ ճկունություն ունենալ մեր օրերում, երբ պլանավորում են իրենց ճանապարհորդությունները։

Քանի որ յուրաքանչյուր հյուրընկալող ունի տարբեր կարիքներ, մենք ստեղծել ենք չեղարկման կանոնների մի քանի տեսակ։ Ընտրեք՝ ստանդա՞րտ, թե՞ երկարաժամկետ ամրագրումների համար կանոններն են ձեզ ավելի հարմար։*

Չեղարկման ստանդարտ կանոններն ավելի կարճ ամրագրումների համար են։ Դրանք կիրառելի են 28 անընդմեջ գիշերվանից պակաս տևողությամբ բոլոր ամրագրումների նկատմամբ։

• Չեղարկման ճկուն կանոններ։ Հյուրերը կարող են ամբողջ գումարի վերադարձով չեղարկել ժամանումից մինչև 24 ժամ առաջ, և դուք վճար չեք ստանա։ Եթե չեղարկման պահին 24 ժամից պակաս մնա ժամանմանը, կամ հյուրերն այդպես էլ չժամանեն, ապա ձեզ կվճարվի առաջին գիշերվա համար։ Եթե չեղարկեն ժամանումից հետո, ապա ձեզ կվճարվի նրանց անցկացրած յուրաքանչյուր գիշերվա համար՝ գումարած 1 լրացուցիչ գիշեր։
  
• Չեղարկման չափավոր կանոններ։ Հյուրերը կարող են ամբողջ գումարի վերադարձով չեղարկել ժամանումից մինչև 5 օր առաջ, և դուք վճար չեք ստանա։ Եթե չեղարկեն դրանից հետո, ապա ձեզ կվճարվի նրանց անցկացրած յուրաքանչյուր գիշերվա համար՝ գումարած 1 լրացուցիչ գիշեր և բոլոր չօգտագործված գիշերների 50%-ը։
• Չեղարկման կոշտ կանոններ։ Ամբողջ գումարը հետ ստանալու համար հյուրերը պետք է չեղարկեն ժամանումից առնվազն 30 օր առաջ։ Բացի այդ, նրանք կարող են գումարն ամբողջությամբ հետ ստանալ ամրագրումից հետո 48 ժամվա ընթացքում, եթե չեղարկումը կատարվի ժամանումից առնվազն 14 օր առաջ։ Եթե չեղարկեն ժամանումից 7-ից 30 օր առաջ, ձեզ կվճարվի բոլոր գիշերների արժեքի 50%-ը։ Եթե չեղարկեն ժամանումից ավելի ուշ, քան 7 օր առաջ, ապա ձեզ կվճարվի բոլոր գիշերների արժեքի 100%-ը։
• Չեղարկման խիստ կանոններ։ Ամբողջ գումարը հետ ստանալու համար հյուրերը պետք է չեղարկեն ամրագրումից հետո 48 ժամվա ընթացքում, և չեղարկումը պետք է կատարվի ժամանումից առնվազն 14 օր առաջ։ Եթե չեղարկեն ժամանումից 7-ից 14 օր առաջ, ձեզ կվճարվի բոլոր գիշերների արժեքի 50%-ը։ Եթե չեղարկեն դրանից հետո, ձեզ կվճարվի բոլոր գիշերների արժեքի 100%-ը։

Ձեր երկարաժամկետ ամրագրման չեղարկման կանոնները գործում են առնվազն 28 անընդմեջ գիշեր տևողությամբ ամրագրումների դեպքում։ Դրանք գերակա են ձեր ստանդարտ կանոնների նկատմամբ։

• Երկարաժամկետ ամրագրման չեղարկման կոշտ կանոններ։ Ամբողջ գումարը հետ ստանալու համար հյուրը պետք է չեղարկի ժամանումից առնվազն 30 օր առաջ։ Եթե հյուրը չեղարկի դրանից հետո, ձեզ կվճարվի անցկացրած բոլոր գիշերների արժեքի 100%-ը՝ գումարած 30 լրացուցիչ գիշեր։ Եթե հյուրի կողմից չեղարկման պահին 30 գիշերից պակաս ժամանակ մնա ամրագրման ավարտին, ապա ձեզ կվճարվի մնացած բոլոր գիշերների արժեքի 100%-ը։
  
• Երկարաժամկետ ամրագրման չեղարկման ճկուն կանոններ։ Հյուրը հետ կստանա ամբողջ գումարը միայն այն դեպքում, եթե չեղարկի ամրագրումից հետո 48 ժամվա ընթացքում և ժամանման ամսաթվից առնվազն 28 օր առաջ։ Եթե հյուրը չեղարկի դրանից հետո, ձեզ կվճարվի բոլոր օգտագործված գիշերների համար՝ գումարած 30 լրացուցիչ գիշեր՝ չեղարկման ամսաթվից հաշված։ Եթե հյուրը չեղարկի այն դեպքում, երբ ամրագրման ավարտին մնացել են 30-ից քիչ օրեր, ապա ձեզ կվճարվի մնացած բոլոր գիշերների արժեքի 100%-ը։

Նշում․ մաքրման վճարները միշտ վերադարձվում են, եթե հյուրը չեղարկում է ժամանումից առաջ՝ անկախ հյուրընկալողի չեղարկման կանոններից։ Airbnb հյուրերի սպասարկման վճարների վերադարձը կախված է մի քանի գործոններից։ Իմանալ ավելին վճարների վերադարձի մասին

Ամեն ինչ կախված է այն բանից, թե չեղարկումն ինչպես կազդի ձեզ և հյուրընկալման ձեր բիզնեսի վրա։ Խորհեք ձեր կարիքների և նպատակների շուրջ, պատկերացրեք ձեզ համար իդեալական հյուրերին և ընտրեք այն կանոնները, որոնք համապատասխանում են այդ ամենին։

Ընտրեք ճկուն կանոններ, եթե՝

• Այդ պահին «մեռյալ» սեզոն է, և դուք ցանկանում եք գրավել հյուրերի, որոնց համար կարևոր է ճամփորդական պլանների ճկունությունը։
  
• Այդ պահին պիկ սեզոն է, և դուք վստահ եք, որ հյուրի չեղարկելու դեպքում կստանաք ձեր տարածքի նոր ամրագրում։
• Ձեր տարածքը գտնվում է մրցունակ վայրում, և ուշ չեղարկումները չեն անհանգստացնում ձեզ։

Ընտրեք չափավոր կանոններ, եթե՝

• Ուզում եք բացառել վերջին պահին չեղարկումները։
• Ուզում եք ունենալ որոշ ժամանակ, որպեսզի ստանաք մեկ այլ ամրագրում, եթե հյուրը չեղարկի։
• Ուզում եք ամեն դեպքում գրավել այն հյուրերին, որոնց ծրագրերը դեռ լիովին հստակեցված չեն, օրինակ՝ բիզնես ուղևորների, որոնց անհրաժեշտ է փոխհատուցելի ամրագրումներ անել։

Ընտրեք կոշտ կանոններ, եթե՝

• Ուզում եք խուսափել չեղարկումներից, բայց դրանք խնդրահարույց չեն նախօրոք ծանուցման դեպքում։
• Նախընտրում եք ունենալ ավելի շատ ժամանակ, որպեսզի ստանաք մեկ այլ ամրագրում, եթե հյուրը չեղարկի։
• Ձեր տարածքը պահանջված է կլոր տարի։

Չեղարկման կոշտ կանոնների դեպքում, ի տարբերություն խիստ կանոնների, հյուրերը կարող են ամբողջությամբ հետ ստանալ գումարը, եթե չեղարկեն ժամանումից 30 օր առաջ։

Ընտրեք չեղարկման խիստ կանոններ, եթե՝

• Ուզում եք խուսափել չեղարկումներից և ժամանակ չունեք փոխարինող ամրագրումներ փնտրելու կամ կառավարելու։
• Ինքներդ եք հյուրընկալում, և վերջին պահին չեղարկումները մեծ անհարմարություններ են ստեղծում ձեր ժամանակացույցի առումով։
• Ձեր տարածքը մեծ պահանջարկ ունի, և խիստ կանոնները հետ չեն պահի հյուրերին այն ամրագրելուց։

Որոշ հյուրընկալողներ ավելի շատ գումար են վաստակում՝ չեղարկման կանոններում ավելացնելով առանց գումարի վերադարձի տարբերակը։ Այս տարբերակը հյուրերին թույլ է տալիս ընտրել չեղարկման ավելի խիստ կանոններ զեղչված գնով՝ սովորաբար ստանալով 10% զեղչ հիմնական գնից։ Եթե նրանք ընտրեն սա և հետագայում չեղարկեն ամրագրումը, դուք կստանաք ձեր ամբողջ վերջնավճարը՝ ամրագրված բոլոր գիշերների համար։

Չեղարկման կանոններ ընտրելը նշանակում է գտնել այն, ինչ հարմար է ձեզ և ձեր հյուրերի համար։ Պարզապես հիշեք, որ շատ մարդիկ ճկունության են ձգտում ճանապարհորդելիս։ Նրանցից ամրագրումներ ստանալու համար սկսեք չեղարկման առավել ճկուն կանոններից, որոնք կարող եք կիրառել ձեր իրավիճակում։

Իմացեք ավելին՝ ծանոթանալով հաջողակ հայտարարություն ստեղծելու մեր ուղեցույցին

*Այլ կանոններ են կիրառվում հետևյալ երկրներում ամրագրումների նկատմամբ՝ Գերմանիա, Իտալիա և Հարավային Կորեա։

Այս հոդվածում պարունակվող տեղեկությունները կարող են փոխված լինել հրապարակումից հետո։