Ի՞նչ է Խոշոր կործանարար իրադարձությունների վերաբերյալ քաղաքականությունը

Հյուրընկալողների և հյուրերի անվտանգությունն ամենից կարևորն է մեզ համար։ Երբ որևէ բնական աղետ, հանրային առողջապահության ճգնաժամ կամ այլ լայնամասշտաբ իրադարձություն անհնար է դարձնում հյուրընկալումը, մենք ունենք քաղաքականություն, որը կօգնի պաշտպանել և՛ ձեզ, և՛ ձեր հյուրերին։

Այս քաղաքականությունը նախկինում կոչվում էր «Հարգելի պատճառների կիրառման քաղաքականություն»։ Մենք թարմացնում ենք քաղաքականությունը և փոխում դրա անվանումը, որպեսզի այն դառնա ավելի հասկանալի։ 

Խոշոր կործանարար իրադարձությունների վերանայված քաղաքականությունը կիրառվելու է բոլոր ուղևորությունների և փորձառությունների նկատմամբ, որոնք տեղի են ունենալու 2024 թ․ հունիսի 6-ին կամ դրանից հետո՝ անկախ այն բանից, թե երբ են դրանք ամրագրվել։*

Քաղաքականությունը բացատրում է, թե ինչպես է Airbnb-ն կարգավորում չեղարկումները և գումարի վերադարձը, երբ լայնամասշտաբ իրադարձություններն ազդում են ամրագրման վրա։ 

Քաղաքականությունը գործում է հետևյալ իրադարձությունների դեպքում, եթե դրանք ազդում են ամրագրված տարածքի գտնվելու վայրի վրա, տեղի են ունենում ամրագրման պահից հետո և անհնար կամ անօրինական են դարձնում ապագա կամ ընթացիկ ամրագրման ավարտումը.

• Առողջապահության ոլորտում հայտարարված արտակարգ իրավիճակներ և համաճարակներ։ Սրանք ներառում են կառավարության կողմից հայտարարված համաճարակներ, համավարակներ և առողջապահության ոլորտում արտակարգ իրավիճակներ։ Էնդեմիկ կամ սովորաբար որևէ տարածաշրջանի հատուկ հիվանդությունները ներառված չեն։ Խոշոր կործանարար իրադարձությունների վերաբերյալ քաղաքականությունը չի տարածվում COVID-19-ի վրա։
• Կառավարության կողմից սահմանված ճամփորդական սահմանափակումներ։ Սրանք ներառում են պետական մարմնի կողմից սահմանված պարտադիր սահմանափակումներ, օրինակ՝ տարհանման վերաբերյալ կարգադրություն։ Ճամփորդական նախազգուշացումները և պետական մարմինների նմանատիպ ցուցումները ներառված չեն։
• Ռազմական և այլ թշնամական գործողություններ։ Սրանք ներառում են ռազմական գործողություններ, թշնամական գործողություններ, արշավանքներ, քաղաքացիական պատերազմ, ահաբեկչություն, պայթյուններ, ռմբակոծություններ, ապստամբություններ, զանգվածային անկարգություններ և խռովություններ։
• Կենսապահովման հիմնական համակարգերի խոշորամասշտաբ խափանումներ։ Սրանք ներառում են հիմնական կոմունալ ծառայությունների, օրինակ՝ ջեռուցման, ջրամատակարարման և էլեկտրամատակարարման երկարատև անջատումներ, որոնք ազդում են տվյալ վայրում գտնվող տների ճնշող մեծամասնության վրա։
• Բնական աղետներ։ Սրանք ներառում են բնական աղետներ և այլ վտանգավոր եղանակային երևույթներ։ Եղանակային կամ բնական պայմանները, որոնք կանխատեսելի լինելու համար բավականաչափ սովորական են տվյալ վայրում, քաղաքականության մեջ ընդգրկված են միայն այն դեպքում, եթե դրանք հանգեցնում են քաղաքականության մեջ ընդգրկված մեկ այլ իրադարձության, որն անհնար է դարձնում ամրագրման ավարտումը։ Օրինակ՝ Մեքսիկայում փոթորիկների սեզոնին տեղի ունեցած փոթորկի պարագայում քաղաքականությունը կիրառվում է միայն այն դեպքում, եթե դա հանգեցնում է պարտադիր տարհանման վերաբերյալ կարգադրության։

Եթե տվյալ իրադարձության նկատմամբ գործում է քաղաքականությունը․

• Հյուրընկալողները կարող են չեղարկել ամրագրումը՝ առանց վճարների և այլ բացասական հետևանքների։ Հայտարարության օրացույցում կարգելափակվեն չեղարկված ամրագրման ամսաթվերը։
• Հյուրերը կարող են չեղարկել ամրագրումը և ստանալ գումարի վերադարձ կամ ճամփորդական բոնուս՝ անկախ հյուրընկալողի չեղարկման կանոններից։ Հայտարարության օրացույցը բաց կմնա, եթե ամրագրումը չեղարկվի հյուրի կողմից։
• Հյուրընկալողը վերջնավճար չի ստանում, երբ ամրագրումը չեղարկվում է հյուրընկալողի կամ հյուրի կողմից։
• Հյուրընկալողներն ու հյուրերը կարող են չեղարկել մնացած գիշերները, նույնիսկ եթե հյուրերն արդեն ժամանել են։

Եթե քաղաքականությունը չի գործում տվյալ իրադարձության նկատմամբ․

• Հյուրի կողմից չեղարկման դեպքում կիրառվում են հայտարարության մեջ նշված չեղարկման կանոնները։
• Հյուրընկալողի կողմից չեղարկման դեպքում կիրառվում են Հյուրընկալողի կողմից չեղարկման կանոնները, որոնք կարող են ներառել վճարներ և այլ հետևանքներ։ 
• Հյուրընկալողներն ու հյուրերը, այնուամենայնիվ, կարող են կանոններով չնախատեսված կարգով համաձայնության գալ գումարի վերադարձի հարցում։ 

Մենք թարմացնում և վերանվանում ենք քաղաքականությունը՝ հաշվի առնելով հյուրընկալողներից և հյուրերից ստացված կարծիքները։ Օրինակ՝ որոշ հյուրընկալողներ չգիտեին, թե ինչպես կարելի է որոշել՝ արդյոք քաղաքականությունը գործում է ինչ-որ կանխատեսելի եղանակային երևույթի կամ հյուրերի ճանապարհորդելու հնարավորության վրա ազդող իրադարձության նկատմամբ։ 

Ահա հիմնական թարմացումները՝ 

• Քաղաքականությունը կկիրառվի միայն ամրագրված տարածքի գտնվելու վայրում տեղի ունեցած իրադարձությունների նկատմամբ։ Այն իրադարձությունները, որոնք ազդում են հյուրի՝ դեպի ամրագրված տարածք ճանապարհորդելու հնարավորության վրա, այլևս ընդգրկված չեն քաղաքականության մեջ։ 
• Ամրագրված տարածքի գտնվելու վայրում կանխատեսելի եղանակային երևույթներն աներկբայորեն համապատասխանում են ծածկույթի վերաբերյալ պահանջներին, եթե դրանք հանգեցնում են քաղաքականության մեջ ընդգրկված մեկ այլ իրադարձության, օրինակ՝ կառավարության կողմից ճամփորդությունների սահմանափակման կամ կոմունալ ծառայությունների լայնամասշտաբ խափանման։ 

Հյուրընկալողի կողմից չեղարկման կանոններն առանձին են Խոշոր կործանարար իրադարձությունների վերաբերյալ քաղաքականությունից։ Հյուրընկալողի կողմից չեղարկման քաղաքականության համաձայն՝ Airbnb-ն կհրաժարվի վճարներից և, որոշ դեպքերում, այլ հետևանքներից, եթե հյուրընկալողը չեղարկի իր վերահսկողությունից դուրս գտնվող որոշակի հիմնավոր պատճառներով, օրինակ՝ պայթած խողովակի պատճառով։ Հյուրընկալողներից ակնկալվում է, որ նրանք կհարգեն հաստատված ամրագրումները՝ համաձայն հյուրընկալողի կողմից չեղարկման կանոնների։ 

Ըստ երկու քաղաքականությունների՝ հյուրընկալողները պարտավոր են չեղարկել, եթե իրենց տարածքը պիտանի չէ բնակության համար կամ չի համապատասխանում հյուրի ամրագրածին։ Օրինակ՝ եթե ուժեղ փոթորկից հետո ձեր լողավազանն անօգտագործելի է, բայց ձեր հայտարարության մեջ նշել եք, որ լողավազան ունեք, նախքան հյուրերի ժամանումը չեղարկեք ամրագրումը կամ համաձայնության հասեք նրանց հետ։

*Բացառությամբ այն դեպքերի, երբ Airbnb-ն այլ բանի մասին է տեղեկացրել կոնկրետ օգտատերերի։

Այս քաղաքականությունը չի սահմանափակում հյուրընկալողների և հյուրերի՝ տեղական օրենսդրությամբ և կանոնակարգերով սահմանված իրավունքները, և այս քաղաքականության շրջանակներում Airbnb-ի ցանկացած որոշում չի ազդում նրանց օրինական իրավունքների վրա։

Այս հոդվածում պարունակվող տեղեկությունները կարող են փոխված լինել հրապարակումից հետո։