Ի՞նչ են Airbnb հյուրընկալողների ակումբները

Ըստ Airbnb-ի տվյալների՝ հյուրընկալողների ակումբներին միացող հյուրընկալողները չմիացողներից ավելի հաջողակ են։ Որևէ ակումբի միացող նոր հյուրընկալողները 86%-ով ավելի մեծ հավանականություն ունեն ավարտելու երեք այց, քան նրանք, ովքեր ակումբի անդամ չեն, իսկ անդամները ստանում են ավելի բարձր եկամուտներ ու գնահատականներ և սուպերտանտեր դառնալու ավելի մեծ հնարավորություններ։

Ինչպես մի հյուրընկալող է ասում. «Ինձ դուր է գալիս ունենալ հյուրընկալողների տեղական ցանց, որտեղ կարող եմ կիսվել ռեսուրսներով և գաղափարներով։ Ակումբը նաև օգնում է հյուրընկալողներին հասկանալ մեր վարչական շրջանում հյուրընկալման փոփոխվող կանոնները»։

Airbnb հյուրընկալողների ակումբները տեղացի հյուրընկալողների համայնքներ են։ Հյուրընկալողները կապվում են առցանց և անձամբ՝ հարցեր տալու, խորհուրդներով կիսվելու, ձեռքբերումները նշելու և հյուրընկալման վերաբերյալ հարցեր քննարկելու համար։

Խմբերը ղեկավարվում են «Համայնքի ղեկավարներ» կոչվող կամավոր հյուրընկալողների կողմից, որոնք անցկացնում են քննարկումներ, կազմակերպում հանդիպումներ և ստեղծում կամավորական գործունեության հնարավորություններ։ Ղեկավարները նաև համագործակցում են Airbnb-ի հետ, որպեսզի ակումբի անդամներին մշտապես տեղյակ պահեն վերջին թարմացումների և ուսուցողական նյութերի մասին։

Բոլոր ակումբներն օգտագործում են Ֆեյսբուքի մասնավոր խմբեր, ուստի այդ նամակագրություններին միանալու համար հարկավոր է հաշիվ ունենալ։ Ակումբները նաև կազմակերպում են հանդիպումներ, որոնք բաց են բոլոր հյուրընկալողների համար։ Որոշ համայնքներ կազմակերպում են ֆիզիկական մասնակցությամբ հանդիպումներ, մինչդեռ մյուսները դա անում են առցանց։

Ամենից առաջ, հյուրընկալողների ակումբները կազմում են աջակցություն տրամադրող ցանց, ուր կարելի է գնալ, երբ խորհրդի կարիք ունեք կամ պարզապես ուզում եք զրուցել այլ հյուրընկալողների հետ։

Հյուրընկալողների որևէ ակումբի միանալու համար ընդամենը անհրաժեշտ է ունենալ հյուրընկալման հաշիվ Airbnb-ում և ֆեյսբուքյան հաշիվ։ Աշխարհի 90 երկրներում գործում են ավելի քան 600 ակումբներ, ուստի մեծ է հավանականությունը, որ այդպիսի մի ակումբ կգտնեք մոտակայքում։ Եթե ապրում եք մի տարածաշրջանում, որտեղ դեռ ակումբ չկա, կարող եք ինքներդ հիմնել հյուրընկալողների ակումբ։

Հենց որ գտնեք տեղական ակումբ, դրան կարող եք միանալ երեք պարզագույն քայլով․

1. Մտեք քարտեզի վրա հղմամբ նշված ֆեյսբուքյան խումբ և ուղարկեք միանալու հայտ։

2. Պատասխանեք անդամակցության վերաբերյալ հարցերի, որպեսզի կարողանանք հաստատել հյուրընկալման ձեր հաշիվը։

3. Հայտի հաստատումից հետո կդառնաք ակումբի անդամ։

Ակումբի անդամ դառնալու թերևս ամենահամոզիչ առավելությունը դրան առցանց միանալու և ձեր հայտարարության վերաբերյալ կարծիքներ ստանալու կամ հյուրընկալման ոլորտի (օրինակ՝ տեղական կանոնակարգերի կամ մաքրման լավագույն ծառայության) մասին հարցեր տալու հնարավորությունն է։

Քանի որ կունենաք հանդիպումների մասնակցելու հնարավորություն, նաև կկարողանաք հանդիպել ձեր տարածաշրջանում հյուրընկալողների հետ և հաստատել ընկերական ու մասնագիտական կապեր, որոնց կարող եք ապավինել, եթե որևէ խնդիր առաջանա, կամ օգնության կարիք ունենաք։

Ակումբները ներկայացրել են տեղական բիզնեսները, ստեղծել են կայուն զարգացման նախաձեռնություններ, սատարել են կարճաժամկետ վարձակալության կանոնները և միասին աշխատել են կամավորության հիմունքներով։ Հանդիպումները հաճախ հանգեցնում են հատուկ կապերի ստեղծման կամ համայնքի կյանքում դրական փոփոխությունների։ Երկու օրինակ՝

• Իսպանիայի Ժիրոնա քաղաքում հյուրընկալողների ակումբը ինտերիերի հայտնի դիզայներին հրավիրել էր հարց ու պատասխանի հանդիպման, որտեղ անդամները կարող էին հարցեր տալ իրենց տարածքների բարելավման եղանակների մասին։

• Պանամայում համայնքների ղեկավարների մի թիմ հաջողությամբ լողափի մաքրում կազմակերպեց հյուրընկալողների ակումբի համար։

Ֆեյսբուքյան գրառումները հաճախ ներկայացնում են համատեղ աջակցման հնարավորություններ։ Օրինակներ Նյու Յորք նահանգի Քատսկիլ լեռներում և Հուդզոն գետի հովտում հյուրընկալողների ակումբից.

• Մի համայնքի ղեկավար հետաքրքրվում է յուրաքանչյուրի հյուրընկալման սեզոնի ընթացքով և առաջարկում է միասին մտածել բարելավումների մասին։

• Հյուրընկալողներից մեկը հարցնում է, թե ինչպես կարելի է խուսափել կրկնակի ամրագրումներից։

• Մի հյուրընկալող խնդրում է, որ իրեն առաջարկեն սաունա կառուցող որևէ տեղացի վարպետ և ձնահեռացման ծառայություն։

• Մի հյուրընկալողը հարցնում է՝ արդյոք որևէ մեկը կարող է 10 հոգանոց խումբ տեղավորել մեկ շաբաթով։

Այս հոդվածում պարունակվող տեղեկությունները կարող են փոխված լինել հրապարակումից հետո։