Մտածված մանրուքներ, որոնք դուր են գալիս հյուրերին

Ուզո՞ւմ եք հիշարժան փորձառություն պարգևել ձեր հյուրերին։ Դրա համար պարտադիր չէ ունենալ շքեղ տարածք կամ գերժամանակակից հարմարություններ։ Մտածեք փոքր ժեստերի մասին, որոնք կարող են մեծ ազդեցություն ունենալ, օրինակ՝ առաջարկեք ձեր նախընտրած տեղական սուրճը կամ թողեք ձեռագիր ողջույնի երկտող։ Այստեղ հյուրընկալողները կիսվում են հյուրերին անմոռանալի հանգիստ պարգևելու մի շարք պարզ գաղափարներով, որոնք մեծ ծախսեր չեն պահանջում։

Հյուրերը հաճախ հոգնած և մի փոքր ապակողմնորոշված են ժամանում։ Արեք այնպես, որ դռնից ներս մտնելիս նրանք ջերմ հյուրընկալություն զգան։

• Հավաքեք դիմավորելու զամբյուղ։ «Ես նոր ժամանող հյուրերի համար ունեմ դիմավորելու զամբյուղ, որում դնում եմ վարսակաձավարի փաթիլներ, PowerBars էներգետիկ ձողիկներ, ընկույզ, թխվածքաբլիթներ և միկրոալիքային վառարանում պատրաստվող ադիբուդի այն դեպքերի համար, երբ հյուրերը երկար թռիչքից հետո դժվար թե անմիջապես գնումների գնան»։ –Քերի, Նյու Յորք
• Անհատական գրություն թողեք։ «Հյուրերին դուր եկող բաներից մեկը անհատական հաղորդագրությամբ բացիկն է։ Ես օգտագործում եմ իմ քաղաքի՝ Սան Պաուլոյի թեմայով երիտասարդ դիզայներների պատրաստած բացիկ»։ –Պրիսցիլա և Գաբրիել, Սան Պաուլո
• Տեղ հատկացրեք հյուրերի ճամպրուկի համար։ «Յուրաքանչյուր մահճակալի ոտնակողմում ես ուղեբեռի համար դարակ եմ հատկացրել։ Ինձ դուր է գալիս, որ կարող եմ այն հեշտությամբ հեռացնել, երբ ինչ-որ մեկը լրացուցիչ տարածք է ուզում, կամ երբ մաքրում եմ»։ –Էլիսոն, Թրեվերս Սիթի, Միչիգան

Երբ համալրեք հիմնական պարագաները, դրանք թող մեկնարկային կետ հանդիսանան ավելի բարձրակարգ հյուրընկալության համար։

• Լրացուցիչ հարմարությունները պահեք ձեռքի տակ։ «Ես աշխատում եմ, որ տարածքում բավարար քանակով սրբիչներ, լրացուցիչ անկողնային սպիտակեղեն, օճառներ և շամպուններ լինեն»։ –Սյուզան, Քովինգտոն, Ջորջիա
• Տրամադրեք հարմարավետ հիգիենայի պարագաներ։ «Ես հյուրերին տալիս եմ դիմահարդարումը մաքրող պրոֆեսիոնալ անձեռոցիկներ»։ —Բևեռլի և Սյուզի, Օքլենդ, Կալիֆոռնիա (բոնուս. դրանք կօգնեն նաև, որ սավանների և սրբիչների վրա դժվար մաքրվող հետքեր չլինեն)
• Ձեր լոգասենյակը պահեք բարձր մակարդակով։ «Ես ծալում եմ զուգարանի թղթի ներքևի մասը։ Դա փոքր բան է, բայց թարմություն է հաղորդում և ցույց է տալիս ձեր հոգատարությունը»։ –Էմմա-Քեյթ, Սան Ֆրանցիսկո
• Ավելացրեք շքեղություն։ «Ես սպիտակ խավավոր կտորից հարմարավետ խալաթներ եմ տալիս։ Հյուրերն օգտագործում են դրանք, երբ օգտվում են սպա կենտրոնից կամ պարզապես հանգստանում են»։ –Լինդա, Լա Կվինտա, Կալիֆոռնիա

Ճամփորդությունների գրավչության բաղադրիչ մաս է կազմում նպատակակետում յուրահատուկ համեր, բույրեր, տեսարժան վայրեր և տեքստուրաներ գտնելը։ Հյուրերի հետ կիսվեք ձեր նախընտրություններով։

• Մատուցեք հիշարժան նախաճաշ։ «Կախված սեզոնից՝ ես նախաճաշի համար մատուցում եմ մի փոքր նվեր մեր տարածաշրջանի բարիքներից՝ լեռնային գյուղատնտեսների պատրաստած սոճենու հատուկ և հազվագյուտ մեղր, տեղական արտադրության պանիր կամ հեռավոր գյուղերի գյուղատնտեսների թարմ հյութ և մրգեր»։ –Կլաուդիա, Շվարցվալդ, Գերմանիա
• Մտածեք բոլոր ուղղություններով։ «Ես Պորտլենդից եմ և ուզում եմ, որ հյուրերը պորտլենդյան այդ շունչը զգան հյուրընկալման բոլոր առումներով։ Airbnb-ն հենց դա է։ Ես առաջարկում եմ տեղական չզտված գարեջուր, իմ այգու ծաղիկները, շատ գրքեր քաղաքի մասին, տեղական օրգանական սննդի խորտկարանները, իսկ «The Oregonian» թերթը բերում են ամեն օր։ Նաև տեղական ամսագրեր եմ գնում։ Լավ պորտլենդյան սուրճը շատ կարևոր է, կաթով սուրճը նույնպես լավն է»։ –Լիզա, Պորտլենդ, Օրեգոն
  
• Հարմարեցրեք փորձառությունը։ «Եթե իմ հյուրերը հանգստյան օրերին ծննդյան օր են նշելու, ես տեղական փոքրիկ կեքսեր կթողնեմ»։ –Թիֆանի, Հոլիվուդ Բիչ, Կալիֆոռնիա
• Նրանց մի փոքրիկ հուշանվեր տվեք։ «Ես տեղական տեսարաններով կամ տեսարժան վայրի նկարով բացիկ եմ թողնում, որը հյուրը կարող է պահել իրեն կամ տուն ուղարկել»։ –Դեբի, Թաուզենդ Օուքս, Կալիֆոռնիա

Գործնական հարմարությունները կարող են տարբերություն մտցնել հիանալի և անսպասելիորեն հիասթափեցնող ուղևորության միջև։ Օրը կարող եք փրկել արևապաշտպան միջոցներով, առաջին օգնության դեղարկղով, համակարգչային հարմարիչներով և այլն։

• Ապահովեք նրանց բացօթյա հանգիստը։ «Լողափային հավաքածու՝ աթոռներ, հովանոց, սարոնգ, գնդակով ձեռնաթիակ, շարժական սառնարան, խաղաքարտեր, մանկական խաղալիքներ և ֆուտբոլ։ Հակամոծակային հավաքածու՝ վանող և ցիտրոնելային մոմեր»։ –Դանիել, Ռիո դե Ժանեյրո
• Հաշվի առեք տեղական կլիման։ «Մենք գնեցինք շատ բարակ և թեթև պլաստմասսայից պատրաստված մեկանգամյա օգտագործման տասը անձրևանոց։ Պատահում է, որ հյուրերը ժամանում են հիանալի եղանակային պայմաններում, բայց հետո սկսվում են հորդառատ անձրևներ մինչև նրանց մեկնելը»։ –Թիլ և Յուտա, Շտուտգարտ, Գերմանիա
• Տրամադրեք վարսահարդարիչ և արդուկ։ «Վարսահարդարիչն ու արդուկը թանկ բաներ չեն, և դրանք ձեր տարածքում ունենալը ցույց է տալիս, որ մտածել եք մանրուքների մասին, որոնք պարզապես կարող են փրկել հյուրի օրը»։ –Ռիչարդ, Լենոքս, Մասաչուսեթս
• Ավելացրեք որոշ հարմարություններ ընտանիքի համար։ «Շատ կարևոր մի բան, որը բարձրացնում է վարկանիշը. բարձերով հին սայլակ՝ փոքրիկներին տարածքում քաշելու համար»։ –Շանտալ, Դինան, Ֆրանսիա

Չգիտե՞ք՝ որտեղից սկսել։ Մնացեք ձեր տարածքում մի գիշեր և զգացեք ձեզ որպես հյուր։ Եվ մեծ ուշադրություն դարձրեք ձեր հյուրերի կարծիքներին. նրանք տարբեր տեսանկյուններից կնայեն և այնպիսի գաղափարներ կառաջարկեն, որոնք գուցե ինքնուրույն չմտածեիք։ Ժամանակի ընթացքում դուք կգտնեք ձեր տարածքը կատարելագործելու լավագույն ձևը։ Ստացեք հիանալի կարծիքներ։