Կազմեք հյուրընկալման բիզնես պլան

Նիք և Սառա Ռուսոս-Կերակեյանները ամուսիններ են և միասին սուպերտանտեր են (@ nestrs), որոնք հյուրընկալումը վերածեցին սեփական բիզնեսի Օհայո նահանգի Կոլումբուս քաղաքում: 2012թ. Նյու Յորքի իրենց նկուղային տարածքի մասին հայտարարությունը Airbnb-ում տեղադրելուց հետո նրանք մշտական զբաղվեցին այս գործով։ Այդ ժամանակվանից նրանք հյուրընկալումը դարձրել են իրենց երազանքի գործը: Սառան նաև « Շնորհակալություն այցելության համար» փոդքասթի համահեղինակն է, որից օգտվում են ինչպես փորձառու, այնպես էլ սկսնակ հյուրընկալողները: Այստեղ համահեղինակները կիսվում են իրենց գիտելիքներով և խորհուրդներով, թե ինչպես սկսել բիզնես Airbnb-ում:

Սառա․ «Մեզ համար դա սկսվեց Նյու Յորքի Քուինս թաղամասում: Ես դերասանուհի էի։ Նաև շատ ժամանակ էի տրամադրում բարմենի աշխատանքին»։

Նիք․ «Իսկ ես ճարտարապետության մագիստրոսի կոչումով փորձնակ էի ու հազիվ էի կարողանում ինքս ինձ կերակրել…»

Սառա․ «Եվ մենք երկուսս էլ շատ էինք ուզում սեփականություն ունենալ, բայց չգիտեինք, թե ինչպես։ Մի օր ես մի միկրոտնակ տեսա. այն ամենափոքրն էր թաղամասում և թանկ էր մեզ համար: Բայց ես մտքիս դրել էի ամեն գնով ձեռք բերել այն»։

Նիք․«Ֆինանսական գրագիտությունը, խնայողությունները և ընտանիքի աջակցությունը օգնեցին մեզ վարկ ստանալ»։

Սառա․ «Այդ ընթացքում ես իմացա, որ ընկերս Airbnb-ում վարձով է հանձնում իր բնակարանի մի սենյակը, և դա թույլ է տալիս նրան վճարել վարձավճարը Նյու Յորքում։ Այդ միտքն ինձ խենթ թվաց։ Այն ժամանակ Airbnb-ի մասին քչերը գիտեին: Ես ասացի Նիքին, որ կարող ենք վարձով տալ մեր տարածքը, նա չէր կողմնորոշվում, բայց ես վարակվեցի այդ մտքով։ Ի վերջո, որոշեցինք փորձել, և ամեն ինչ սկսվեց դրանից»:

Նիք․ «Հիշում եմ, թե որքան երջանիկ էի, երբ մաքրում էի զուգարանները։ Դա թույլ էր տալիս վճարել մեր հիպոտեկային վարկը, և ես մտածում էի. «Այո, դա հրաշալի է։ Ինչպե՞ս կարող ենք դա ավելի շատ անել»։

Սառա․ «Ինձ շատ օգնեց շքեղ հյուրանոցներում աշխատանքի իմ փորձը, որն իմ սրտով էր։ Նյու Յորքում չորս տարի հյուրընկալելուց և սեփական տուն ունենալուց հետո մի օր բախտը մեզ ժպտաց. մեր դուռը թակեց մի կառուցապատող, որն ուզում էր մեզանից գնել այդ տարածքը՝ կահավորանքի և մյուս ամեն ինչի հետ միասին»։

Նիք․ «Երկար մտորումների արդյունքում մենք կազմեցինք այն վայրերի ցանկը, որտեղ կարող էինք տեղափոխվել։ Մենք ճանապարհորդում էինք ամբողջ երկրով, զրուցում տեղացիների հետ և ի վերջո կանգ առանք Օհայո նահանգի Կոլումբուս քաղաքում»։

Սառա․ «Երազանքս իրականացավ. ես զբաղվեցի դիզայնով, հյուրընկալությամբ և անշարժ գույքով՝ ունենալով ազատ ստեղծագործական մոտեցումներ կիրառելու հնարավորություն։ Ահա, թե ինչու ենք մենք այդքան մեծ հաճույքով օգնում խորհուրդներով ուրիշ տանտերերին»։

Սառա․ «Նախքան սկսելը, խորհուրդ ենք տալիս կազմել ձեր առաքելության կարգախոսը։ Դրանք կլինեն ձեր փարոսն ու ուղեցույց աստղը այն պահերին, երբ այլևս չեք իմանա, թե ինչպես առաջ շարժվել կամ ինչ որոշում կայացնել։ Առաքելության կարգախոսի սահմանումը ձեզ ճիշտ ուղու վրա կդնի։ Դուք նաև կպատկերացնեք, թե ինչպես ստեղծել և ձևավորել տարածքը»։

Նիք․ «Առաքելության կարգախոսը կազմելիս ինքներդ ձեզ մի քանի հարց տվեք.

• Ի՞նչն է ձեզ ոգեշնչում:
• Որո՞նք են ձեր արժեքները:
• Ինչպե՞ս եք ուզում գործել:
• Ո՞րն է ձեր տեսլականը։
• Որո՞նք են ձեր նպատակները»։

Սառա․ «Մեր կարգախոսն է. վերափոխելով տարածքները՝ վերափոխել կյանքը։ Եվ մենք ձգտում ենք մշտապես հետևել այդ կարգախոսին»:

Նիք․ «Նախքան սկսելը կարևոր է ուսումնասիրել մոտակայքի մրցակիցներին։ Այս նախնական ուսումնասիրությունը թույլ կտա ձեզ ավելի լավ պատկերացնել, թե ինչպես պետք է նախագծել, առանձնահատուկ դարձնել և ներկայացնել տարածքը:

• Գտեք ձեր հաճախորդին: Ովքե՞ր, ձեր կարծիքով, կամրագրեն ձեզ մոտ: Կոլումբուսը, օրինակ, համալսարանային քաղաք է մեզ համար, և մենք տարածքները տրամադրում էինք այն ծնողներին, որոնք այցելում էին այստեղ սովորող իրենց երեխաներին։
• Մտածեք հարմարությունների մասին: Արդյո՞ք թույլատրելու եք տնային կենդանիներ: Կայանատեղի կամ լողավազան ունե՞ք: Ձեր տարածքը յուրովի՞ է զարդարված: Ցանկացած բան, որը փոքր ինչ ավելի է բարելավում ձեր տարածքը, ավելի բարձր գին նշելու հնարավորություն է նաև:
• Որոնեք առցանց և նայեք մոտակայքում Airbnb-ի այլ հայտարարությունները, հյուրանոցները և կարճաժամկետ վարձակալության առաջարկները: Ի՞նչ է առաջարկվում։ Որքա՞ն արժե։ Ինչո՞վ կարող եք տարբերվել այդ առաջարկներից:
• Մշակեք գնագոյացման ռազմավարություն: Ձեր զբաղվածության ցուցանիշը բարձրացնելու համար օգտվեք Airbnb-ի Խելացի գնանշում գործիքից, որը թույլ է տալիս ավտոմատ փոխել գները աշխատանքային և հանգստյան օրերին»։

Սառա․ «Բյուջե կազմելը ամենահաճելի զբաղմունքը չէ, բայց այն շատ կարևոր է: Խորհուրդ ենք տալիս աղյուսակ կազմել և ծախսերը բաժանել երեք խմբի.

Նախնական ծախսեր. սրանք այն նախնական ներդրումներն են, որոնք պահանջվում են ձեր տարածքում նախքան հյուրերի ժամանումը՝ վերանորոգում, դեկոր, կահույք, լուսանկարներ։

• Դեկորի հարցում մի զլացեք։ Ընդ որում, անհաժեշտ չէ գնել ամենաթանկ կամ ամենաշքեղ իրերը: Կարևորը ջերմ և հյուրընկալ մթնոլորտն է: Այցելեք հազար ու մի մանրուքի խանութները կամ ստեղծագործական մոտեցում ցուցաբերեք և հյուրերի ուշադրությունը գրավեք տակավին անսովոր գույներով կամ ոճով. այդ ամենը կգրավի մարդկանց ուշադրությունը դեպի ձեր հայտարարությունը։
• Առաջին անգամ հյուրընկալողներին միշտ խորհուրդ ենք տալիս գումարը չխնայել որակյալ ներքնակներ, բազմոցներ և սավաններ գնելիս: Առաջին անգամ հյուրանոցային սենյակ մտնելիս բոլորը փորձում են ընկնել մահճակալին, այնպես որ լավ մահճակալ ունենալը պարտադիր է։ Երբեմն հյուրերը 5 աստղ են տալիս հենց մահճակալի համար, արդյունքում տանտիրոջ մոտ զբաղվածության ցուցանիշները բարձրանում են:

Ընթացիկ ծախսեր. սպառվող հիմնական ապրանքներ, որոնք պետք է համալրել՝ հիգիենայի պարագաներ, զուգարանի թուղթ, թղթե սրբիչներ, մարտկոցներ, էլեկտրական լամպեր:

• Դուք տրանմադրո՞ւմ եք լրացուցիչ պարագաներ, օրինակ՝ շշով ջուր կամ սուրճ։
• Կազմեք անհրաժեշտ հարմարությունների ցուցակը և որոշեք, թե որտեղից կարող եք դրանք գնել հարմար գնով
• Կատարեք մեծածախ գնումներ մի քանի ամսվա համար, իսկ քանակները հաշվառեք աղյուսակում
• Որոշեք, թե տարեկան քանի անգամ պետք է գնել այնպիսի իրեր, ինչպիսիք են, օրինակ, սավանները: Հյուրերի համար միշտ պետք է ունենաք անկողնու որակյալ, մաքուր սպիտակեղեն։

Սպասարկման և կառավարման ծախսեր. սա ընդգրկում է այն ամենը, ինչ անհրաժեշտ է ձեր տունը և արտաքին հարակից տարածքը անվտանգ, տաք և մաքուր վիճակում պահելու համար: Հավաքարարի կամ համահյուրընկալողի կարիք ունենալո՞ւ եք։

Ավելացրեք այդ ծախսերը և որոշեք՝ արդյոք գումարը մատչելի է ձեզ համար, և արդյոք ձեր նպատակները իրատեսական են: Եթե ոչ, ապա միգուցե հարկավոր է սկզբում մի փոքր ավելի շատ խնայել, որպեսզի հետո ունենաք այնպիսի տարածք, որով կհպարտանաք»։

Սառա․ «Այս խորհուրդը ես շատ եմ սիրում տալ տանտերերին․ հրավիրեք ձեր ազնիվ և անկեղծ ընկերոջը հյուրընկալվել ձեր տարածքում։ Չէ որ կողքից ավելի լավ է երևում, թե ճանապարհորդի համար անհրաժեշտ որ բանն եք մոռացել առօրյա եռուզեռում՝ լինի դա ատամի խոզանակը, թե մածուկը, կամ ինչ թերություն կա դիզայնում, որը չեք նկատել: Ընկերն իր կարծիքով կօգնի ձեզ շտկել այդ աննշան, բայց ճանապարհորդի համար կարևոր մանրուքները։ Ավելի լավ կլինի, եթե առաջինը դրանք մատնանշի ձեր ընկերը, այլ ոչ թե տարածքի համար վճարած հյուրը»։

Նիք․ «Մենք նաև սիրում ենք հյուրին տրամադրել այն, ինչը նա վերջին պահին կարող է մոռացած լինել․ հիգիենայի պարագաներով զամբյուղ կամ առաջին անհրաժեշտության իրեր։ Բիզնեսում հաջողության հասնելու համար հոգատար տանտիրոջ մտածելակերպ ունենալը շատ կարևոր է: Ահա, թե ինչու մարդիկ հաճախ նախընտրում են կրկին վերադառնալ նույն հյուրանոցը։ Նրանք գիտեն, թե ինչ կարող են ակնկալել. այն զգացողությունը, որ ձեզանից առաջ այստեղ ոչ ոք չի ապրել, խնամքով ծալված սրբիչներ, մահճակալի սեղանի կողքին հեռախոսի լիցքավորիչ. նրանք գիտեն, որ այդ ամենը այնտեղ իրենց է սպասում։ Ուշադիր եղեք ձեր հյուրերի ցանկությունների նկատմամբ, և նրանք կրկին և կրկին կվերադառնան»։

Նիք․ «Հյուրընկալումը դժվար է, բայց երբ Airbnb-ն ստեղծվեց, ամեն ինչ փոխվեց: Տարբեր տեխնոլոգիաները, գործիքները, ռեսուրսները և աջակցությունը օգնում են կազմակերպել ախշատանքը և հեշտացնում են հյուրընկալողի կյանքը»։

Սառա․ «Սկսնակ հյուրընկալողներին խորհուրդ ենք տալիս մանրազնին ուսումնասիրել գործընթացի բոլոր փուլերը` նախնական ամրագրման մասին հաղորդագրությունից մինչև հյուրերի դիմավորումը, տան մաքրումը և հաջորդ այցերի նախապատրաստումը: Երբ հասկանաք բոլոր նրբությունները, որոշ գործընթացներ կարող եք ավտոմատացնել մի շարք տարբեր եղանակներով, օրինակ:

• Վեբ հավելվածներ. կան հավելվածներ (օրինակ՝ IFTTT), որոնք հիշեցնում են միջոցառումների մասին և փոխկապակցում են թվային գործիքները: Օրինակ, երբ էլփոստով ամրագրման հաստատում եք ստանում, այն կարող է ավտոմատ օրացուցային հիշեցում ուղարկել ձեզ, ձեր գործընկերոջը կամ հավաքարարին։
• Սմարթ կողպեքները շատ կարևոր են։ Հյուրերին ուղարկվում է եզակի ծածկագիր, որը գործում է միայն ուղևորության ընթացքում։ Հյուրը կարող է ինքնուրույն ժամանել, ինչը նշանակում է, որ հարկավոր չէ համաձայնեցնել հադիպման ժամը, որպեսզի նա կարողանա մուտք գործել բնակարան։ Բավական է ընդամենը այցի ընթացքում որևէ պահի կապվել հյուրի հետ։
• Անելիքների ցուցակ. Ես կազմել եմ ստուգացանկ, որտեղ նշում եմ եռամսյակը մեկ յուրաքանչյուր տան համար կատարվող անվտանգության և տեխնիկական սպասարկման աշխատանքները, օրինակ, ստուգել վառարանի զտիչները, հրդեհային ազդասարքերի մարտկոցների սարքինությունը, ավլել մահճակալների տակ: Ցուցակը ես տպում և կախում եմ պահարանի դռան վրա, որպեսզի տարածքն այցելելիս արդեն իսկ տեղյակ լինեմ, թե տարվա մեջ ինչ վիճակում է այն գտնվում»։

Նիք․ «Airbnb-ում բիզնես սկսելը մեծ ջանք է պահանջում։ Բայց մենք մտադրված էինք ապացուցել, որ տուն ունենալը և դրա միջոցով բիզնես ծավալելը իրատեսական է, և դա անելու համար կան տարբեր ուղիներ»։

Սառա․«Ես այնքան էի տարված իմ աշխատանքով, և այն միտքը, որ նոր աշատանքի դեպքում զրկվելու եմ իմ սիրած գործից, սարսափեցնում էր ինձ։ Բայց Airbnb-ին շրջադարձ էր մեր կյանքում: Հիմա այն ամենը, ինչ անում ենք, մեր իսկ ստեղծագործական ընտրությունն է, և մենք ենք մեր գլխի տերը։ Դա մեր կյանքը շատ ավելի յուրահատուկ է դարձնում»։

Նիք․ «Դրա շնորհիվ մենք պահպանում ենք մեր ճկունությունը և փոքր ինչ ավելի շատ ենք վայելում կյանքը։ Հուսով ենք, որ ձեզ կհաջողվի բիզնես սկսել Airbnb-ում, և այն ձեզ համար հարազատ կդառնա։ Եթե այլ խորհուրդների կարիք ունենաք, դիմեք մեզ»։

Հաջող հյուրընկալում
Նիք + Սառա, Nestrs