Անվտանգության վերաբերյալ կարևոր ցուցումներ հյուրընկալողների համար

Անվտանգությանն առնչվող խնդիրների մասին տեղեկացված լինելը թույլ է տալիս նախապես պլանավորել և հնարավորինս հարմարավետորեն ընդունել հյուրերին։ Մենք հավաքել ենք որոշ խորհուրդներ, որոնք կօգնեն հետևել անվտանգության վերաբերյալ ընդհանուր ցուցումներին։ Անպայման ծանոթացեք և հետևեք ձեր տարածաշրջանին հատուկ օրենքներին, կանոններին և կանոնակարգերին։

Լողավազանները գրավիչ հարմարություն են հյուրերի համար, բայց կարող են պարունակել որոշակի վտանգներ։ Լողավազանով սեփականություն առաջարկելուն վերաբերող հստակ պահանջները տարբեր տարածաշրջաններում տարբեր են, բայց Safe Kids Worldwide կազմակերպությունը հորդորում է անել հետևյալը, որպեսզի ապահովեք ձեր և հյուրերի անվտանգությունը։

Տրամադրեք անվտանգության սարքավորումներ․

• Տեղադրեք լողավազանի ցանկապատ։ Այն պետք է ունենա առնվազն 1,2 մ բարձրություն ու ավտոմատ փակվող և ինքնաբլոկավորվող դռնակ։ Ցանկապատը պետք է շրջապատի լողավազանը բոլոր կողմերից՝ առանց որևէ այլ բանի, օրինակ՝ տան պատերի, որոնք ցանկապատի մաս են կազմում։
• Տեղադրեք ազդասարքեր բոլոր պատուհանների և դեպի լողավազանի տարածք տանող դռների վրա։
• Տեղադրեք ջրահեռացման անցքերի պաշտպանիչ կափարիչներ և ապահովիչ համակարգեր։ Դրանք կարող են պաշտպանել հավանական խցանումից։
• Տրամադրեք փրկարարական միջոցներ։ Դրանք ներառում են կարթաձողեր, ձողեր, փրկօղակներ և առաջին օգնության դեղարկղեր։ Դիտարկեք լողավազանի տարածքում ֆիքսված կապի հեռախոս ավելացնելու տարբերակը։

Ինքնուրույն կատարեք ընթացիկ ստուգումներ․

• Չափեք ջրի պարզությունը և քիմիական հավասարակշռությունը։ Սա պետք է արվի սահմանված ժամանակացույցով և հյուրերի ժամանումից առաջ։
• Ստուգեք անվտանգության ապահովման միջոցների առկայությունը։ Դա պետք է արվի յուրաքանչյուր ժամանումից առաջ։
• Ապահովեք անվտանգ մուտք դեպի լողավազանի տարածք։ Սա ներառում է դռնակներ շների համար և մուտքի այլ կետեր, որոնցով փոքր երեխան կարող է անցնել կամ մագլցել։

Իրազեկեք հյուրերին.

• Թարմացրեք ձեր հայտարարությունը։ Հստակորեն նշեք տարածքի նկարագրության մեջ, թե լողավազանի անվտանգության ինչ սարքավորումներ և հարմարություններ եք տրամադրում կամ չեք տրամադրում։ Օրինակ՝ «Մենք տրամադրում ենք փրկարարական բաճկոններ երեխաների և մեծահասակների համար։ Լողավազանը չունի չորս կողմից մեկուսացնող ցանկապատ, ուստի անհրաժեշտ է լրացուցիչ հսկողություն»։
• Հյուրերին խնդրեք ուսումնասիրել ձեր տան ուղեցույցը։ Այն պետք է ներառի տեղեկություններ անվտանգության միջոցների մասին, որոնք տրամադրում եք, օրինակ՝ ջրահեռացման անցքի կափարիչ, ազդասարքեր և լողավազանի ցանկապատ կամ դռնակ։ Բացատրեք, որ լողի պարագաները և ջրային խաղալիքները (լողի փչովի թևիկներ, լողաձողեր և այլն), չեն կանխարգելում խեղդվելը։
• Տեղադրեք անվտանգության մասին տեղեկություններ։ Լողավազանի մոտ պետք է լինի գրքույկ կամ ցուցանակ, որտեղ նշված են անվտանգության վերաբերյալ բոլոր խորհուրդները, նախազգուշացումները և արտակարգ իրավիճակների կոնտակտները։ Հիշեցրեք հյուրերին, որ երեխայի անհետացման դեպքում պետք է առաջին հերթին ստուգել լողավազանը։ Նաև տրամադրեք սիրտ-թոքային վերակենդանացման վերաբերյալ ցուցումներ, Safe Kids-ի «Լողավազանում անվտանգության ստուգացանկը» և տարածքի հասցեն։
• Հյուրերին հիշեցրեք ձեռքի հասանելիություն ապահովելու մասին։ Սա նշանակում է մշտապես հասանելի լինել թույլ կամ լողալ չիմացող անձանց։ Այդ մասին նշեք ձեր տան ուղեցույցում և փակցրեք լողավազանի մոտակայքում։
• Տրամադրեք Ջրին հետևողի քարտ՝ օգտագործման վերաբերյալ ցուցումներով։ Ջրին հետևողը պատասխանատու մեծահասակ է, որը համաձայնում է ուշի-ուշով վերահսկել ջրում գտնվող երեխաներին։

Վերելակները կարող են ավելացնել հարմարավետություն և կարևոր են տարածքի հասանելիության համար, բայց նաև կարող են պարունակել որոշակի վտանգներ։ Վերելակների անվտանգ շահագործման վերաբերյալ ցուցումներ ստանալու համար դիմեք տեղական իշխանություններին։

ԱՄՆ-ում Սպառողական ապրանքների անվտանգության հարցերի հանձնաժողովը սպառողներին հորդորում է.

• Համոզվել, որ դռների միջև բացվածքը չի գերազանցում 10 սանտիմետրը։ Եթե դուք վստահ չեք կամ այլ կերպ մտահոգված եք վերելակի անվտանգությամբ, արգելափակեք վերելակն անօգտագործելի վիճակում կամ կողպեք վերելակի մուտքի բոլոր դռները։ Վերելակներ տեղադրողները երբեք չպետք է թույլ տան, որ վերելակների մուտքում բացվածքի լայնությունը լինի 10 սանտիմետրից ավելի։
• Տան վերելակը զննելու համար հրավիրել վերելակների որակավորված տեսուչի։ Նա պետք է ստուգի ցանկացած վտանգավոր բացվածքի և անվտանգությանը սպառնացող այլ հնարավոր վտանգների առկայությունը և նաև ստուգի վերելակի համապատասխանությունը ամենավերջին «Վերելակների և շարժասանդուղքների անվտանգ շահագործման կանոններին» (ASME A17.1)։
• Ձեռք բերել անվտանգության սարքեր։ Բացվածքները կարելի է դարձնել ավելի անվտանգ՝ արտաքին դռան հետևի մասում դնելով սահմանափակիչներ կամ տեղադրելով էլեկտրոնային դիտարկման սարք, որն անջատում է վերելակը, երբ երեխա է հայտնաբերվում դռների արանքում։ Դիմեք վերելակն արտադրողին կամ վերելակը տեղադրողին, որպեսզի անվտանգության սարքեր ձեռք բերեք այս վտանգը վերացնելու նպատակով։

Ձեր տարածքն Airbnb-ում առաջարկելով՝ դուք հաստատում եք, որ հետևում եք գործող օրենքներին և կանոնակարգերին։

Բոլոր հյուրընկալողներին հորդորում ենք տեղադրել ծխի և շմոլ գազի հայտնաբերիչներ, պարբերաբար փորձարկել դրանք և արդիական պահել տարածքների նկարագրությունները։

• Ծանոթացեք տեղական կանոնակարգերին։ Հնարավոր է, որ պահանջվի մեկից ավելի սարքին ծխորոշիչներ և շմոլ գազի հայտնաբերիչներ տեղադրել ձեր տարածքում։ Որոշ քաղաքներում պահանջվում է յուրաքանչյուր սենյակում տեղադրել մեկ ազդասարք։
• Հայցեք ազդասարք։ Ակտիվ հայտարարություն ունեցող և պահանջներին համապատասխանող հյուրընկալողները կարող են անվճար ձեռք բերել ծխի և շմոլ գազի ինքնավար, մարտկոցով աշխատող համակցված հայտնաբերիչ։ Գործում են պայմաններ և դրույթներ։
• Թարմացրեք հայտարարությունը։ Հյուրերը կարող են զտել իրենց որոնումները, որպեսզի ներառեն միայն այն տարածքները, որտեղ կան շմոլ գազի հայտնաբերիչներ։ Ավելացրեք մանրամասներ «Հյուրերի անվտանգություն» բաժնի «Անվտանգության սարքեր» ենթաբաժնում այն ազդասարքերի մասին, որոնք դուք տեղադրել եք։

Այս հոդվածում պարունակվող տեղեկությունները կարող են փոխված լինել հրապարակումից հետո։