Ինչպես ընդլայնել ձեր բիզնեսը փորձառությունների օգնությամբ
Տնական նախաճաշեր, զբոսանքներ, զբաղմունքներ մոտակայքում և այլն. սուպերտանտերերը գործադրում են ամեն ջանք, որպեսզի գերազանցեն հյուրերի սպասելիքները։ Ըստ վիճակագրության՝ Airbnb տանտերերի մոտ 30%*-ը շրջայցեր և զբաղմունքներ է առաջարկել հյուրերին։ Եվ որոշ հյուրընկալողներ նույնիսկ այս առաջարկներն են վերածել փորձառությունների։
Օրինակ՝ սուպերտանտերեր Պատրիսիա Ռամոսը և Օսկար Ֆեռնանդեսը, որոնք Կուբայում առաջիններից էին, որ սկսեցին փորձառություն հյուրընկալել։ Ամուսինները Հավանայի համալսարանի տնտեսագիտության դասախոսներ են և սկսել են տանը հյուրընկալելուց։ Այժմ նրանք նաև հյուրընկալում են չորս փորձառություն՝ երկօրյա մշակութային արկած Հավանայում և գյուղական վայրերում, կեսօրյա զբոսանք իսկական Հավանայում, մեկօրյա էքսկուրսիա դեպի Կուբայի գյուղեր՝ սուրճ աճեցնելու, կենդանիներին խնամելու և հողի հետ աշխատելու համար, ինչպես նաև Կուբայի տնտեսության և հասարակության մասին երկժամյա զրույց՝ Կուբա լիբրեի կամ որևէ այլ ըմպելիքի շուրջ։ Բացի այդ, Օսկարն ասում է, որ իրենց ընկերներին խորհուրդ են տվել հյուրընկալել 15 այլ փորձառություն։
Պատրիսիան և Օսկարը խոսեցին մեզ հետ այն մասին, թե ինչպես են զարգացրել իրենց ձեռներեցությունը։
Այսպիսով, ինչպե՞ս սկսեցիք փորձառություններ կազմակերպել։
Օսկար. «Դե, երբ հյուրեր էին ժամանում, մենք նրանց հետ անցկացնում էինք երկու ժամ, քանի որ ուզում էինք պատմել այն ամենը, ինչ գիտեինք Կուբայի մասին։ Եվ դա մեզ շատ էր դուր գալիս, քանի որ թվում էր, թե դասախոսում ենք՝ պարզապես համալսարանից դուրս»։
Պատրիսիա. «Հետո մարդիկ սկսեցին կարծիքներ գրել մեր և հանպատրաստից շրջագայությունների մասին։ Ուստի, երբ Airbnb-ն մեկնարկեց փորձառությունները Կուբայում, մենք մտածեցինք. «Ինչո՞ւ չստեղծել այդպիսի փորձառություն, եթե արդեն իսկ նման բան ենք կազմակերպում ժամանողների համար»։
Պատմեք ձեր առաջին փորձառության մասին, որը կոչվում էր «Լինելով կուբացի»։ Ի՞նչն է այն եզակի դարձնում։
Պատրիսիա. «Հիմնականում Կուբա ժամանող արտերկրացի այցելուներն ակնկալում են լսել ծխախոտի, ռոմի և սալսայի մասին։ Բայց մենք ուզում էինք մի փոքր ավելին ցույց տալ հյուրերին. ինչպես են գործում կրթական համակարգը, առողջապահական համակարգը և շուկաները, և ինչպես են մարդիկ ապրում նման ցածր աշխատավարձով։ Մենք շրջում ենք քաղաքում և ցույց տալիս այն վայրերը, որոնք նախատեսված չեն զբոսաշրջիկների համար, օրինակ՝ Կոպելիան, որը պաղպաղակի թագավորությունն է։ Այնտեղ հնարավոր է 25 ԱՄՆ ցենտով գնել պաղպաղակի հինգ գնդիկ։ Մոտ 30 րոպե սպասել է պետք հերթում, որտեղ մարդիկ շփվում են և նույնիսկ հանդիպումներ կազմակերպում հերթում սպասելիս. դա բնութագրում է կուբայական հասարակությունը։ Մենք մեր հյուրերին տեղափոխում ենք նաև հասարակական տրանսպորտով, ինչը հազվադեպ է զբոսաշրջիկների դեպքում։ Օրվա վերջում նրանք զգում են, որ իսկապես կարևոր բանի են մասնակցել և կարող են խոսել այն մասին, թե իրականում ինչպես են կուբացիներն ապրում սոցիալիստական հասարակությունում»։
Ո՞րն է փորձառության կազմակերպիչ դառնալու առավելությունը։
Օսկար. «Գիտելիքն ու մշակույթով հարստանալը։ Ամեն անգամ կիսվում ես քո մշակույթով։ Մենք նաև դասախոսում ենք համալսարանում, ուստի մեր երիտասարդ գործընկերներին խրախուսում ենք մեզ հետ համատեղ վարել փորձառությունները։ Մենք նաև կարծում ենք, որ Airbnb-ն ստեղծել է աշխատատեղեր և բարելավել կյանքը։ Մեր «Կյանքը գյուղական վայրերում» փորձառության ժամանակ հյուրերին տանում ենք գյուղական միջավայր՝ հանդիպելու մեր ընտանիքի ընկերներին, որոնք ապրուստ են վաստակում հողագործությամբ, ձկնորսությամբ և մրգերի ու սուրճի աճեցմամբ։ Այժմ շաբաթը մոտ երեք անգամ հյուրեր ենք տանում այնտեղ, և մեր ընկերները նույնպես ձեռնարկատեր են դարձել»։
Կուզենայի՞ք որևէ խորհուրդ տալ այն հյուրընկալողներին, որոնք մտածում են փորձառություն ստեղծելու մասին։
Պատրիսիա. «Կարևորը՝ կիսվելու նյութ լինի և ցանկություն»։
Օսկար. «Բացվեք հյուրերի առաջ։ Դուք պետք է ինքներդ ձեզ նման և բնական լինեք, հակառակ դեպքում չեք հաջողի»։
*Airbnb-ի՝ ավելի քան 100 հյուրընկալողների ներգրավմամբ կատարված ներքին հետազոտության հիման վրա։
Այս հոդվածում պարունակվող տեղեկությունները կարող են փոխված լինել հրապարակումից հետո։