Կարգի բերեք ձեր տարածքը՝ հյուրերին ուրախացնելու համար

Հյուրերը գնահատում են մաքուր և կոկիկ տարածքը։ Որտեղ էլ որ ընդունեք հյուրերին՝ առանձին սենյակում, թե ամբողջ տանը, ձեր տարածքը կարգի բերելու համար օգտվեք հյուրընկալողների այս խորհուրդներից։

«Ես գտնում եմ, որ որքան քիչ են ավելորդ իրերը, այնքան տարածքը մաքուր է և կոկիկ»,- ասում է Ավստրալիայի Օլբանի քաղաքում հյուրընկալող Քեթը։ Հյուրերը շատ են կարևորում մաքրությունը։ Ըստ Airbnb-ի տվյալների՝ կեղտոտ տարածքը բացասական կարծիքի գլխավոր պատճառներից մեկն է։

«Կարևոր է հարթ մակերևույթների վրա քչացնել ավելորդ իրերն ու առարկաները»,- ասում են սուպերտանտերեր Ջեյը և Լիննը Տեխաս նահանգի Բլանկո քաղաքից։ «Սա շատ ավելի է հեշտացնում մաքրումը, հյուրերին տրամադրում է տարածք իրենց իրերը դնելու համար և օգնում է նրանց չմոռանալ իրերը, քանի որ մեկնելու պահին սենյակը վերջին անգամ ստուգելիս կարող են տեսնել դրանք»։

Հյուրերն իրենց հագուստը, հիգիենայի պարագաները և այլ անձնական իրերը դնելու տեղեր պետք է ունենան։ Որոշ դարակներ ու պահարաններ դատարկ պահելու համար կարող է պահանջվել հեռացնել ավելորդ իրերը։ «Եթե չեմ օգտագործել կամ մեկ-երկու տարի կրել եմ այն, դեն եմ նետում»,- ասում է Մեքսիկայի Սայուլիտա քաղաքում հյուրընկալող Սառան։

Գուցե ցանկանաք ավելի շատ տարածք ազատել, հատկապես եթե երկարաժամկետ մնացող հյուրերի եք ընդունում, ինչպես օրինակ՝ Հարավային Կորեայի Սեուլ քաղաքում հյուրընկալող Ջեսիկան։ «Վստահ եմ, որ նրանք գրքեր, հուշանվերներ, ընտանեկան նկարներ և իրենց «ավելորդ» իրերը կունենան, որոնք կցանկանան պահել մահճակալի կողքի սեղանին, գրասեղանին կամ դարակում»,- ասում է նա։

Մտածեք, թե ինչպես կարելի է լավագույնս ցուցադրել հարմարությունները, որպեսզի հյուրերը կարողանան հեշտությամբ գտնել դրանք։ Ֆրանսիայի Իվինյակ-լա-Տուր համայնքի հյուրընկալող Շանտալը հյուրերի համար նախատեսված առանձին պահարան ունի. «Այնտեղ ամեն ինչ կա՝ ջրի փոքր շշերից մինչև զուգարանի թուղթ, ամեն ինչ դասավորված է առանձին զամբյուղներում՝ ըստ դարակների և կատեգորիաների»։

Տարածքը կազմակերպելուց հետո չմոռանաք վերցնել սպիտակեղենն ու այլ պարագաները և նվիրաբերել կամ հեռացնել այն ամենը, ինչը լավ վիճակում չէ։

«Անձամբ ինձ դուր չի գալիս, երբ հայտարարության մեջ խոհանոցում ամեն ինչ, կարծես, մեծ զեղչով է գնված կամ ինչ-որ տեղից հավաքած իրեր են», ասում է Կալիֆոռնիայի Լինքոլն քաղաքում հյուրընկալող Ալեքսանդրան։

Խոհանոցում և լոգասենյակներում թողեք այն, ինչ իսկապես պետք է հյուրերին, մնացածը հեռացրեք։ Շատերը կգնահատեն, օրինակ, շշի բացիչը և մազերի կոնդիցիոները, բայց յուրաքանչյուրից երեք տեսակ հարկավոր չէ նրանց։

Գուցե թվա, թե նախորդ հյուրերի թողած պարագաներն ապագա հյուրերի համար խնայելով ավելի քիչ կվատնեք, բայց դա լավ գաղափար չէ։ Չիկագոյում հյուրընկալող Միշելը պահում է միայն «գնման պահպանված փաթեթավորմամբ» սննդամթերքն ու խմիչքը, օրինակ՝ «շշալցված ջուր, գազավորված ջուր և մեկանգամյա օգտագործման համեմունքներ»։

«Սենյակում ամեն ինչ պետք է նպատակային լինի»,- ասում է Տեխաս նահանգի Օսթին քաղաքում հյուրընկալող Քելլին։ «Դա չի նշանակում, որ սենյակը չպետք է նորաձև լինի կամ հաճելի, ջերմ, հարմարավետ զգացողություն տա»։

Ֆունկցիոնալության և հարմարավետության միջև ճիշտ հավասարակշռությունը տարբեր տարածքներում տարբեր է, բայց ահա մի քանի հիմնական խորհուրդ, որոնք կարող եք նկատի ունենալ․

• Խիստ անձնական իրեր մի թողեք։ Հյուրերի համար նախատեսված տարածքներում մի պահեք այնպիսի իրեր, ինչպիսիք են ընտանեկան լուսանկարները, երեխաների ձեռքի աշխատանքները, հագուստը և կոշիկը։
• Մի փոքր ինքնատիպությունը ողջունելի է։ Շրջանակով տեղական արվեստի գործերը, յուրօրինակ կահույքը կամ անկրկնելի հայելին կարող են առանձնացնել ձեր տարածքը։
• Մի փոքր դեկոր ավելացրեք։ Այնպիսի իրերը, ինչպիսիք են բույսերը և բարձերը, կարող են ձեր տարածքին հարմարավետություն հաղորդել, եթե օգտագործվեն չափավոր և դասավորվեն մտածված կերպով։