Որոշեք, թե քանի հյուր կարող է մնալ ձեր տարածքում
Պոտենցիալ հյուրերն առաջին հերթին ուզում են իմանալ, թե ինչ մեծության է տարածքը։ Նշելով հյուրերի թիվը, որոնց կարող եք տեղավորել, և առկա մահճակալների, ննջասենյակների ու լոգասենյակների քանակը՝ մարդկանց կօգնեք հասկանալ, թե արդյոք ձեր տարածքը համապատասխանում է իրենց կարիքներին։
Ձեր հայտարարությունը հրապարակելուց հետո կկարողանաք ավելացնել լրացուցիչ մանրամասներ, այդ թվում՝ նշել մահճակալների տեսակները և յուրաքանչյուր ննջասենյակում առկա հարմարությունները, օրինակ՝ կախիչներ և հավելյալ բարձեր։ Իսկ մինչ այդ կարող եք կենտրոնանալ հյուրերի թվի վրա, որոնց կցանկանայիք ընդունել ձեր տարածքում։
Եթե վստահ չեք, փորձեք այս խորհուրդները.
- Հաշվեք մահճակալները։ Մտածեք, թե քանի մարդ կարող է հարմարավետորեն քնել յուրաքանչյուրի վրա։
- Հաշվեք լոգասենյակները։ Մտածեք, թե քանի մարդ կարող է հարմարավետորեն համօգտագործել այդ տարածքները։
- Սահմանեք հյուրերի՝ ձեզ հարմար առավելագույն թիվը։ Միայն այն հանգամանքը, որ ձեր տարածքում կարող եք տեղավորել որոշակի թվով մարդկանց, չի նշանակում, որ պետք է ընդունեք այդքան հյուրերի։
- Աշխատեք տհաճ անակնկալներ չմատուցել հյուրերին։ Եթե ձեր մահճակալների հաշվարկը ներառում է բազմոցներ, ֆուտոններ, փչովի ներքնակներ կամ որպես քնատեղեր հարմարեցվող այլ միջոցներ, անպայման դա նշեք առաջիկա քայլերում, օրինակ՝ երբ ավելացնում եք տարածքի նկարագրությունը կամ լուսանկարների մակագրեր։ Արժե նշել նաև օրորոցի կամ ճաղավոր երկհարկանի մահճակալների առկայությունը։
- Ենթադրություններ մի արեք։ Օրինակ՝ միասին ճանապարհորդող երկու հոգի գուցե մտադիր չեն միասին քնել նույն անկողնում։
Երբ պատրաստ լինեք, օգտագործեք «պլյուս» և «մինուս» կոճակները, որպեսզի սահմանեք հյուրերի առավելագույն թիվը և նշեք մահճակալների, ննջասենյակների ու լոգասենյակների քանակը։ Լոգասենյակների հաշվարկի մեջ կարող են ներառվել նաև կիսալոգասենյակները (զուգարանով և լվացարանով, բայց առանց ցնցուղի կամ լոգարանի)։
Հիշեք, որ ցանկացած պահի կարող եք փոփոխություններ կատարել տեղեկություններում՝ ներառյալ մահճակալների քանակն ու թույլատրված հյուրերի թիվը, եթե ձեր իրավիճակը կամ կարիքները փոխվեն։