Մեկնման պարզ և հստակ գործընթաց

Մեկնումը պետք է շատ քիչ ջանք պահանջի հյուրերից և հյուրընկալողներից։ Հայտարարության մեջ ավելացրեք ձեր ցուցումները, և Airbnb-ն դրանք ավտոմատ կերպով հյուրերին կուղարկի մեկնումից առաջ՝ այցի վերջին գիշերը։

Դուք ավելացնում եք մեկնման վերաբերյալ ցուցումներ ճիշտ այնպես, ինչպես տան ստանդարտ կանոնները։ Արագ կազմեք մեկնման ցուցակ՝ ընտրելով հետևյալ ընդհանուր առաջադրանքներից․

• Հավաքել օգտագործված սրբիչները
• Թափել աղբը
• Անջատել էլեկտրասարքերը
• Կողպել դուռը
• Վերադարձնել բանալիները

Կարող եք մանրամասներ ավելացնել յուրաքանչյուր առաջադրանքի վերաբերյալ։ Օրինակ՝ նշեք, որ հյուրերը սովորական աղբը դնում են մեկ աղբամանի մեջ, իսկ վերամշակվողը՝ այլ։ Կարող եք նաև ավելացնել հատուկ խնդրանքներ, օրինակ՝ օգտագործելուց հետո ծածկել մանղալը։

Հյուրերը նախքան տարածք ամրագրելը կարող են ծանոթանալ մեկնման վերաբերյալ ցուցումներին և տան կանոններին։ Ամրագրումից հետո նրանք կարող են մեկնման վերաբերյալ ցուցումներ գտնել «Ուղևորություններ» ներդիրում՝ տան կանոնների, Wi-Fi-ի տվյալների և այլ կարևոր մանրամասների հետ միասին։

Հյուրերն ակնկալում են հեշտ մեկնում՝ առանց տարածքը մաքրելու, բայց, հյուրերի համար սահմանված հիմնական կանոնների համաձայն, չպետք է ձեր տարածքը թողնեն այնպիսի վիճակում, որը կպահանջի մեծածավալ կամ մանրազնին մաքրում։

«Մենք ուզում ենք մեկնման գործընթացը դարձնել հնարավորինս պարզ»,- ասում է Քեշավը, որը Հյուրընկալողների խորհրդի անդամ է Նյու Դելիում։ «Հավաքարարը գալիս և անում է այն ամենը, ինչ պետք է անել»։

Մենք հյուրերին կուղարկենք ձեր ցուցումները և ավտոմատ հիշեցում մեկնման ժամի մասին։ Մեկնումից մեկ օր առաջ, տեղական ժամանակով ժամը 17։00-ին, հյուրի բջջային սարքին կուղարկվի push-ծանուցում։

Այս հիշեցումը ստանալու համար հյուրերը պետք է ներբեռնեն Airbnb հավելվածը և միացնեն push-ծանուցումները։ Մեկնումից հետո հյուրերը կարող են ձեզ այդ մասին տեղեկացնել մեկ հպումով կամ սեղմումով։

Գուցե կուզենաք շեշտել, թե ինչու է կարևոր ժամանակին մեկնելը։ «Ես հյուրերին ասում եմ, որ մաքրողը կժամանի ժամը 11։00-ին՝ բնակարանը հաջորդ հյուրերի համար նախապատրաստելու, որպեսզի նրանք հասկանան, թե ինչու է կարևոր ժամանակին մեկնելը»,- ասում է Սան Ֆրանցիսկոյում սուպերտանտեր Ջոն։

Մեկնման քարտը մեկնման մասին տեղեկությունները հյուրերին ուղարկելու հարմար միջոց է։ Մեկնման վերաբերյալ ցուցումները մուտքագրելուց հետո կարող եք արագ պատասխանի կամ պլանավորված հաղորդագրության մեջ ավելացնել մեկնման քարտ։ Քարտում կլինի ցուցումների հղում։

Airbnb-ն ավտոմատ կերպով հիշեցում կուղարկի հյուրերին մեկնումից մեկ օր առաջ, սակայն կարող եք նաև ինքներդ կազմակերպել հյուրերի հետ ձեր հաղորդակցությունը։ Կարող եք մեկնման մասին հիշեցման պլանավորված հաղորդագրություն ուղարկել անմիջապես ձեր հյուրերի Airbnb փոստին, եթե նրանք չեն ներբեռնել հավելվածը կամ չեն միացրել push-ծանուցումները։

Մեկնելուց հետո հյուրերը կարող են գնահատական տալ հյուրընկալողի հետ իրենց շփմանը և նշել, թե ինչն է լավ եղել, և ինչը կարելի է բարելավել։ Տարբերակներից մեկը «մեկնումից առաջ չափազանց շատ պահանջների» մասին հաղորդելն է։ Չհիմնավորված առաջադրանքների պատճառով շարունակ ցածր գնահատականներ ստացող հայտարարությունները կարող են հեռացվել Airbnb-ից։

Հյուրերն իրենց այցի համար ընտրում են նաև ընդհանուր գնահատական։ Կոնկրետ կատեգորիաների, օրինակ՝ շփման վերաբերյալ կարծիքները և գնահատականները չեն ազդում սուպերտանտիրոջ կարգավիճակի վրա։

Այս հոդվածում պարունակվող տեղեկությունները կարող են փոխված լինել հրապարակումից հետո։