7 խորհուրդ ճգնաժամից փախուստի դիմած մարդկանց հյուրընկալելու համար

Եթե նախկինում հյուրընկալել եք Airbnb-ի միջոցով, հավանաբար երկար ժամեր եք անցկացրել՝ մտածելով, թե ինչպես անել, որպեսզի հյուրերն իրենց լավ զգան ձեր տարածքում։

Արտակարգ իրավիճակներում Airbnb.org-ի միջոցով այցեր հյուրընկալելիս կարող եք նաև հաշվի առնել, թե ինչպես ընդունել տրավմա ապրող հյուրերի։

Մարդիկ, որոնք իրենց տները լքել են անվտանգության նկատառումներով՝ երբեմն զգուշացված լինելով նվազագույն ժամանակ առաջ, կարող են ունենալ հանգստի նպատակով ճանապարհորդողներից տարբեր մտահոգություններ և ակնկալիքներ։ Դա է պատճառներից մեկը, որ Airbnb.org-ը համագործակցում է շահույթ չհետապնդող կազմակերպությունների հետ, որոնք մասնագիտացած են հակամարտություններից և բնական աղետներից փախչող մարդկանց աջակցման գործում։ Այս կազմակերպությունները երբեմն համալիր ծառայություններ են տրամադրում հյուրերի այցի ընթացքում։

Բարդ խնդիրներ առաջանալու դեպքում Airbnb.org-ն առաջարկում է հաճախորդների աջակցման հարցերով հատուկ պատրաստություն անցած մասնագետների ծառայություններ ձեզ և ձեր հյուրերի համար։ Բացի այդ, թիմը հյուրերին աջակցում է նրանց ազգությունից, ռասայից, էթնիկական պատկանելությունից կամ ինքնանույնականացումից անկախ։

Դժվար է գերագնահատել տրավմատիկ փորձությունների միջով անցած ընտանիքի համար հարմարավետ, ապահով և մասնավոր տարածքի արժեքը։ Շատերն իրենց տները լքելուց ի վեր չեն օգտվել խոհանոցից, որտեղ կարող են ճաշ պատրաստել, կամ հյուրասենյակից, որտեղ կարող են միասին հավաքվել։

Ահա մի քանի քայլեր, որոնք կարող եք անել ձեր տարածքն ավելի հյուրընկալ դարձնելու համար.

• Խթանեք ձեր տարածքում ջերմության և հարմարավետության զգացողությունը, որը մարդկանց կօգնի խաղաղվել։ Մաքուր անկողնային պարագաներն ու սրբիչները, հիգիենայի հիմնական պարագաները և խոհանոցային պարագաները կօգնեն, որպեսզի մարդիկ իրենց զգան հարմարավետորեն տեղավորված, նույնիսկ եթե մնում են ընդամենը մի քանի օր։

• Որոշ հյուրերի կարող է անհանգստացնել իրենց անձնական անվտանգության հարցը։ Փորձեք ապահովել մերձատար ճանապարհների և նախամուտքերի լավ լուսավորությունը։ Համոզվեք, որ բոլոր կողպեքները, շերտավարագույրները և վարագույրները գործում են։ Հայտնեք նրանց՝ արդյոք հնարավոր են բարձր աղմուկներ, որոնք առաջացնում են, օրինակ, ուղիղ գլխավերևում թռչող ինքնաթիռները կամ վաղ առավոտյան տանը մոտեցող աղբահավաքները։

• Տրավմա և անցումային ժամանակաշրջան ապրող մարդիկ, հնարավոր է, դժվարանան հիշել տեղեկությունները։ «Հնարավոր չէ սթափ մտածել, մարսել տեղեկությունները»,- ասում էր Կալիֆոռնիայում խոշոր հրդեհի ժամանակ տարհանված հյուրերից մեկը։ «Դա ճնշող է այն աստիճան, որ պարզապես չգիտես, թե ինչպես վարվել, և դա գրեթե կաթվածահար է անում»։ Տեսողական օժանդակ նյութերը կարող են օգնել ձեր հյուրերին։ Կարելի է տրամադրել տարածքի հասցեն և թաղամասի քարտեզը՝ թղթի վրա տպված, որը հյուրերը կարող են ուսումնասիրել անհրաժեշտության դեպքում։

• Եթե դուք և ձեր հյուրերը չունեք ընդհանուր լեզու, դիմեք շահույթ չհետապնդող տեղական կազմակերպությունների կամ ընկերությունների, որոնք գուցե առաջարկեն հյուրի իմացած լեզվով թարգմանված ռեսուրսներ։ Եթե Airbnb.org-ի՝ շահույթ չհետապնդող գործընկերներից մեկի սոցիալական աշխատողն աջակցում է ձեր հյուրերին, նա նույնպես կկարողանա օգնել։

Շատ հյուրընկալողների կարծիքով՝ հյուրերի հետ անձնական կապեր ստեղծելը հյուրընկալման ամենամեծ պարգևներից մեկն է։ Ահա թե ինչ պետք է հիշեք, երբ շփվում եք վերջերս տրավմա ապրած հյուրերի հետ։

• Թափանցիկությունն ու հետևողականությունը շատ կարևոր են։ Հյուրերին նախապես տեղեկացրեք տանը կամ տան շրջակայքում տեխնիկական սպասարկում իրականացնելու նպատակով մասնագետի այցի մասին և վաղօրոք հայտնեք, եթե դուք էլ պետք է որոշ ժամանակով ներկա գտնվեք։

• Հյուրերի հետ զրուցելիս փորձեք կենտրոնանալ այցին վերաբերող հարցերի վրա և չխոսել նրանց հետ պատահած ճգնաժամի մասին։ Մերին, որը հյուրընկալել է Ուկրաինան լքած մի քանի մարդկանց, ասում է․ «Ես տվեցի ընդհանուր բնույթի հարցեր, ինչպիսիք են «Որտեղի՞ց եք գալիս» և «Ինչպե՞ս անցավ ձեր ճանապարհորդությունը»»։ «Ձեր հյուրերն իրենք իմաց կտան՝ արդյոք ցանկանում են ավելի շատ խոսել իրենց ապրումների մասին»,- ավելացրեց նա։ Հարգելով նրանց մասնավոր կյանքը՝ դուք տալիս եք ուժերը հավաքելու և լիցքավորվելու հնարավորություն։

• Կողմնորոշվեք հյուրերի տրամադրություններով, որպեսզի իմանաք, թե ինչպես են ցանկանում հարաբերվել ձեզ հետ։ Ոմանք գուցե ուզում են մոտ լինել իրենց ընտանիքներին։ Մյուսները կարող են դիմել ձեզ՝ խնդրելով օգնել կապեր ստեղծել համայնքում։

Շնորհակալություն ձեր տարածքն առաջարկելու պատրաստակամության, տրամադրած ժամանակի և սիրալիրության համար։ Եթե ցանկանաք լրացուցիչ տեղեկություններ ստանալ այն մասին, թե ինչպես պատրաստվել արտակարգ իրավիճակներում այցեր ընդունելուն, հոդվածներ և տեսանյութեր կգտնեք Airbnb.org-ի հյուրընկալման ուղեցույցում, որը հասանելի է Ռեսուրս կենտրոնում։